މި ފަހަރުގެ އުރީދޫ ސާފް ޗެމްޕިއަންޝިޕަށް ފަހު ނޭޕާލްގެ ކޯޗުކަން ދޫކޮށްލި ކުވޭތުގެ އަބްދުﷲ އަލް މުތައިރީ އަށް އަލުން އެ މަގާމު ދޭން ނޭޕާލްގެ ފުޓްބޯޅަ ފެޑެރޭޝަން (އަންފާ) އިން ނިންމާފައިވާ ކަމަށް ރިޕޯޓްތައް އެވެ.
މިދިޔަ އޭޕްރީލް މަހު ނޭޕާލްގެ ކޯޗުކަމާ ހަވާލުވި މުތައިރީ އާއި ނޭޕާލްގެ ފުޓްބޯޅަ ފެޑެރޭޝަން، އަންފާގެ ނައިބު ރައީސް ޕަންކަޖް ނެމްބަންގާ މައްސަލަ ޖެހި އޭނާ ވަނީ ސާފް ފެށުމުގެ ތިން މަސް ކުރިން މަގާމުން އިސްތިއުފާދީފަ އެވެ. އެކަމަކު، ފަހުން އޭނާ އަލުން މަގާމާ ހަވާލުވީ ވަކި ޝަރުތުތަކަކަށް އެއްބަސްވެގެންނެވެ. އޭގެ ތެރެއިން އެއް ކަމަކީ މި ފަހަރުގެ ސާފް ޗެމްޕިއަންޝިޕްގެ ނިޔަލަށް އޭނާ މަގާމުގައި ދެމިހުރުމެވެ.
ސާފް ޗެމްޕިއަންޝިޕްގެ ލީގު ބުރުގައި ބަންގްލަދޭޝާ އެއްވަރުވި މެޗަށް ފަހު މުތައިރީ ވަނީ އެއް މަސް ކުރިން މަގާމުން އިސްތިއުފާ ދިން ކަމަށް ބުނެފަ އެވެ.
އެކަމަކު، ސާފް ޗެމްޕިއަންޝިޕްގެ ފައިނަލުގައި ނޭޕާލުގެ ފުޓްބޯޅަ ތާރީހުގައި މުޅިން އަލަށް (28 އަހަރުތެރޭ ފުރަަތަމަ ފަހަރަށް) ވާދަކޮށް ފައިނަލުގައި އިންޑިއާ އަތުން 3-0 އިން ބަލިވި މެޗަށް ފަހު މުތައިރީ ބުނީ ނޭޕާލް ޓީމާ އެކު ކުރިއަށްދާން "އޮފާ" އެއް ލިބިއްޖެނަމަ ވިސްނާނެ ކަމަށެވެ.
ސޯޝަލް މީޑިއާގައި މިއަދު މުތައިރީ ލިޔެފައިވަނީ އޭނާ އާއި އަންފާ އިން އެއްބަސްވުން އާ ކުރަން ނިންމާފައިވާ ކަމަށާއި ވަރަށް އަވަހަށް ނޭޕާލް ފުޓްބޯޅަ ފެޑެރޭޝަނާ އެކު ދެ އަހަރުގެ ޕްލޭނެއްގެ މަޝްވަރާތައް ކުރިއަށްދާނެ ކަމަށެވެ.
މުތައިރީ ހަވާލުވި ފަހުން ކުޅުނު 13 މެޗުގެ ތެރެއިން ހަތް މެޗުން ބަލިވި ނަމަވެސް ހަތަރު މެޗުން މޮޅުވެ ދެ މެޗު ވަނީ އެއްވަރުކޮށްފަ އެވެ.
ނޭޕާލް މޮޅުވީ ވޯލްޑް ކަޕް ކޮލިފައިންގައި ޗައިނީސް ޓައިޕޭ އަތުންނާއި ގަތަރުގެ ޓްރެއިނިން ކޭމްޕްގައި އެ ގައުމުގެ ކްލަބް, އަލް ބިދާ ސްޕޯޓްސް އަތުންނާއި ސާފް ޗެމްޕިއަންޝިޕްގައި ރާއްޖެ އާއި ސްރީ ލަންކާ އަތުންނެވެ.
މުތައިރީގެ ކޯޗުކަމުގައި ނޭޕާލުން ވަނީ އޭޝިއާ ފުޓްބޯޅައިގެ ވަރުގަދަ ޓީމުތަކާ ވެސް ކުޅެފަ އެވެ. އޭގެ ތެރޭގައި އިރާގާއި އޮސްޓްރޭލިއާ ޖޯޑަން އަދި އޮމާން ހިމެނެ އެވެ.
