ލަންޑަން (21 އޮކްޓޯބަރު) - ނިއުކާސަލް ޔުނައިޓަޑްގެ ކޯޗުކަމުން ސްޓީވް ބްރޫސް ވަކިކޮށް އިޓަލީގެ ރޯމާގެ ކުރީގެ ކޯޗު ޕައުލޯ ފޮންސެކާއާ އެކު މަޝްވަރާތައް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ނިއުކާސަލް އިން ވަނީ ބްރޫސް، 60، މަގާމުން ވަކިކޮށްފައިވާކަން އިއްޔެ ރަސްމީކޮށް އިއުލާންކޮށްފަ އެވެ. ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ދާދި ފަހުން ނިއުކާސަލް ގަތުމާ އެކު، ބްރޫސް އެ މަގާމުން ވަކިކުރާނެ ކަމަށް ކުރިން ވެސް އޮތީ ބެެލެވިފަ އެވެ. އެކަމަކު، ބްރޫސް ވަކިކުރީ އެކަށީގެންވާ ވަރަށް ވަގުތު ނުދީ ކަމަށް އިނގިރޭސި ފުޓްބޯޅައިގެ ކުރީގެ ކުޅުންތެރިން އަންނަނީ ބުނަމުންނެވެ.
ނިއުކާސަލްގެ ކޯޗުކަމުގައި ބްރޫސްގެ ފަހު މެޗަކަށްވީ މިދިޔަ އާދިއްތަ ދުވަހު އަމިއްލަ ދަނޑުގައި 3-2 އިން ޓޮޓެންހަމް ހޮޓްސްޕާ އަތުން ނިއުކާސަލް ބަލިވި މެޗަށެވެ. މިއީ އިނގިރޭސި ލީގުގައި ބްރޫސްގެ 100 ވަނަ މެޗެވެ.
ފާއިތުވި ދެ ސީޒަންގައި ބްރޫސްގެ އިރުޝާދުގެ ދަށުން ނިއުކާސަލް ރެލިގޭޝަނުން ސަލާމަތްވި އެވެ. އެކަމަކު، ބްރޫސް އެ ޓީމު ލައްވައި ކުޅުވާ ޑިފެންސިވް ސްޓައިލްގެ ސަބަބުން، ސަޕޯޓަރުންގެ ފާޑުކިއުން އޭނާ އަށް އަމާޒުވި އެވެ. އިނގިރޭސި ލީގުގައި މި ސީޒަންގައި ނިއުކާސަލް ކުޅުނު އަށް މެޗުން، އަދި މޮޅެއް ނުލިބެ އެވެ.
ރޯމާ އަށް ކުރިން ކޯޗުކޮށްދިން ފޮންސޭކާ: ނިއުކާސަލް އިން ފެނުމުގެ ފުރުސަތު ބޮޑު.
މީޑިއާ ރިޕޯޓްތަކުން ބުނާގޮތުގައި ނިއުކާސަލް އިން ވަނީ ޕޯޗުގަލް އަށް ނިސްބަތްވާ ކޯޗު ފޮންސެކާއާ އެކު މަޝްވަރާތައް ފަށައިފަ އެވެ. ފޮންސެކާ ވަނީ ކުރިން ޝަކްޓާ ޑޮނެޓްސްކް އަދި ޕޯޓޯ އަށް ވެސް ކޯޗުކޮށްދީފަ އެވެ. މި ސީޒަން ފެށުމުގެ ކުރިން ޓޮޓެންހަމާ ހަވާލުވާން އެ ޓީމާ ވެސް ވާހަކަދެއްކި އެވެ.
މީގެ އިތުރުން، ބޯންމައުތުގެ ކުރީގެ ކޯޗު އެޑީ ހޯވް އާއި ބޮރޫޝިއާ ޑޯޓްމަންޑްގެ ކުރީގެ ކޯޗު ލޫސިއަން ފާވޭ އަކީ ވެސް ނިއުކާސަލްގެ ލިސްޓުގައި ތިބި ދެ ކޯޗުން ކަމަށް މީޑިއާ ރިޕޯޓްތަކުން ބުނެ އެވެ. އަދި ރޭންޖާސްގެ ކޯޗަކަށް ހުރި ލިވަޕޫލްގެ ކުރީގެ ކެޕްޓަން ސްޓީވެން ޖެރާޑާއި ޗެލްސީ އަށް ކުރިން ކޯޗުކޮށްދިން ފްރޭންކް ލަމްޕާޑަކީ ވެސް ނިއުކާސަލުން ފާރަލަމުން އަންނަ ކޯޗުންނެވެ.
މީޑިއާ ރިޕޯޓްތަކުން ބުނާގޮތުގައި ނިއުކާސަލްގެ އާ ކޯޗަކަށް ފޮންސެކާ ފެނުމުގެ ފުރުސަތު ބޮޑެވެ. ދެހާސް ހަތް ވަނަ އަހަރު ކޯޗިން ކެރިއަރު ފެށި ފޮންސެކާ އަކޯ، އެޓޭކިން ސްޓައިލަކަށް އިސްކަންދޭ ކޯޗެކެވެ. -- އޭއެފްޕީ
