ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އައްމަޓީ) ގެ އެއްބަނޑު އެއްބަފާ ދައްތައާއި ކޮއްކޮ ޖާމިނު ކުރުމަށްފަހު ކަފާލާތުގެ ދަށުން އޭނާ އިއްޔެ ދޫކޮށްލި މައްސަލައިގައި ޕްރޮސެކިއުޓާ ޖެނެރަލް ހުސެއިން ޝަމީމް މިއަދު ވަރަށް ބޮޑަށް ހިތްހަމަނުޖެހުން ފާޅުކުރައްވައިފި އެވެ.
ޝަމީމް މިއަދު ކުރެއްވި ޓްވީޓެއްގައި ވިދާޅުވީ ގާނޫނުގައި، ކަފާލާތުގައި ދޫކުރާއިރު ޖާމިނުކުރާނެ ވަކި ގޮތެއް އޮއްވާ، އެނޫން ގޮތްގޮތަށް މައްސަލަ ނިންމީމާ ޖެހެނީ ހައިކޯޓުގައި އިސްތިއުނާފުކުރަން ކަމަށެވެ. އަދި އިއްޔެ މައްސަލަ ބެލި ކްރިމިނަލް ކޯޓުގެ ގާޒީ ހަސަން ސައީދަށް އިޝާރާތްކުރައްވައި ޝަމީމް ވިދާޅުވީ "ދަށުކޯޓުގެ ހަމަ އެންމެ ފަނޑިޔާރަކަށް، ޖާމިނުކުރެވޭގޮތް ސާފުވެވަޑައިގެންފައި ނެތުމަކީ އެންމެންގެ ވަގުތު ގެއްލޭކަމަކަށްވެއްޖެ" ކަމަށެވެ.
ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑަބަރޭ) ޖާމިނުކޮށް، ޖިންސީ ގޯނާގެ މައްސަލައިގެ ތުހުމަތުކުރެވިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ދޫކޮށްލީ ވެސް ހަސަން ސައީދެވެ.
ޝަމީމް ވިދާޅުވީ "ޖާމިނުވުމުގެ މަފްހޫމް ފަނޑިޔާރަށް ކިޔައިދެވޭތޯ، ތަފާތު ދެ މައްސަލައެއްގައި ލައްކަ މަސައްކަތް ކުރެވިއްޖެ" ކަމަށެވެ.
"އަދި މިއުޅެނީ ކާމިޔާބު ނުވެގެންނެވެ. ޤާނޫނުގައި އެކަން ވަރަށް ސާފުކޮށް އެބަ އޮތް މެއެވެ،" އޭނާ ޓްވީޓްކުރެއްވި އެވެ.
އެންމެ ފަހުން ބޭއްވި ބަންދު މުރާޖާގެ އަޑުއެހުމުގައި، އައްމަޓީ ދޫކޮށްފި ނަމަ މުޖުތަމައުގެ މަސްލަހަތު ގެއްލި، ކުށް ކުރުމަށް ހިތްވަރު ލިބޭނެ ކަމަށް ގާޒީ ހަސަން ސައީދު ވިދާޅުވި ނަމަވެސް، އިއްޔެ އޭނާ ދޫކޮށްލާފައި ވަނީ ހާލަތު ބަދަލުވެއްޖެ ކަމަށް ކަނޑައަޅައިފަ އެވެ.
ނަމަވެސް އައްމަޓީއަކީ ކުރިންވެސް ފިލައިގެން ރާއްޖޭން ބޭރުގައި ދިގު މުއްދަތަކަށް އުޅެފައިވާ މީހެއްކަމުގައި ފާހަގަކޮށް އޭނާ ދޫކޮށްލުމަށް ދައުލަތުން އިންކާރުކުރި އެވެ. ޝަމީމް މިއަދު އެ އިއުލާންކުރެއްވީ އެ މައްސަލަ އިސްތިއުނާފްކުރާނެ ކަމެވެ.
