ހުޅުމާލެ ދެވަނަ ފިޔަވަހީގައި ބޯހިޔާވަހިކަމަށް ހިންގި ހިޔާ މަޝްރޫގެ ދަށުން އިމާރާތްކޮށްފައިވާ ފްލެޓުތަކުގެ ކުލީގެ ގޮތުގައި ކުރީ ސަރުކާރުގެ ހައުސިން މިނިސްޓްރީން ކަނޑައެޅި 6،600ރ. އަކީ ގޯސް ހިސާބެއް ކަމަށް އެ މަޝްރޫގެ އޮޑިޓުން ދައްކައިފި އެވެ.
ހިޔާ ފްލެޓުގެ ކުލީގެ މައްސަލައިގައި މި ސަރުކާރުން ކަނޑައެޅި އަދަދު ބޮޑުވެގެން ގިނަ ބަޔަކު އަންނަނީ ޝަކުވާކުރަމުންނެވެ. އަދި ކުރީ ސަރުކާރުން ކަނޑައެޅި އަގުގައި ފްލެޓުތައް ހަވާލުކުރުމަށް ވެސް އެ ފްލެޓުތައް ލިބުނު މީހުން އަންނަނީ ސަރުކާރަށް ގޮވާލަމުންނެވެ.
އެކަމަކު ސަރުކާރުން ބުނަނީ އެ މަޝްރޫއަށް ހިންގާފައިވާ ހަރަދަށް ބަލާއިރު އެކަން ކުރެވެން ނެތް ކަމަށެވެ.
އެގޮތުން އެޗްޑީސީން އެންމެ ފުރަތަމަ މި ފްލެޓުގެ ކުލީގެ ގޮތުގައި ހުށަހެޅީ 11،000ރ. އެވެ. ނަމަވެސް ސަރުކާރުން ބައެއް ހަރަދުތަކަށް ޒިންމާވާ ގޮތަށް ފަހުން ކުލި ކުޑަކޮށް، މިހާރު ފްލެޓެއްގެ ކުއްޔަކީ 7،500ރ. އެވެ.
ހިޔާ މަޝްރޫއަށް ހިނގި ހަރަދުތަކާއި ކުލި ކަނޑައެޅުނު ގޮތާ ގުޅިގެން އާންމުކުރި އޮޑިޓުގައި ބުނީ އެޗްޑީސީން ކުލީގެ ގޮތުގައި ފުރަތަމަ ކަނޑައެޅި 11،000ރ. އަކީ މިފަދަ ހައުސިން މަޝްރޫތަކަށް އާންމުކޮށް ބޭނުންްކުރާ އީއެމްއައި މެތަޑުން މީގެ ފްލެޓަކަށް ޖެހޭ އަގު ކަމަށެވެ.
އޭގެ ބަދަލުގައި ކުރީ ސަރުކާރުގެ ހައުސިން މިނިސްޓްރީން މި ފްލެޓުތަކުގެ ކުލި ކަނޑައެޅީ އެ މިންގަނޑުން ބޭރުން ކަމަށާއި، އެއީ އެ މަޝްރޫއަށް ނެގި ލޯނާއި، ލޯނު ރީފައިނޭންސިން ހަރަދާއި، އިންޓްރެސްޓް ދައްކަން ހިނގާނެ ކޭޝްފްލޯއަށް ރިއާޔަތްނުކޮށް ޖެހި ހިސާބެއް ކަމަށް އޮޑިޓުގައި ފާހަގަކުރި އެވެ.
މީގެ ސަބަބުން ޔުނިޓަކުން ފައިނޭންސްގެ ގޮތުގައި ލިބޭ އަދަދު ކުޑަވެ ބޮޑު ގެއްލުމެއް ފޫބައްދަން ޖެހުނީހެވެ. އެގޮތުން 6،600ރ. ރޭޓުން ކުލި ނަގާނަމަ، ކޮންމެ ޔުނިޓަކުން 1.1 މިލިއަން ރުފިޔާ ގެއްލުން ވާނެ ކަމަށް އޮޑިޓުން ދައްކަ އެވެ.
މިއީ ހުރިހާ ޔުނިޓަކަށް ހިސާބުކޮށްލުމުން ގާތްގަނޑަކަށް 7.9 ބިލިއަން ރުފިޔާގެ ގެއްލުމެކެވެ.
އޭގެ އިތުރުން ކުލީ ބޮޑުކަމުގެ ޝަކުވާތަކާއެކު މިފަހުން މާލެ ސިޓީ ކަައުންސިލުން ފްލެޓެއްގެ ކުލީގެ ގޮތުގައި ހުށަހެޅި 5،548ރ. އަކީ އީއެމްއައި މެތަޑު ބޭނުންކޮށްގެން ކަނޑައެޅި އަގެއް ނަމަވެސް އެ ހިސާބުތައް ޖެހީ ލޯނުގެ ލައިބޯ ރޭޓު ކުޑަކޮށް ޖަހައިގެން ކަމަށް އޮޑިޓުގައި ބުންޏެވެ.
މާލެ ސިޓީ ކައުންސިލުން ލައިބޯ 0.06 ޕަސެންޓުގައި ހިސާބުކުރި ނަމަވެސް، އަަސްލު ލައިބޯ ހުރީ 1.7 ޕަސެންޓުގައި ކަމަށް އެ ރިޕޯޓުގައި ބުންޏެވެ.
މިކަންކަން ފާހަގަކޮށް އޮޑިޓާ ޖެނެރަލް ދެއްވި ލަފާާގައި ވިދާޅުވީ، މުސްތަގުބަލުގައި ވެސް ލޯނު ނަގައިގެން ހިންގާ މިފަދަ މަޝްރޫތަކުގައި އާންމުކޮށް ބޭނުންކުރާ އީއެމްއައި މެތަޑް ބޭނުންކޮށްގެން އަގު ކަނޑައެޅުމަށެވެ.
