ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6 ގައި ބޮން ގޮއްވި މައްސަލައިގައި ދައުވާ ކުރާ މީހުންގެ ތެރެއިން ފަހުމީ އަލީއަކީ ވެރިކަން ކުރާ މައި ޕާޓީ އެމްޑީޕީގެ މެމްބަރެއް ކަމަށާއި ކުރީގެ ރައީސްއާ ދޭތެރޭގައި އޭނާގެ އެއްވެސް އަދާވާތްތެރިކަމެއް ނެތް ކަމަށް ކޯޓުގައި ބުނެފި އެވެ.
ނަޝީދު އަވަހާރަކޮށްލުމަށް ސައިކަލެއްގައި ބޮމެއް ހަރުކޮށް، ރިމޯޓް ބޭނުންކޮށްގެން އެ ގޮއްވާލި މައްސަލައިގައި ކްރިމިނަލް ކޯޓުގައި އިއްޔެ ބޭއްވި ޝަރީއަތުގައި ފަހުމީގެ އިތުރުން އަލީ ހައިޝަމް އާއި މުހައްމަދު ނާޒިމް އާއި އިސްހާގުގެ މައްޗަށް ކުރާ ދައުވާތައް ވަނީ އިއްވައިފަ އެވެ.
ގޮއްވާލި ސައިކަލުގައި ބޮން ހަރުކުރިއިރު ފާރައަށް ހުރި ކަމަށް ތުހުމަތު ކުރެވޭ ފަހުމީގެ މައްޗަށް ކުރާ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ އުފުލުމުން އޭނާގެ ވަކީލު ވިދާޅުވީ ފަހުމީއަކީ ހަރުކަށި ފިކުރުގެ މީހެއް ނޫން ކަމަށެވެ. އަދި ވިދާޅުވީ އޭނާއަކީ ނަޝީދު ރައީސްކަން ކުރައްވާ އެމްޑީޕީގެ މެމްބަރެއް ކަމަށާއި އެއްވެސް އިރެއްގައި އެމަނިކުފާނާމެދު ފަހުމީގެ ހިތުގައި އަދާވާތްތެރިކަމެއް ނެތް ކަމަށެވެ.
އޭގެ އިތުރުން، ފަހުމީގެ އަނބިމީހާއަކީ ބަލިވެ ބަނޑަށް ހަތް މަސްވެފައިވާ މީހެއް ކަމަށާއި ދިރިއުޅެނީ މުސްކުޅި ބައްޕައަކާއެކު އެކަނި ކަމަށްވާތީ ފަހުމީ ގޭ ބަންދަށް ދޫކޮށްލަދިނުމަށް ވެސް އޭނާގެ ވަކީލު އެދިވަޑައިގަތެވެ.
ނަމަވެސް ކޯޓުން ނިންމީ މައްސަލައިގައި ހިމެނޭ އެންމެން ވެސް ބަންދުގައި ބެހެއްޓުމަށެވެ. ފަހުމީގެ ފަރާތުން ބަންދަށް އިއުތިރާޒް ކުރި ނަމަވެސް ނާޒިމް އާއި އިސްހާގުގެ ފަރާތުން ބަންދުގައި ބެހެއްޓުމާމެދު އިއުތިރާޒެއް ނުކުރެ އެވެ.
ރިމޯޓު ބޭނުންކޮށްގެން ބޮން ގޮއްވާލި އަދުހަމް އަހުމަދަށް ރިމޯޓު ދިން ކަމަށް ތުހުމަތު ކުރެވޭ ނާޒިމްގެ މައްޗަށް ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އުފުލުމުން ދައުވާތަކުގެ އުންސުރުތަކާއި ވާގިޔާތައް ސާފުނުވާ ކަމަށް ބުނެ އޭނާގެ ވަކީލު އެކަން ފާހަގަ ކުރެއްވި އެވެ.
ދައުވާ ލިޔެފައި އޮތް އިރު ކޮމާ ޖަހާފައި ހުރި ގޮތާއި އިބާރާތްކޮށްފައި ހުރި ގޮތުގައި މައްސަލައެއް އުޅޭ ކަމަށް ފަނޑިޔާރުންގެ ބެންޗުން ވެސް ފާހަގަ ކުރެއްވި އެވެ.
