މި އަހަރުގެ އިންޓަނޭޝަނަލް މޯލްޑިވްސް ޓްރެވަލް މާކެޓް (އައިއެމްޓީއެމް) ފަށައިފި އެވެ.
މި އަހަރުގެ ފެއާ ކުރިއަށް ގެންދަނީ އައިއެމްޓީއެމް އެއާ ވާޗުއަލް ޕްލެޓްފޯމް މެދުވެރިކޮށެވެ. ފެއާ ކުރިއަށް ދާނީ އޮކްޓޫބަރު 26ން 28ށް ތިން ދުވަހުގެ މުއްދަތަކަށެވެ.
ފެއާ ފެށުމަށް އިއްޔެ ބޭއްވި ވާޗުއަލް ހަފުލާގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް އާއި ބަންގްލަދޭޝްގެ ހައި ކޮމިޝަނަރު ރިއާ އެޑްމިރަލް ނަޒްމު ހަސަން ބައިވެރިވެވަޑައިގެންނެވި އެވެ.
އޭގެ އިތުރުން މޯލްޑިވްސް މީކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މެނޭޖިން ޑިރެކްޓަރު ތޮއްޔިބު މުހައްމަދު މި ހަފުލާގައި ބައިވެރިވެވަޑައިގެންނެވި އެވެ.
ހަފުލާގައި ވާހަކަދައްކަވަމުން ޓޫރިޒަމް މިނިސްޓަރު ވަނީ ބައިނަލްއަގުވާމީ މާކެޓަކީ ވާދަވެރި މާކެޓެއް ކަމަށާއި މިމާކެޓުގައި އެންމެ ކުރީސަފުގައި ރާއްޖެ ހުރުން މުހިންމުކަމަށް ވިދާޅުވެފަ އެވެ.
މިފަދަ ފެއާތަކުގެ މުހިންމުކަން ފާހަގަކުރައްވާ މިނިސްޓަރު ވިދާޅުވީ އައިއެމްޓީއެމް އަކީ ބައިނަލްއަގުވާމީ މާކެޓުގެ އެންމެ ކުރީ ސަފުގައި ރާއްޖެ ހުރުމަށް މުހިންމު ރޯލެއް ކުޅޭނެ ފެއާއެއް ކަމަށެވެ.
އައިއެމްޓީއެމްއަކީ ދުނިޔޭގެ ހުރިހާ ކަންކޮޅުތަކެއްގެ ޓުއާ އޮޕަރޭޓަރުންނާއި، ޓްރެވަލް އެޖެންސީތަކާއި، ޑެސްޓިނޭޝަން މެނޭޖްމަންޓް ކުންފުނިތަކުގެ އިތުރުން ހުރިހާ ޓޫރިޒަމް ދާއިރާގައި ހަރަކާތްތެރިވާ އެހެނިހެން ވިޔަފާރިތަކަށް ރާއްޖޭގެ ޓޫރިޒަމް ވިޔަފާރިތަކާ ގުޅިގެން ހުރި ފުރުސަތުތައް ހޯދައިދޭން ބާއްވާ ފެއާއެކެވެ.
މިއީ އަހަރަކު އެއް ފަހަރު ބާއްވާ ބީ2ބީ ފެއާގެ ހަތަރު ވަނަ އެޑިޝަނެވެ.
މި އަހަރުގެ ފެއާގައި ދުނިޔޭގެ 20 ގައުމަކުން 100 އަށް ވުރެ ގިނަ ވިޔަފާރިއަކާއި 400 ޓްރޭޑް ވިޒިޓަރުން ބައިވެރިކުރުމަށް އައިއެމްޓީއެމް އިން ވަނީ އަމާޒުހިފައިފަ އެވެ.
