ރާއްޖޭގެ ގައުމީ ފުޓްބޯޅަ ޓީމުން ހދ. ކުޅުދުއްފުށީގައި ހާއްސަ މެޗެއް ކުޅޭ ގޮތަށް ހަމަޖެހިއްޖެ އެވެ.
އަންނަ ހޮނިހިރު ދުވަހު ހަވީރު ކުޅުދުއްފުށީގައި ކުޅޭ މި މެޗަކީ އެ ރަށުގައި ސަރުކާރުގެ ފަރާތުން އެޅި ޓާފް ދަނޑު ހުޅުވުމުގެ ގޮތުން ރޭވި މެޗެއް ކަަމަށް ކުޅުދުއްފުށި ސިޓީ ކައުންސިލުން މައުލޫމާތު ދެ އެވެ. ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވެސް މި ރަސްމިއްޔާތުގައި ބައިވެރިވެވަޑައިގަންނަވާނެ އެވެ.
ގައުމީ ޓީމާ ދެކޮޅަށް ކުޅޭ މެޗަށް ނުކުންނާނީ ކުޅުދުއްފުށްޓައް ނިސްބަތްވާ ޓީމެކެވެ. މިއީ ގައުމީ ފުޓްބޯޅަ ޓީމުން މި މަހު 1-16 އަށް މާލޭގައި ކުރިއަށް ދިޔަ އުރީދޫ ސާފް ޗެމްޕިއަންޝިޕަށް ފަހު ކުޅޭނެ ފުރަތަަމަ މެޗެވެ.
އެފްއޭއެމުން ބުނީ ކުޅުދުއްފުށީގައި ކުޅޭ މެޗަށް ގެންދާނީ 23 ކުޅުންތެރިންގެ ސްކޮޑެއް ކަމަށެވެ. ސާފް ޗެމްޕިއަންޝިޕްގައި ކުޅުނު ގައުމީ ޓީމުގެ ސްކޮޑަށް ކޮންމެ ވެސް ވަރެއްގެ ބަދަލުތަކެއް އަނިޔާ އާއި އެހެނިހެން ކަންތައްތަކެއްގެ ސަބަބުން އަންނާނެ އެވެ. އެ ގޮތުން ބަހްރޭންގައި ކުރިއަށްދާ 23 އަހަރުން ދަށުގެ ކޮލިފައިން މެޗުތަކަށް ފުރަން ޖެހޭތީ ކުޅުދުއްފުށީ ދަތުރުގައި ކޯޗު އަލީ ސުޒޭން އާއި ޒުވާން ޑިފެންޑަރު ހައިޝަމް ހަސަން (ބިޑި) ބައިވެރިނުވާނެ އެވެ.
ސާފަށް ފަހު ދެން ގައުމީ ޓީމުން އެންމެ އަވަހަށް ކުޅޭ މުބާރާތަކީ އަންނަ މަހު 8-17 އަށް ސްރީ ލަންކާގައި ބާއްވާ މަހިންދުރަ ރާޖަޕަކްސަ ފޯ ނޭޝަންސް ކަޕްގަ އެވެ. ކުޅުދުއްފުށީ މެޗަށް ފަހު އާދިއްތަ ދުވަހު މާލެ އައިސް ގައުމީ ޓީމުގެ ޕްރެކްޓިސް ފަށާނީ 25 ވަނަ ދުވަހު އެވެ.
2017 ވަނަ އަހަރުގެ މިނިވަން ޗެމްޕިއަންޝިޕްގެ މެޗެއްގެ ތެރެއިން ކުޅުދުއްފުށީ ސަޕޯޓަރުން.-- ފޮޓޯ: އައިވެލް ޕޯޓްރެއިޓް
ގައުމީ ޓީމުން އެންމެ ފަހުން މި ގޮތަށް ރަށެއްގެ ދަނޑު ހުޅުވަން ކުޅުނީ ބ. އޭދަފުށީގަ އެވެ. އެއީ 2019 ވަނަ އަހަރު މާޗް މަހުގަ އެވެ. އެ މެޗުގައި ގައުމީ ޓީމުގައި ހިމެނޭ އޭދަފުށީ ކުޅުންތެރިން ކުޅުނީ އަމިއްލަ ރަށު ޓީމަށެވެ.
ފުޓްބޯޅައިގެ ފޯރި ގަދަ ރަށެއްގެ ގޮތުގައި ފާހަގަކުރެވޭ ކުޅުދުއްފުށީގައި ވަނީ މީގެ ފަސް އަހަރު ކުރިން 2015 ވަަނަ އަހަރު ޕްރެޒިޑެންޓްސް ކަޕްގެ އެއް ގްރޫޕެއްގެ މެޗުތައް ކުޅެފަ އެވެ.
އެ ގޮތުން ނިއު ރޭޑިއަންޓާއި ބީޖީ ސްޕޯޓްސް ކްލަބާއި ޓީސީ ސްޕޯޓްސް ކްލަބް އަދި މަހިބަދޫ ސްޕޯޓްސް ކްލަބް ވާދަކުރި ގްރޫޕްގެ މެޗުތައް ބޭއްވީ ކުޅުދުއްފުށީގަ އެވެ. އޭގެ އިތުރުން އަތޮޅުތަކަށް ހުޅުވާލައިގެން ބޭއްވި މިނިވަން ޗެމްޕިއަންޝިޕްގެ ޒޯން ބުރުގެ ފައިނަލް މެޗު ވެސް އެ ރަށުގައި ކުޅެފައިވެ އެވެ.
ކުޅުދުއްފުށި ފުޓްބޯޅަ ސަޕޯޓަރުންގެ މެދުގައި މަގުބޫލް "ވައިކިން ކްލެޕް"ގެ ފޯރިގަދަވެ، ގައުމީ ޓީމުން 2016 ވަނަ އަހަރު ކުޅުނު ހާއްސަ މެޗަކަށް ވެސް ވަނީ އެ ސަޕޯޓަރުންނަށް ދައުވަތު ދީފަ އެވެ. އެއީ 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ޓީމާއި 2016 ވަނަ އަހަރު އޮތް ގައުމީ ޓީމުން ބައްދަލުކުރި މެޗުގަ އެވެ.
