ހއ. އުތީމު ގޮނޑުދޮށުގެ ގިރަމުންދާ ސަރަހައްދުން މިއަދު އާސާރީ ވެލިގަލު ފެން ވަޅެއް ފެނިއްޖެ އެވެ.
އުތީމުގެ ކައުންސިލް ރައީސް އަބްދުﷲ ރަޝީދު ވިދާޅުވީ އެ ވަޅަކީ، އެ ރަށުގެ ބަނދަރު ހެދުމަށްފަހު، އާދަޔާހިލާފަށް ރަށް ގިރަން ފެށުމުން، ނެތިގެން ހިނގައިދާނެ ކަމަށް ހީވެފަ އޮތް ހުޅަނގު ފަރާތުގައި އޮންނަ މަޝްހޫރު ދޫނި ތުނޑިން ފެނުނު ވަޅެއް ކަމަށެވެ.
"މިފަހުން ވަރަށް ގަދަޔަށް ރަށް ގިރަމުން ގޮސް އެ ފެނުނީ. ހަމަ މިއަދު އެ ފެނުނީ. އެ ސަރަހައްދަކީ އުތީމުގައި ބޮޑުތަކުރުފާނު ތުއްޕުޅުއިރު، ދޫނި ހިއްޕަވަން އުޅުއްވި ތުނޑި،" ރަޝީދު ވިދާޅުވި އެވެ.
ހަތަރެސްކަނަށް ވެލިގަލުން ހަދާފައި ހުރި އެ ވަޅަށް ގާތްގަނޑަކަށް 500 އެއްހާ އަހަރު ވެދާނެ ކަމަށް ރަޝީދު ލަފާ ކުރައްވަ އެވެ.
ހއ. އުތީމުން ފެނުނު އާސާރީ ވަޅު. ހަތަރެސްކަން އެ ވަޅު ނެތިގެން ހިނގައިދާނެ ކަމުގެ ބިރު އެބަ އޮތް.-- ފޮޓޯ: އުތީމު ކައުންސިލް
"ރަށުގަ ހުރޭ އަދިވެސް އެކަހަލަ ބައެއް ވަޅުތައް ހަދާފަ. އުތީމު ގަނޑުވަރު ތެރޭގައި ވެސް ހުރޭ އެކަހަލަ ވަޅެއް. ހަމަ ގަނޑުވަރާ އެއްވަރަކަށް ދުވަސް ވެދާނެ ކަމަށް ބެލެވެނީ އެ ވަޅަށް ވެސް. ވަޅު ފެނުނީ ހަމަ ރަށުގެ ރައްޔިތުންތަކަކަށް. އެހާ މީހުން ގޮސް އުޅޭ ސަރަހައްދެއް ނޫން އެއީ އެހެންވީމަ މިއަދު ފެނުނަސް މީގެ ދެ ތިން ދުވަހެއް ކުރިން އެ ސަރަހައްދުން ގިރައިގެން މައްޗަށް އަރާފަ ހުރެދާނެ،" ރަޝީދު ވިދާޅުވި އެވެ.
އުތީމުގައި ހުންނަ ބޮޑުތަކުރުފާނުގެ ހަނދާނީ މަރުކަޒުގެ އެސިސްޓެންޓް ޑިރެކްޓަރު އަލީ ސިފާމް ވެސް ވިދާޅުވީ އެ ވަޅަށް 500 ވަރަކަށް އަހަރު ވެދާނެ ކަމަށް ލަފާކުރެވޭ ކަމަށެވެ. އަދި އެއީ އުތީމުގައި އެންމެ ފުރަތަމަ މީހުން ދިރިއުޅުނު ސަރަހައްދު ކަމަށް ވެސް އޭނާ ވިދާޅުވި އެވެ.
"ހަމަ ހަތަރެސްކަނަށް ހަދާފަ ހުރި ވަޅެއް އެއީ. އެކިއުރޭޓްކޮށް 700 މިލިމީޓަރު ހުރޭ ކޮންމެ ސައިޑަކުން ވެސް. ދެން ބައެއް ބައިތައް ނެއްޓިފަ ހުރީ ރާޅު ޖަހައިގެން، އެހެންވެ އެ ބައިތައް ވެސް ހިމާޔަތްކޮށްފަ ވަނީ،" ސިފާމް ވިދާޅުވި އެވެ.
