ވޮޝިންޓަން، އެމެރިކާ (އޮކްޓޯބަރު 21) - ޓްވިޓާ އާއި ފޭސްބުކް އިން ބޭރުކޮށްފައި ވާތީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް މުޅިން އާ ސޯޝަލް ނެޓްވޯކެއް އުފައްދަން ނިންމަވައިފި އެވެ.
"ޓްރުތް ސޯޝަލް" ގެ ވެރިފަރާތަކީ ޓްރަމްޕް މީޑިއާ އެންޑް ޓެކްނޮލޮޖީ ގްރޫޕެވެ. އެ ނެޓްވޯކުން ދައުވަތުދޭ ޔޫޒާޒްއާ އެކު އަންނަ މަހު ބީޓާ ވާޝަން ލޯންޗު ކުރާނެ އެވެ. އެޕަލްގެ އެޕް ސްޓޯރުން މިހާރު ވެސް ޕްރީއޯޑާ ކުރެވޭނެ ކަމަށް ޓްރަމްޕްގެ ކުންފުނިން ނެރުނު ބަޔާނެއްގައި ބުންޏެވެ.
އޭގެ އިތުރުން ސަބްސްކްރައިބްކޮށްގެން ހިދުމަތް ލިބޭ ވީޑިއޯ އޮން ޑިމާންޑް ޕްލެޓްފޯމެއް ލޯންޗުކުރާނެ ކަމަށް ވެސް ޓްރަމްޕްގެ ކުންފުނިން ބުނެ އެވެ. އެ މަސައްކަތުގައި އުޅޭނީ "އެމެރިކާޒް ގޮޓް ޓެލެންޓް" ގެ އެގްޒެކްޓިވް ޕްރޮޑިއުސަރު ސްކޮޓް ސެއިންޓް ޖޯން އެވެ.
ޓްރަމްޕްގެ ރައީސްކަމުގެ ދުވަސްވަރު އެކި ފަރާތްތަކަށް ބަހުގެ ހަމަލާ ދިނުމަށް ވަރަށް ބޮޑަށް ސޯޝަލް މީޑިއާ ބޭނުންކުރެއްވި އެވެ. ނަމަވެސް މިދިޔަ ޖެނުއަރީ މަހުން ފެށިގެން ސޯޝަލް މީޑިއާ ޕްލެޓްފޯމްތަކުން ވަނީ އެމަނިކުފާނުގެ އެކައުންޓުތައް ސަސްޕެންޑުކޮށްފަ އެވެ.
ޓްވިޓާ އާއި ފޭސްބުކް އިން ޓްރަމްޕްގެ އެކައުންޓުތައް ހިންގުން މަނާކުރީ އެމަނިކުފާނުގެ ސަޕޯޓަރުން އެމެރިކާގެ ކެޕިޓަލް އިމާރާތުގެ ތެރެއަށް ވަދެގަނެ، ހިންގި ހަމަނުޖެހުމަށް ފަހު އެވެ. ސޯޝަލް މީޑިއާ ކުންފުނިތަކުން ތުހުމަތު ކުރި ގޮތުގައި ޓްރަމްޕް ވަނީ ހަމަނުޖެހުމަށް ހިތްވަރު ލިބޭ ފަދަ ވާހަކަ ދައްކަވާފަ އެވެ.
މިދިޔަ އަހަރުގެ ރިޔާސީ އިންތިހާބުގައި ދެ ވަނަ ދައުރަކަށް ރައީސް ކަމަށް ކުރިމަތިލައިގެން ނާކާމިޔާބީއާ ކުރިމަތިވެވަޑައިގެންނެވި ޓްރަމްޕް ވަނީ 2024 ގައި ވެސް ރައީސް ކަމަށް ވާދަކުރައްވާނެކަމުގެ އިޝާރާތެއް ދެއްވައިފަ އެވެ.
