ރާއްޖޭގެ އޮޑިޓާ ޖެނެރަލް އޮފީހާއި އިންޑިއާގެ ކޮމްޕްޓްރޯލާ އެންޑް އޮޑިޓާ ޖެނެރަލާ އެކު ޕަބްލިކް އޮޑިޓިން ދާއިރާއިން ގުޅުން ވަރުގަދަކޮށް ގުޅިގެން މަސައްކަތްކުރަން އެއްބަސްވުމެއްގައި މިއަދު ސޮއިކޮށްފި އެވެ.
ރާއްޖެ އާއި އިންޑިއާގެ އޮޑިޓު އޮފީހުން އޮޑިޓު ދާއިރާއިން އެއް ގައުމު އަނެއް ގައުމަށް އެހީތެރިވުމަށް ފުރަތަމަ އެއްބަސްވުމެއްގައި ސޮއިކުރީ 2008 ގަ އެވެ. މިއަދު ސޮއި ކުރީ އެ އެއްބަސްވުން އާކުރާށެވެ.
ރާއްޖެއާ އިންޑިއާ ދެމެދު ވެފައިވާ އެއްބަސްވުމުގެ ދަށުން ދެ ފަރާތަށް ފައިދާވާ ގޮތަށް ޕަބްލިކް އޮޑިޓިންގައި ބޭނުންކުރާ އުކުޅުތަކާއި މައުލޫމާތު ހިއްސާކުރާނެ އެވެ. އަދި މުވައްޒަފުންގެ ކެޕޭސިޓީ އިތުރުކުރަން ޓްރެއިނިން ޕްރޮގްރާމްތައް ހިންގުމަށް ވެސް ވަނީ ހަމަޖެހިފަ އެވެ.
އޮޑިޓް އޮފީހުގައި ބޭއްވި ރަސްމިއްޔާތެއްގައި އެ އޮފީހުގެ ފަރާތުން ސޮއިކުރެއްވީ އޮޑިޓާ ޖެނެރަލް ހުސެއިން ނިޔާޒީ އެވެ. އަދި އިންޑިއާގެ ފަރާތުން ސޮއިކުރެއްވީ އޮޑިޓާ ޖެނެރަލްގެ ދައުވަތަކަށް މިހާރު ރާއްޖެ އައިސްގެން އުޅުއްވާ އެ ގައުމުގެ ކޮމްޕްޓްރޯލާ އެންޑް އޮޑިޓާ ޖެނެރަލް ގިރީޝް ޗަންދްރާ މުރްމޫ އެވެ.
މި އެއްބަސްވުމާ ގުޅިގެން ނިޔާޒީ ވިދާޅުވި ގޮތުގައި މިއީ މިހާރު ވެސް ދެ ގައުމު ގުޅިގެން މި ދާއިރާއިން ކުރަމުންދާ މަސައްކަތްތައް އިތުރަށް ފުރިހަމަކަމެއް ދާނެ އެވެ. އަދި ވިދާޅުވީ އޮޑިޓު ދާއިރާގެ މަސައްކަތްތައް ފުޅާކޮށް ގާބިލިއްޔަތު އިތުރުކުރަން ބޭނުންޖެހިފައި އޮތް ވަގުތެއްގައި މި ލިބުނީ ބޭނުންކުރަން މުހިންމު ފުރުސަތެއް ކަމަށެވެ.
ނިޔާޒީ ވިދާޅުވީ ރާއްޖޭގެ އޮޑިޓަރުންގެ ފެންވަރު ރަނގަޅުކުރަން އިންޑިއާއިން ފަންޑުކޮށްގެން ހިންގާ ޓްރެއިނިން ޕްރޮގްރާމްތަކުގައި ބައިވެރިވުމުގެ ފުރުސަތު ކުރިން ވެވުނު އެއްބަސްވުމުގެ ދަށުން ވެސް ލިބުނު ކަމަށެވެ. އަދި އުއްމީދަކީ މި އެއްބަސްވުމާ އެކު އިތުރު ފުރުސަތުތަކެއް ލިބިގެން ދިޔުން ކަން ފާހަގަކޮށް އޭނާ ވަނީ އޮޑިޓު ދާއިރާއަށް އިންޑިއާއިން ވެދީފައިވާ އަދި ވަމުންދާ އެހީތެރިކަމަށް ޝުކުރު އަދާކުރައްވާފަ އެވެ.
އިންޑިއާގެ ކޮމްޕްޓްރޯލާ އެންޑް އޮޑިޓާ ޖެނެރަލް ގިރީޝް ޗަންދްރަ މުރްމޫ އެއްބަސްވުމުގައި ސޮއިކުރަނީ. -- ފޮޓޯ: އޮޑިޓާ ޖެނެރަލް އޮފީސް
މި ރަސްމިއްޔާތުގައި މުރްމޫ ވިދާޅުވީ މި ގުޅުމުން އެންމެ ބޮޑު އިސްކަމެއް ދެނީ މުސްތަގުބަލުގެ ޖީލުތަކާ ހަމައަށް ގުދުރަތީ ވަސީލަތްތައް ފޯރުކޮށްދިނުމުގެ ގޮތުން އދ. އިން އެކުލަވާލީ ދެމެހެއްޓިވިނި ތަރައްގީގެ ލަނޑުދަނޑި (ސަސްޓެއިނަބަލް ޑިވެލޮޕްމަންޓް ގޯލްސް/އެސްޑީޖީ) ތަކަށް ކަމަށެވެ.
މިކަމަށް އަލިއަޅުވާލަމުން މުރްމޫ ވިދާޅުވީ، މިއާއެކު އަލަށް އުފަންވެގެން އުޅޭ އޮޑިޓިން ކޮންސެޕްޓެއް ކަމުގައިވާ ނެޗުރަލް ރިސޯސް އެކައުންޓިން މުހިންމު ކަމަށެވެ. އަދި މި ދާއިރާއިން އިންޑިއާއަށް ލިބިފައިވާ އިލްމާއި ގާބިލިއްޔަތު ރާއްޖެއާ ހިއްސާކުރާނެ ކަމަށް އޭނާ ވިދާޅުވި އެވެ.
އޭނާގެ ކުރިން ވާހަކަ ދެއްކެވި ނިޔާޒީ ވެސް ވަނީ ތިމާވެއްޓާ ގުޅުންހުރި އޮޑިޓިންގެ ދާއިރާގައި ރާއްޖޭގެ ގާބިލިއްޔަތު އިތުރުކުރަން ޖެހޭ ކަމަށް ވިދާޅުވެފަ އެވެ. އެގޮތުން މި އަހަރުގެ ތެރޭގައި ވެސް އިންޑިއާގެ އެހީތެރިކަމާ އެކު މި ދާއިރާއިން ތަމްރީނުވެފައިވާ ކަމަށް އޭނާ ފާހަގަކުރެއްވި އެވެ.
