އިންޑިއާއި ރާއްޖެއާއި ދެމެދުވާ ގުޅުން ކުރިއަށް ވުރެ މާ ބޮޑަށްވެސް ވަރުގަދަވެފައިވާ ކަމަށް ޑިފެންސް މިނިސްޓަރު މާރިޔާ ދީދީ ވިދާޅުވެއްޖެ އެވެ.
އިންޑިއާގެ ނޫހެއްގައި ރިޕޯޓުކޮށްފައިވާ ގޮތުން މިދިޔަ ހަފްތާގެ ބުރާސްފަތި ދުވަހު، އެގައުމުގައި މިހާރު ކުރިއަށްދާ ޑިފެންސް ކޮންކްލޭވްގައި މިނިސްޓަރު މިނިސްޓަރު މާރިޔާ ފޮނުވި ވީޑިޔޯ މެސެޖެއް ދައްކާފައި ވެއެވެ.
އެގޮތުން ރާއްޖެ އާއި އިންޑިއާއާ ދެމެދު މިއަދު އޮތް ގުޅުން ކުރިއަށްވުރެ ވަރުގަދަ ކަމަށާއި، އިންޑިއާއަކީ ރާއްޖެއިން ގޮވާލި ކޮންމެ ކަމެއްގައިވެސް އެންމެ އަވަހަށް އެހީތެރިވާ ގައުމު ކަމުގައި މިނިސްޓަރު ވިދާޅުވެފައިވާ ކަމަށް އެ ނޫހުގައި ރިޕޯޓް ކޮށްފައި ވެއެވެ.
ކޯވިޑްގެ ބަލިމަޑުކަމުގެ ތެރޭގައިވެސް ރާއްޖެއަށް އެންމެ ބޮޑު މާލީ އެހީތެރިކަމެއް ލިބިފައި ވަނީ އިންޑިއާއިން ކަން ފާހަގަކޮށް އެކަމަށްޓަކައި މިނިސްޓަރު އިންޑިއާ ސަރުކާރަށް ޝުކުރު އަދާކުރެއްވި ކަމަށްވެސް އެ ނޫހުން ރިޕޯޓުކޮށްފައި ވެއެވެ.
"މިއަދު ރާއްޖެ އާއި އިންޑިއާގެ ގުޅުން ކުރިއަށްވުރެ މާ ބޮޑަށްވެސް ވަރުގަދަ. އެއީ ހަމައެކަނި އަޅުގަނޑުމެންގެ ތާރީހާއި، ތަސައްވުރުތަކުގެ މައްޗަށް ބިނާވެފައިވާ ކަމެއް ނޫން. އިންޑިއާ އަކީ ބޭނުން ޖެހޭ ކޮންމެ ދަނޑިވަޅެއްގައި ވެސް އެންމެ އަވަހަށް އިޖާބަދޭ ގައުމަކީ އިންޑިއާ" އެ ވިޑީޔޯ މެސެޖުގައި މިނިސްޓަރު މާރިޔާ ވިދާޅުވި އެވެ.
މީގެ އިތުރުން މިގައުމުގެ ތަރައްގީގެ ހުރިހާ ދާއިރާއަކުން އިންޑިއާ އިން ވެދެއްވަމުން ގެންދަވާ އެހީތެރިކަމާއި އެއްބާރުލެއްވުމަށްޓަކައި މިނިސްޓަރު ވަނީ ރައީސް އިބްރާހިމް މުހައްމަދު ސޯލިހުގެ ނަންފުޅުގައި އެ ގައުމުގެ ސަރުކާރަށް ޝުކުރު އަދާކުރައްވާފަ އެވެ.
މިނިސްޓަރު ދިވެހި ސަރުކާރުގެ ނަމުގައި އިންޑިއާއަށް ޝުކުރު އަދާކުރައްވާފައި ވަނީ ދިޔަ އަހަރުގެ ސެޕްޓެމްބަރު މަހު އިންޑިއާއިން ރާއްޖެއަށް ދީފައިވާ 250 މިލިއަން ޑޮލަރުގެ މާލީ އެހީތެރިކަމާއި، ދެހާސް ހަތަރު ވަނަ އަހަރު ކުރިމަތިވި ސުނާމީ ކާރިސާގެ އިތުރުން ކޮވިޑް-19 ގެ ބަލިމަޑުކަމާ ދެކޮޅަށް މަސައްކަތް ކުރުމުގައި އިންޑިއާ އިން ލިބުނު މުހިންމު އެހީތެރިކަން ފާހަގަކުރައްވަމުންނެވެ.
މީގެ އިތުރުން، ރާއްޖޭގެ ސަލާމަތާއި ރައްކާތެރިކަމަށް 50 މިލިއަން ޑޮލަރުގެ ޑިފެންސް ލައިން އޮފް ކްރެޑިޓް އެއްބަސްވުމެއްގައި މި އަހަރުގެ ފެބްރުއަރީ މަހު، ދެ ގައުމުން ސޮއިކޮށްފައިވާ ކަމަށްވެސް އެ ނޫހުން ރިޕޯޓްކޮށްފައި ވެއެވެ.
އިންޑިއާ ރާއްޖެއާ އޮންނަ ޒަމާންވީ ގުޅުން ބަދަހިވެފައިވާ ކަމަށް މާރިޔާ ވިދާޅުވެފާއިރު މި ފަހަކަށް އައިސް ރާއްޖޭގައި ހިންގާ ގިނަ މަޝްރޫއުތައް ހިންގަނީ އިންޑިއާގެ އެހީގަ އެވެ.
އެހެންނަމަވެސް ރާއްޖެއާއި އިންޑިއާއި އެކު މިހާރު އޮތް ގާތް ގުޅުމަށް ސިޔާސީ އިދިކޮޅު ފަރާތްތަކުން ގެންދަނީ ވަރަށް ބޮޑަށް ފާޑުކިޔަމުންނެވެ. އަދި އިންޑިއާ ސިފައިން މިގައުމުގައި ތިބި ކަމަށް ބުނެ، އެމީހުން ބޭލުމަށް ގޮވާލާ، މުޒާހަރާ ވެސް ކޮށްފައި ވެއެވެ.
