ޕެރިސް (އޮކްޓޫބަރު 25) - ފްރެންޗް ލީގުގައި ރޭ ޕީއެސްޖީ ކުޅުނު މެޗުން ރަށުންބޭރުގައި ވަރުގަދަ މާސޭއާ ލަނޑެއް ނުޖެހި 0-0 އިން އެއްވަރުވެއްޖެ އެވެ.
މި ނަތީޖާއާ އެކު ޕީއެސްޖީ އެއް ވަނައިގައި އޮތީ 11 މެޗުން 28 ޕޮއިންޓް ހޯދައިގެންނެވެ. ރޭ މެޓްޒް އަތުން 4-1 އިން މޮޅުވި ލެންސް އޮތީ 11 މެޗުން 21 ޕޮއިންޓް ހަމަކޮށްގެން ދެ ވަނައިގަ އެވެ. އަމިއްލަ ދަނޑުގައި 3-2 އިން ލިޔޯން ބަލިކުރި ނީސް ވަނީ ތިން ވަނަ އަށް ޖެހިލައިފަ އެވެ. އެއީ 10 މެޗުން 19 ޕޮއިންޓް ހޯދައިގެންނެވެ. ހަތަރެއްގައި އޮތް މާސޭ އާއި ފަހެއްގައި އޮތް ރެނެސް އަށް ވަނީ 18 ޕޮއިންޓް ލިބިފަ އެވެ. މާސޭ އަށް ވުރެ ރެނެސް އެއް މެޗު އިތުރެވެ.
މާސޭ ދަނޑުގައި ރޭ ކުޅުނު މެޗުގައި ނޭމާ ޖެހި ޝޮޓެއް ސަލާމަތް ކުރަން އުޅުމުގެ ތެރޭގައި ލުއާން ޕެރޭޒް އަތުން ބައިކޮޅަށް ގޯލެއް ވަނެވެ. އެކަަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައި އެ ގޯލު ބަލައިނުގަންނަން ނިންމި އެވެ. އެއީ ނޭމާ އޮފްސައިޑްގައި ހުރުމުންނެވެ.
އޭގެ ފަހުން މާސޭގެ ޕޮލެންޑް ފޯވާޑް އާކަންޑިއުޝް މިލިކް ވަނީ އެ ޓީމަށް ގޯލެއް ޖަހައިދީފަ އެވެ. ވީއޭއާރް އިން މި ގޯލު ބަލައިނުގަންނަން ނިންމީ މިލިކަށް އެ ގޯލު ޖަހަން ފުރުސަތު ތަނަވަސްކޮށްދިން ޕޯލް ލިރޯލާ އޮފްސައިޑް ވުމުންނެވެ.
ޕީއެސްޖީގެ ލިއޮނަލް މެސީ ބޮލުން ޖެހި ބޯޅައެއް ކީޕަރު ޕައު ލޮޕޭޒް އަތުގައި ޖެހިފައި ބޭރުވީ ހުރަސްދަނޑީގައި ވެސް ޖެހިފަ އެވެ. މާސޭގެ ޗެންގިޒް އުންޑެއާ ޖެހި ޝޮޓެއް ދިޔައީ އަރިމަތިން ބޭރުންނެވެ.
މެޗުގެ ދެ ވަނަ ހާފުގައި އުންޑެއާ އަށް ކުރި ފައުލަކަށް ޕީއެސްޖީގެ ފުލްބެކް އަޝްރަފް ހަކީމީ އަށް ވަނީ ރަތް ކާޑެއް ދައްކައިފަ އެވެ. މެޗުގެ ފަހު 30 ވަރަކަށް މިނިޓް ޕީއެސްޖީން ކުޅުނީ އެއް ކުޅުންތެރިއަކު މަދުކޮށެވެ.
މި މެޗުގެ ދެ ހާފްގައި ވެސް ރެފްރީ އަށް އެކި ފަހަރުމަތިން މެޗު ހުއްޓާލަން ޖެހުނެވެ. އެއީ ސަޕޯޓަރުންގެ ހަރަކާތްތައް ހުރި ގޮތުންނެވެ. ޕީއެސްޖީގެ ނޭމާ ކޯނަރުނަގަން ދިޔަތަނުން ފުޅިފަދަ ތަކެތި ދަނޑަށް އުކިިއިރު، ދެ ވަނަ ހާފްގައި ސަޕޯޓަރަކު ވަނީ މެސީ ގައިގައި އަތްލަން ދަނޑަށް އަރައިފަ އެވެ.
