މޫސުމީ ހިޖުރައިގައި ރާއްޖެއަށް އައި ގުޑުގުޑާ ދޫނިތައް (ފްލެމިންގޯ) އާއްމުން ހިފައި، ވިއްކާކަމުގެ ޝަކުވާތަކާއި ކަންބޮޑުވުންތަކެއް ފެންމަތިވެފައިވަނިކޮށް، އެގޮތަށް ބަޔަކު ހިފާފައި އޮތް ގުޑުގުޑާ ދޫންޏެއް ސަލާމަތްކޮށް، އެ ދޫނި ޅ. އަތޮޅުގެ މާކޯ ކުޅިއަށް ރިހެބިލިޓޭޓްކުރަން ބަދަލުކުރުމުގެ މަސައްކަތް އެންވަޔަރަންމެންޓް ޕްރޮޓެކްޝަން އެޖެންްސީ (އީޕީއޭ) އިން ފަށައިފި އެވެ.
އީޕީއޭއިން ބުނިގޮތުގައި ފުލުހުން އެ ދޫނި ސަލާމަތްކޮށްފައިވަނީ ހއ. ބާރަށުންނެވެ. އެހެން ނަމަވެސް އެ ދޫނީގެ ފިޔަ ކޮށާފައިހުރުމުން، އެ ދޫންޏަށް ނުއުދުހެވޭނެތީ، އެއާއެކު ރާއްޖެއަށް އައި އެހެން ދޫނިތަކާއެކު އަބުރާ ދިޔުމުގެ ފުރުސަތު ނޯންނާނެތީވެ، އެ ދޫނި މިހާރު ރައްކާތެރި ސަރަހައްދަކަށް ބަދަލުކުރުމުގެ މަސައްކަތް ދަނީ ކުރަމުންނެވެ.
އީޕީއޭއިން ބުނި ގޮތުގައި އެ ދޫނި ބަދަލުކުރަން މަސައްކަތްކުރާ ޅ. މާކޯ އަކީ މިނިސްޓްރީ އޮފް ޑިފެންސްގެ ބެލުމުގެ ދަށުގައި އޮންނަ ރަށެކެވެ. އަދި އެޓޮލް ވޮލަންޓިއާޒްގެ ޖަނަވާރުގެ ކަންކަމުގައި ހަރަކާތްތެރިވާ ޑޮކްޓަރެއް އެ ދޫނީގެ ފަރުވާގެ ކަންކަމުގައި ހަރަކާތްތެރިވާނޭކަމަށް ވެސް އީޕީއޭއިން ބުނެ އެވެ.
މީގެ ދެ ދުވަހެއް ކުރިން، ބާރަށުން ބަޔަކު ގުޑުގުޑާ ދޫނިތަކެއް ހިފައިގެން 30،000ރ. އަށް ވިއްކަން މަސައްކަތް ކުރަމުންދާ ކަމަށް ބައެއް މީޑިއާތަކުން ވަނީ ރިޕޯޓްކޮށްފަ އެވެ. އެހެންނަމަވެސް އެރަށުން ސަލާމަތްކުރީ ވިއްކަން ޖަހާފައި އޮތް ދޫނި ކަމެއް އަދި ޔަގީނެއް ނުވެ އެވެ.
ގުޑުގުޑާ ދޫނި ހިފައިގެން ވިއްކަން އުޅޭ މައްސަލަ ފުލުހުންނާ ގުޅިގެން ތަހުގީގުކުރަމުން އަންނަ ކަމަށް އީޕީއޭއިން ވަނީ މީގެ ކުރިން ބުނެފަ އެވެ.
އެ ދޫންޏަކީ ރާއްޖޭގައި އާންމުކޮށް ދިރިނޫޅޭ ދޫންޏެއް ނަމަވެސް، ކޮންމެ އަހަރެއްގެ ހިޖުރާކުރާ ދުވަސްވަރު ރާއްޖޭގެ ޗަސްބިމާއި ކުޅިތައް ހުންނަ ސަރަހައްދުތަކުން މި ދޫނިތައް އާންމުކޮށް ފެނެ އެވެ.
މި ދޫނިތަކަކީ ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ހިމާޔަތްކޮށްފައިވާ ދޫނިތަކެކެވެ.
