އައްޑޫ ސިޓީ މީދޫގެ އިސް މެޖިސްޓްރޭޓް މުހައްމަދު ތައްޔިބު އިޖުރާއަތާ ހިލާފު ބަންދުގެ އަމުރެއް ނެރުމުގެ ސަބަބުން ޖުޑިޝިއަލް ސާވިސް ކޮމިޝަނުން އޭނާގެ މައްޗަށް ސުލޫކީ ފިޔަވަޅު އަޅަން ނިންމައިފި އެވެ.
އެ މައްސަލައިގަ ޖޭއެސްސީން ނެރުނު ބަޔާނެއްގައި ބުނެފައިވަނީ ތައްޔިބުގެ މައްޗަށް އަޅާ ފިޔަވަޅުގެ ގޮތުގައި ޖޭއެސްސީން ނިންމީ އެ ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމަށެވެ. އެ ކޮމިޝަނުން އެ ގޮތަށް ނިންމެވީ ސެޕްޓެމްބަރު 29 ވަނަ ދުވަހު ބޭއްވި އެ ކޮމިޝަނުގެ ބައްދަލުވުމެއްގަ އެވެ.
ޖޭއެސްސީގެ ބަޔާނުގައި ބުނެފައިވަނީ މީދޫ އިސް މެޖިސްޓްރޭޓާ ދެކޮޅަށް ހުށަހެޅިފައިވާ މައްސަލައިގައި ސުލޫކީ ފިޔަވަޅު އަޅަން ނިންމާފައިވަނީ މީދޫ ކޯޓުން ބެލި މައްސަލައެއްގައި ދައުވާ ރައްދުވާ ފަރާތް "ގޭގައި" ބަންދުކޮށްފައި ބެހެއްޓުމަށް ކުރި އަމުރަކީ ގާނޫނު އަސާސީގެ 142 ވަނަ މާއްދާއާއި، 143 ވަނަ މާއްދާގެ (ރ) އާ ހިލާފަށް ކުރި އަމުރެއްކަމަށް ވާތީ އެވެ.
ބަންދުގައި ބަހައްޓަންޖެހޭކަމަށް ފަނޑިޔާރަށް ފެންނަ މީހަކު ގޭގައި ބަންދުކޮށްފައި ބެހެއްޓުމަށް އަމުރުކުރުމަކީ ޖިނާއީ އިޖުރާއަތުގެ ގާނޫނުން ފަނޑިޔާރަށް ލިބިދޭ އިހުތިޔާރެއް ނޫނެވެ. އެ ގާނޫނު އޮތްގޮތުން މީހަކު ބަންދުގައި ބެހެއްޓޭނީ ކަސްޓޯޑިއަލް ނުވަތަ ރިމާންޑް ޖަލެއްގަ އެވެ.
ޝަރީއަތުން ހުކުމެއް ކުރުމުގެ ކުރިން މީހުން ބަންދުކޮށްފައި ބައިތިއްބަންޖެހޭ ކަމަށް ފެންނަ ހާލަތުތަކުގައި ގޭގައި ބަންދުކުރުމަކީ ޖިނާއީ އިޖުރާއަތުގެ ގާނޫނަށް އަމަލުކުރަން ފެށުމުގެ ކުރިން އަމަލުކުރަމުން ގެންދިޔަ އުސޫލެކެވެ. އެ ގާނޫނަށް އަމަލުކުރަން ފެށި ފަހުން ވެސް މީހަކު ގޭގައި ބަންދުކޮށްފައި ބެހެއްޓުމަށް ކްރިމިނަލް ކޯޓުން އަމުރުކުރި އެވެ.
އެ މައްސަލަ ދިވެހިރާއްޖޭގެ ހައިކޯޓަށް ހުށަހެޅުމުން އެ ކޯޓުން ކަނޑައަޅުއްވާފައި ވަނީ ގޭގައި މީހުން ބަންދުކުރުމަކީ ކުރިން އަމަލުކުރަމުން ދިޔަ ގޮތެއް ނަމަވެސް، ޖިނާއީ އިޖުރާއަތުގެ ގާނޫނަށް އަމަލުކުރަން ފެށުމަށްފަހު، މީހަކު ގޭގައި ބަންދުކުރުމަށް އަމުރުކުރުމަކީ ފަނޑިޔާރަށް ލިބިގެންވާ އިހުތިޔާރެއް ނޫން ކަމަށެވެ.
މެޖިސްޓްރޭޓް ތައްޔިބު ކުރި އަމުރު ގާނޫނުއަސާސީއާ ހިލާފްވާކަމަށް ޖޭއެސްސީން ފާހަގަކުރާ، ގާނޫނު އަސާސީގެ 142 ވަނަ މާއްދާގައި ބުނަނީ ފަނޑިޔާރުން މައްސަލަތަކުގައި އަމަލުކުރަން ޖެހޭނީ ގާނޫނުއަސާސީ، ގާނޫނު އަދި އިސްލާމީ ޝަރީއަތާއި އެއްގޮތަށް ކަމަށް އަދި ކަންކަން ނިންމާންވާނީ ވަކިފަރާތަކަށް ބުރަނުވެ، ވަކިފަރާތަކުން ދައްކައިފާނެ ބިރަކަށް ޖެހިލުންނުވެ ކަމަށެވެ.
ގާނޫނުއަސާސީގެ 143 ވަނަ މާއްދާގެ (ރ) ގައި ބަޔާން ކުރަނީ، މަތީ މަރުހަލާގެ ކޯޓުތަކުން ނިންމާ ނިންމުންތަކަށް ދަށު ކޯޓުތަކުން އަމަލުކުރަން ވާނެ ކަމަށެވެ.
ޖޭއެސްސީގެ ބަޔާނުގައި ބުނެފައި ވަނީ މެޖިސްޓްރޭޓް ތައްޔިބުގެ އަމުރަކީ ފަނޑިޔާރުންގެ ގާނޫނާއި ފަނޑިޔާރުންގެ ސުލޫކީ މިންގަނޑު އަދި ޖޭއެސްސީ ގާނޫނާ ވެސް ހިލާފު އަމުރެއް ކަން ފާހަގަވެފައިވާ ކަމަށެވެ.
އެހެންކަމުން އެ މައްްސަލައިގަ ތައްޔިބަށް ނަސޭހަތްދީ، ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރުމަށް އަންގަން ނިންމާފައިވާކަމަށް ޖޭއެސްސީގެ ބަޔާނުގައި ބުނެފައި ވެއެވެ.
