އަމިއްލަ ފަރާތަކުން އިމާރާތްކޮށް ސަރުކާރަށް ހަދިޔާކުރި ޕްރީސްކޫލް ހުޅުމާލޭގައި މިއަދު ހުޅުވައިފި އެވެ.
މިއަދު ހުޅުވި މުހައްމަދު ގާސިމް ޕްރީސްކޫލަކީ، މުހައްމަދު ގާސިމްގެ ދަރިފުޅު، އަލީ ފިރާގު އޭނާގެ ބައްޕަ މުހައްމަދު ގާސިމްގެ ހަނދާނުގައި އިމާރާތްކުރި ސްކޫލެކެވެ. މި ސްކޫލްގައި 10 ކްލާސްރޫމާއި، ހޯލު އަދި އިދާރީ ހިންގުމަށް ބޭނުންވާ ކޮޓަރިތައް ހިމަނެ އެވެ.
މިއަދު ބޭއްވި ހާއްސަ ހަފުލާއެއްގައި މި ސްކޫލް ރަސްމީކޮށް ހުޅުއްވައިދެއްވީ ނައިބު ރައީސް ފައިސަލް ނަސީމް އެވެ.
ނައިބު ރައީސް ވިދާޅުވީ މި ސްކޫލު ހުޅުމާލޭގައި ހުޅުވިގެން މިދިޔައީ ވަރަށް އެކަށޭނަ ވަގުތެއްގައި ކަމަށެވެ. އެމަނިކުފާނު ވަނީ ހުޅުމާލެ ދެވަނަ ފިޔަވަހީގައި މީހުން އާބާދުވަމުންދާ މިންވަރާ އެކަށީގެންވާ ވަރަށް ސްކޫލްތައް ބިނާކޮށްފައި ނެތުމުން ގިނަ ދަތިތަކަކާ ރައްޔިތުން ކުރިމަތިލާން ޖެހިފައިވާކަމަށްވެސް ވިދާޅުވެފަ އެވެ.
މި ދަތިތަކަށް ހައްލުހޯދައިދުނުމަށް ސަރުކާރުން މިހާރުވެސް ހުޅުމާލޭގައި ދެ ސްކޫލެއް އިމާރާތްކުރުމުގެ މަސައްކަތްކުރަމުންދާކަން ނައިބު ރައީސް ވަނީ ފާހަގަކުރައްވާފަ އެވެ. އަދި މި ސަރުކާރުން އެންމެ ބޮޑު ހޭދައެއް ކުރަނީ ތައުލީމީ ދާއިރާއަށްކަން ފާހަގަކުރައްވާ އެ ދާއިރާ ތަރައްގީކުރުމަށް ސަރުކާރުން ވަރަށް ބޮޑަށް އިސްކަންދޭ ކަމަށް އެމަނިކުފާނު ވިދާޅުވި އެވެ.
ހުޅުމާލޭގައި ހުޅުވި މުހައްމަދު ގާސިމް ޕްރީސްކޫލަކީ އަމިއްލަ ފަރާތަކުން އިމާރާތްކޮށް ސަރުކާރަށް ހަދިޔާކުރި ސްކޫލެއްކަން ފާހަގަކުރައްވާ ނައިބު ރައީސް ވަނީ ތަނަވަސްކަމުގެ އަހުލުވެރިންނަށް މުޖުތަމައަށް ފައިދާހުރި ހެޔޮ ކަމެއްކޮށްދެވެން ފުރުސްތު އޮތް ކޮންމެ ހާލަތެއްގައި އެކަމެއް އެންމެ އެކަށޭނަގޮތަކަށް ކޮއްދެއްވުމަށް ބާރުއަޅުއްވާފަ އެވެ. އަދި މިއީ ދުނިޔެއާއި އާހިރަތުގައިވެސް އޭގެ ސަވާބާއި ދަރުމަ އެމީހަކަށް ލިބޭނެކަމެއް ކަމަށް ވިދާޅުވި އެވެ.
މިއަހަރުގެ އޮގަސްޓް 10 ވަނަ ދުވަހު ތައުލީމުގެ ގާނޫނުގެ ދަށުންވެސް ޕްރީސްކޫލު ތައުލީމަކީ ސަރުކާރުން ހިލޭ ފޯރުކޮށްދޭނެ ޖެހޭ ތައުލީމީ މަރުޙަލާއަކަށް ވަނީ ވެފަ އެވެ. އަދި، ޕްރީސްކޫލް ތައުލީމަކީ މަޖުބޫރު ތައުލީމެއްގެ ގޮތުގައި ކަނަޑައެޅި ގާނޫނުގެ ދަށުން ޕްރީސްކޫލް ތައުލީމު ރާއްޖޭގައި ދިރިއުޅޭ ކޮންމެ ދިވެހި ކުއްޖަކަށް ހިލޭ ފޯރުކޮށްދޭންޖެހެ އެވެ.