ކައުންސިލް ރައީސް ރަޝީދު ވިދާޅުވި ގޮތުގައި އެ ވަޅު ފެނުނު ސަރަހައްދުން މީގެ ކުރިން ވެސް އާސާރީ ގިނަ ތަކެތި ފެނިފައި އެބަހުއްޓެވެ. މިފަހަރު ފެނުނު ވަޅު، ގިރާ ސަރަހައްދާއެކު ނެތިގެން ހިގައިދާނެކަމުގެ ބިރު އެބަ އޮތް ކަމަށް ރަޝީދު ވިދާޅުވި އެވެ.
"އެ ސަރަހައްދުން މީގެ ކުރިން ވެސް ހުންނާނެ ދެން އަޅުގަނޑުމެން ކިޔަނީ ދެން ސީނު ތަށި، އެއީ ސީނު ކަރައިން ގެނައިކަމަށް ބެލެވޭ ބައެއް ތަށި އަދި ރުނބާ އެކަހަލަ އެއްޗިހި ވެސް ފެނިފަ. ދެން ރަށް ގިރާތީވެ އަޅުގަނޑުމެން އިންނާނެ މިހާރު ސަރުކާރުގެ ކަމާ ބެހޭ ފަރާތްތަކަށް ވެސް ސިޓީއެއް ފޮނުވާފަ އެކަމުގަ،" ރަޝީދު ވިދާޅުވި އެވެ.
ހއ. އުތީމުން ރަށް ގިރުމުގެ ސަބަބުން ފެނުނު އާސާރީ ވަޅެއް.-- ފޮޓޯ: އުތީމު ކައުންސިލް
ބޮޑުތަކުރުފާނުގެ ހަނދާނީ މަރުކަޒާއި ސަގާފީ ތަރިކަ ރައްކާތެރިކުރާ ގައުމީ މަރުކަޒާއި ގުޅިގެން އެ ވަޅު ހިމާޔަތްކުރުމަށް މަޝްވަރާކުރަމުންދާ ކަމަށް ރަޝީދު ވިދާޅުވި އެވެ.
ސިފާމް ވެސް ވިދާޅުވީ، އެ ވަޅަށް މިހާރު ވެސް ރާޅު ޖަހަމުންދާކަމަށާއި އަދި ވަޅާއި މޫދާއި ދޭތެރޭ ގާތްގަނޑަކަށް 10 ނޫނީ 15 ވަރަކަށް ފޫޓުކަމަށް އޭނާ ލަފާ ކުރި އެވެ.
"އެއީ މިހާރު ވެސް ރާޅު ޖަހާ ވަޅު ތެރެޔަށް. އެހެންވެ. ދެން ރަށް ގިރަމުންދާ ވަރަކަށް އެ ވަޅު ގެއްލިގެން ދިޔުމުގެ ބިރު ވެސް އޮތުމުން، ވިހާ ވެސް އަވަހަށް ހިމާޔަތްކުރެވޭތޯ މި ބަލަނީ. ދެން އެއީ ކައުންސިލުން އަދާކުރަން ޖެހޭ ކަމެއް. އެކަމަކު އަޅުގަނޑުމެން ވާނެ އެދިފަ މިހާރު ވެސް، އެއީ އުތީމަކީ އާސާރީ ގޮތުން ރާއްޖޭގައި ވަރަށް މުއްސަނދި ރަށެއް ވީމައާ އެއްކޮށް، ރަށު ރައްޔިތުން ވެސް އެފަދަ ތަންތަނަށް ވަރަށް ލޯބިޖެހި އަމިއްލައަށް ވެސް އެފަދަ ތަންތަން ހިމާޔަތްކުރަން މަސައްކަތް ކުރާތީ،" ސިފާމް ވިދާޅުވި އެވެ.
