މިއަދަކީ މިހާރު ދުބާއީގައި ކުރިއަށްދާ އެކްސްޕޯ 2020 ގައި ރާއްޖެއަށް ހާއްސަކޮށްފައިވާ ދުވަހެވެ.
އޮކްޓޫބަރު 1 އިން އަންނަ އަހަރުގެ މާޗު މަހުގެ ނިޔަލަށް ކުރިއަށްދާ އެކްސްޕޯގައި ރާއްޖޭގެ އޮނާ ޑޭ ފާހަގަކުރުމަށް މިއަދު ހާއްސަ ހަފުލާއެއް ވަނީ ބާއްވާފަ އެވެ. މި ހަފުލާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ބައިވެރިވެވަޑައިގަތް ވާހަކަ ދައްކަވާފަ އެވެ.
އެމަނިކުފާނު ވަނީ މިއެކްސްޕޯ އަކީ ރާއްޖޭގެ ތަރައްގީއަށް ވަރަށް މުހިންމު ހަރަކާތެއް ކަމަށް ފާހަގަކުރައްވާފަ އެވެ.
ރާއްޖޭގެ އޮނާ ޑޭ ފާހަގަކުރުމުގެ ގޮތުން މުޅި އެކްސްޕޯގެ ސައިޓުގައި ރާއްޖޭގެ އެކިއެކި ސަގާފީ ހަރަކާތްތަށް ދަނީ ކުރިއަށް ގެންދަމުންނެވެ.
"ކަނެކްޓިން މައިންޑްސް، ކްރިއޭޓިން ދަ ފިއުޗާ" މި ޝިއާރުގެ ދަށުން ކުރިއަށް ގެންދާ އެކްސްޕޯގެ އަމާޒަކީ، އިންގިލާބީ އީޖާދުތަކާއި ތަފާތު ހިޔާލުތައް، އެއްތަނަކުން ދައްކައި ދިނުމެވެ. އަދި މި ހިޔާލާއި ވިސްނުމުގެ ތެރެއިން، އިންސާނިއްޔަތަށް ހެޔޮ ބަދަލުތަކެއް ގެނައުމަށް މަގުފަހި ކޮށްދިނުމަކީ މި އެކްސްޕޯގެ އެއް އަމާޒެވެ.
ދުބާއީ އެކްސްޕޯ 2020 ގައި ރާއްޖޭގެ ޕެވިލިއަން. -- ފޮޓޯ:އަދަދު
އެކްސްޕޯ 2020 ގެ ތިން ޑިސްޓްރިކްޓްގެ ތެރެއިން، ރާއްޖޭގެ ޕެވީލިއަން ގާއިމުކޮށްފައި ވަނީ "ސަސްޓައިނަބިލިޓީ" ޑިސްޓްރިކްޓަގަ އެވެ. ރާއްޖެގެ ޕެވީލިއަނުން ރަމްޒުކޮށްދޭ ރީތި ގުދުރަތީ މަންޒަރުތަކުގެ އިތުރުން، ރާއްޖޭގެ ތަރައްގީގެ ދަތުރުގައި ބޭނުންކުރާ ދެމެހެއްޓެނިވި ތަރައްގީގެ ވިސްނުމާއި ސިޔާސަތުތަކާއި، ރާއްޖޭގެ ތާރީހާއި ސަގާފަތް ދައްކައިދޭނެ އެވެ.
އެކްސްޕޯގެ ފުރަތަމަ ހަފުތާ ނިމިގެން ދިޔަ އިރު، ރާއްޖޭގެ ޕެވީލިއަނަށް ދައުލަތުގެ އިސް ބޭފުޅުން ވަނީ ޒިޔާރަތް ކުރައްވާފަ އެވެ. އޭގެ ތެރޭގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޔޫއެންޖީއޭ ގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު އަދި އެންވަޔަރޮމެންޓް މިނިސްޓަރު އާމިނަތު ޝައުނާ ހިމެނިވަޑައިގަންނަވަ އެވެ.
ދުބާއީ އެކްސްޕޯ 2020 ގައި ރާއްޖޭގެ ޕެވިލިއަންގެ ތެރެއިން. -- ފޮޓޯ:އަދަދު
މި އެކްސްޕޯގައި 200 އަށް ވުރެ ގިނަ ގައުމުން ބައިވެރިވެ އެވެ. މިއީ ރާއްޖޭގެ މިއުޒިކް، ސަގާފަތް، އެންމެ ފަހުގެ ޓެކްނޮލޮޖީއާއި އީޖާދުތަކުގެ އިތުރުން އިނޮވޭޝަންތައް ދުނިޔޭގެ އެކި ގައުމުތަކަށް ދައްކާލަން ލިބުނު ރަނުގެ ފުރުސަތެކެވެ.
ކޮންމެ ހަފުތާއަކުވެސް ރަސްމީ ބަންދު ދެ ދުވަސް ފިޔަވައި، ކޮންމެ ދުވަހެއްގެ ހެނދުނު 10:00 އިން ރޭނގަޑު 10:00 އަށް އެކްސްޕޯ ކުރިއަށްގެންދެ އެވެ. ހަފްތާ ބަންދު ދެ ދުވަހު އެކްސްޕޯ ކުރިއަށް ގެންދަނީ ހެނދުނު 10:00 އިން މެންދަމު 02:00 އަށެވެ.
މި އަހަރުގެ އެކްސްޕޯއަށް 18 އަހަރުން ދަށުގެ ކުޑަކުދިންނާއި ކިޔަވާ ކުދިންނާއި ދުވަސްވީ މީހުން އަދި ނުކުޅުދެންތެރިކަން ހުރި މީހުނަށް ހިލޭ ވަދެވޭގޮތަށް ވަނީ އިންތިޒާމުކޮށްފަ އެވެ.
