އަންހެނުން ގޮވައިގެން ސައިކަލްގައި ދުއްވާފައި ދަނިކޮށް، ދިއެފްއެމް ރޭޑިއޯގެ ކުރީގެ ސީއީއޯ އަދި މޯލްޑިވްސް މީޑިއާ ކައުންސިލް (އެމްއެމްސީ)ގެ ކުރީގެ މެމްބަރު މަސްއޫދު ހިލްމީގެ ބޮލުގައި ދަގަނޑު ބުރިއަކުން ޖަހައި، ޒަހަމްކޮށްލި މައްސަލާގައި ތުހުމަތުވާ މީހާ ޝަރީއަތް ނިމެންދެން ބަންދުކޮށްފި އެވެ.
މަސްއޫދަށް ހަމަލާ ދީފައިވަނީ މިދިޔަ އޮގަސްޓް މަހުގެ ހަތަރުވަނަ ދުވަހުގެ ރޭ ލ. ފޮނަދޫގަ އެވެ. ސޯޝަލް މީޑިއާގައި އާންމުވި ވީޑިއޯއިން މަސްއޫދު ސައިކަލެއްގައި ދަނިކޮށް އެހެން ސައިކަލެއްގައި އައި މީހަކު އޭނާއަށް ހަމަލާދިނުމަށް ފަހު، ފިލި މަންޒަރު ފެނެ އެވެ.
މި މާރާމާރީގެ މައްސަލާގައި އެރޭ ދަންވަރު އަހްމަދު ޝަމީމް، 36 ފުލުހުންގެ ބެލުމުގެ ދަށަށް ގެނައި އެވެ.
ދެ ފަހަރެއްގެ މަތިން ބަންދުގެ މުއްދަތު އިތުރުކުރުމަށްފަހު, ފޮނަދޫ މެޖިސްޓްރޭޓް ކޯޓުން އޭނާ ދޫކޮށްލީ ބަންދުގައި ބަހައްޓަންޖެހޭ ސަބަބެއް ނެތް ކަމަށް ކަނޑައަޅައި އެވެ.
ނަމަވެސް އެ މައްސަލަ އަލުން ބަލާ، އޭނާގެ ބަންދާ މެދު ގޮތެއް ނިންމުމަށް ފޮނަދޫ މެޖިސްޓްރޭޓް ކޯޓަށް ހައިކޯޓުން އަމުރުކުރުމުންވެސް އެ ނިންމުމަށް ބަދަލު ގެނެސްފައެއް ނުވެ އެވެ.
އަހްމަދު ޝަމީމް މަސްއޫދަށް ހަމަލާދޭ މަންޒަރު ދައްކުވާދޭ ވީޑިއޯއެއްގެ ސްކީންޝޮޓެއް--
އެއާއެކު ދަށު ކޯޓުގެ ހުކުމް ބާތިލްކޮށް، ހައިކޯޓުން އިއްޔެ ކުރި ހުކުމުގައި ވަނީ މި މައްސަލާގައި ތުހުމަތު ކުރެވޭ މީހާ ބަންދުން ދޫކޮށްލުމުގައި އޭނާގެ ފަރާތުން މުޖުތަމައުއަށް ނުރައްކާވެދާނެ ކަމަށް ރިއާޔަތްކޮށްފައި ނެތް ކަމަށެވެ.
އަދި ދޫކޮށްލާފައިވާ މުއްދަތުގައި އޭނާގެ ފަރާތުން އެފަދަ އަމަލެއް ނުފެނުމަކީ މުޖުތަމައުއަށް ނުރައްކާވުމުގެ އިހުތިމާލު ނެތް ކަމެއް ނޫން ކަމަށެވެ.
މި މައްސަލަ ބެއްލެވީ ފަނޑިޔާރު ޝުއައިބު ހުސައިން ޒަކަރިއްޔާ ރިޔާސަތުގައި އިންނަވައިގެން ފަނޑިޔާރު އަބްދުއްރައޫފް އިބްރާހިމް އަދި ފަނޑިޔާރު މުހައްމަދު ފައިސަލް އާއި އެކު، ތިން ފަނޑިޔާރުންގެ ބެންޗަކުންނެވެ.
މަސްއޫދުގެ ކާރުގައި ރޯކޮށްލާފައި.
ދެވަނަ ފަހަރަށް ދައުލަތުން އެ މައްސަލަ ހައި ކޯޓުގައި އިސްތިއުނާފް ކުރުމުން އިއްޔެ ހައި ކޯޓުން އަމުރުކޮށްފައިވަނީ ޝަރީއަތް ނިމެންދެން ޝަމީމް, ރިމާންޑް ޖަލެއްގައި ބަންދުކުރުމަށެވެ.
މިދިޔަ ޑިސެމްބަރު މަހުގެ ތެރޭގައި މަސްއޫދުގެ ކާރުގައި ރޯކޮށްލައި ބޭނުން ނުކުރެވޭ ވަރަށް ކާރު އަންދާލި އެވެ. އެކަމުގެ ތުހުމަތު ވެސް ކުރަނީ އަހްމަދު ޝަމީމުއަށެވެ. މިހާރު މި މައްސަލަ އޮތީ ޑިއުޓީ ޕްރޮސެކިއުޝަންގެ މަރުހަލާގަ އެވެ.
