ބްރަސެލްސް، ބެލްޖިއަމް (އޮކްޓޯބަރު 23) - ކާބަން މަދު އިގްތިސާދަކަށް ޔޫރަޕިއަން ޔޫނިއަން (އީޔޫ) ބަދަލުވަމުން ދާއިރު ހަކަތައިގެ ގޮތުގައި ބޭނުން ވަނީ ގޭހާއި ނިޔުކްލިއާ ކަމަށް ޔޫރަޕިއަން ކޮމިޝަންގެ ރައީސް އުރްސުލާ ވޮން ޑެ ލެޔެން ވިދާޅުވެއްޖެ އެވެ.
މޫސުމީ ބަދަލާ ދެކޮޅަށް މަސައްކަތް ކުރުމަށް އީޔޫ އިން ޖައްވަށް ބޭރު ކުރާ ކާބަންޑައިއޮކްސައިޑް ގޭސް ވަރަށް ބޮޑު ތަނުން މަދުކުރަން ޖެހެ އެވެ. އީޔޫގެ 27 މެމްބަރު ގައުމާއެކު ބޭއްވި ސަމިޓަކަށް ފަހު އުރްސުލާ ވިދާޅުވީ ދެމެހެއްޓެނިވި، ސާފު ހަކަތައާ ދިމާލަށް ދިޔުން މަޖުބޫރު ކަމަށެވެ.
އެކަމަނާ ވިދާޅުވީ ވައި އަދި އިރުގެ އަވިން ހަކަތަ އުފެއްދުމުގެ އަގު ތިރިވެއްޖެ ކަމަށާއި އެއީ އިމްޕޯޓަށް ބަރޯސާނުވެ ހަކަތަ އުފެއްދޭނެ ގޮތެއް ކަމަށެވެ. ނަމަވެސް އީޔޫ އަށް "ހުއްޓުމެއް ނެތި ހަކަތަ ލިބުން" މުހިއްމު ކަމަށާއި އެކަން ވާނީ ގޭހާއި ނިޔުކްލިއާ އިން ކަމަށް ފާހަގަކުރެއްވި އެވެ.
ނިޔުކްލިއާ ހަކަތަ އުފައްދާ ޕްލާންޓުތަކުން ގާތްގަނޑަކަށް އެއްވެސް ކާބަންޑައިއޮކްސައިޑެއް ބޭރު ނުކޮށް އޮޕަރޭޓް ކުރެވެ އެވެ. އޭގެ އިތުރުން ގޭހަކީ ހައިޑްރޯކާބަން ފިޔުލްގެ ތެރެއިން އެންމެ މަދުން ވިހަ ގޭސް ބޭރު ކުރާ އޮޕްޝަނެވެ.
މި އަހަރު ނިމުމުގެ ކުރިން އީޔޫ އަށް ކަނޑައަޅާ "ގްރީން ޓެކްސޮނޮމީ" ޔޫރަޕިއަން ކޮމިޝަނުން ހުށަހަޅަން ޖެހޭނެ އެވެ. "ގްރީން ޓެކްސޮނޮމީ" އަކީ މޫސުމީ ބަދަލާ ދެކޮޅަށް ރަނގަޅު ކަމަށް ބެލެވޭ ހަކަތައިގެ ލިސްޓެކެވެ.
އެ ލިސްޓުގެ އެހީގައި މޫސުމީ ބަދަލާ ދެކޮޅަށް ސާފު ހަކަތަ އުފެއްދުމުގެ ޓެކްނޮލޮޖީ އަށް އިންވެސްޓު ކުރަން ފަސޭހަ ވާނެ އެވެ.
ފްރާންސްގެ ރައީސް އިމޭނުއެލް މެކްރޯން ވިދާޅުވީ މޫސުމީ ބަދަލު ކުޑަކުރަން ކަނޑައަޅާ ލަނޑުދަނޑިތަކަށް ވާސިލްވުމަށް ނިޔުކްލިއާ ހަކަތަ ބޭނުން ކުރުމުގެ މުހިއްމުކަން މިހާރު ވަރަށް ބޮޑަށް ސާފުވެފައިވާ ކަމަށެވެ.
ފްރާންސްގެ ހަކަތައިގެ 70 ޕަސެންޓު އުފައްދަނީ ނިޔުކްލިއާ އިންނެވެ. އެ ގައުމަކީ އެހެން ގައުމުތަކަށް ކަރަންޓު އެކްސްޕޯޓް ކުރާ ގައުމެއް ވެސް މެ އެވެ. ފްރާންސުން ތައްޔާރުވަމުން ދަނީ އަލުން އެޓޮމިކް ޕްލާންޓުތަކުގެ މަސައްކަތް ފެށުމަށެވެ.
ރިޕޯޓުތައް ބުނާ ގޮތުން ޔޫރަޕްގެ ގިނަ ގައުމުތަކުން ބޭނުން ވަނީ "ގްރީން ޓެކްސޮނޮމީ" ގައި ގޭސް އަދި ނިޔުކްލިއާ އެކުގައި ހިމެނުމަށެވެ.
ނަމަވެސް ގޭހުގެ އަގު އުފުލެމުން ދާތީ ފްރާންސާއި އީޔޫގެ 10 ގައުމަކުން މި މަހުގެ ކުރީކޮޅު ނެރުނު ބަޔާނެއްގައި ބޮޑަށް ތާއީދު ކުރީ ނިޔުކްލިއާ ހަކަތަ އަށެވެ.
އެކަމަކު ޖަރުމަނުވިލާތާއި، އޮސްޓްރިއާ އަދި ލަގްޒެމްބޯގުން ބުނެފައި ވަނީ ހަމައެކަނި ނިޔުކްލިއާ ހަކަތަ އަށް ބަރޯސާވުމަކީ ދިގު މުއްދަތުގައި ރޭޑިއޯއެކްޓިވް ނުރައްކާތެރި ކުނީގެ މައްސަލަ ކުރިމަތިކުރުވާނެ ނިންމުމެއް ކަމަށެވެ.