ނަމަވެސް އެކި ފަހަރުމަތިން ދައުލަތުގެ ވަކީލުން ވަނީ ނާޒިމްގެ މައްޗަށް ކުރާ ދައުވާތައް ސަބަބާއެކު ސާފުކޮށްދީފަ އެވެ. އިއްޔެގެ އަޑުއެހުމަށް ވަކީލަކާއެކު ހާޒިރުވި ނަމަވެސް އޭނާގެ މައްޗަށް ކުރާ ޓެރަރިޒަމްގެ އަމަލެއް ރޭވުމާއި އެފަދަ އަމަލެއްގައި ބައިވެރިވުމާއި ގޮވާތަކެތި އުފުލުމުގެ ދައުވާތަކަށް އެއްޗެއް ނުބުނެ އެދިފައި ވަނީ ހެކި އެނަލައިޒް ކުރުމުގެ ފުރުސަތަކަށެވެ.
އަލީ ހައިޝަމްގެ ފަރާތުން ވަކީލެއް އައްޔަންކޮށްފައި އޮތް ނަމަވެސް ވަކީލު އިއްޔެގެ އަޑުއެހުމަށް ހާޒިރުވެފައެއްނުވެ އެވެ. އެހެންކަމުން ދައުވާއަށް އިންކާރު ކުރުން ފިޔަވައި އިތުރު ވާހަކައެއް އޭނާގެ ފަރާތުން ނުދެއްކި އެވެ.
އިއްޔެގެ އަޑުއެހުމުގައި ކްރިމިނަލް ކޯޓުގެ އެ މައްސަލަ ބައްލަވާ ތިން ފަނޑިޔާރުންގެ ބެންޗުން ވަނީ މައްސަލައިގައި ހިމެނޭ ހެކިތައް ވަޒަން ކުރުމުގެ ފުރުސަތު ހުރިހާ ދިފާއީ ވަކީލުންނަށް ވެސް ދީފަ އެވެ. އަދި މައްސަލައިގައި ހިމެނޭ މީހުންގެ ވީޑިއޯތައް އެނަލައިޒް ކުރުމަށް ދައުވާ ލިބޭ މީހުން ކޯޓަށް ހާޒިރުކޮށް ވަކީލާއެކު އެ މަސައްކަތް ކުރުމުގެ ފުރުސަތު ދެއްވާނެ ކަމަށް ބެންޗުން ވިދާޅުވި އެވެ.
ދައުވާ ލިބޭ ބައެއް ފަރާތްތަކުން އެދުނީ މައްސަލައިގައި ފުލުހުން އެއްކޮށްފައިވާ ވީޑިއޯތައް ހާޑް ޑިސްކެއްގައި ދިނުމަށެވެ. އެގޮތަށް ވީޑިއޯތައް ދިނުމަށް ދައުލަތުން އިއުތިރާޒެއް ނުކުރެ އެވެ. އަދި އެދުނީ ދެ ޓެރަބައިޓްގެ ހާޑް ޑިސްކެއް ދިނުމަށްފަހު ވީޑިއޯތައް އެއަށް ކޮޕީ ކުރުމަށް މަދުވެގެން ފަސް ދުވަސް ދިނުމަށެވެ.
ވީޑިއޯ އެނަލައިޒް ކުރުމަށް ހަމަހަމަ ފުރުސަތެއް ނެތް ކަމަށް ބުނެ އެ އަޑުއެހުމުގައި އިސްހާގުގެ ފަރާތުން ބެންޗަށް ޝަކުވާ ހުށަހެޅި އެވެ. އެގޮތުން ދައުލަތުން އެ ވީޑިއޯތައް އެނަލައިޒް ކުރީ 20 ސްޕެޝަލިސްޓު ފުލުހުން ބޭނުންކޮށްގެން ނަމަވެސް އިސްހާގުގެ ފަރާތުން އެ މަސައްކަތް ކުރަން ހުރީ އޭނާ އެކަނިކަން ދިފާއީ ވަކީލު ފާހަގަ ކުރެއްވި އެވެ.
އިއްޔެގެ އަޑުއެހުމަށް ދައުވާ ލިބޭ މުޖާޒް އަހުމަދާއި ތަހުމީން އަހުމަދު ވެސް ހާޒިރު ކުރި އެވެ. އެމީހުންގެ މައްޗަށް މީގެ ކުރިން ބޭއްވި ޝަރީއަތުގައި ދައުވާ އުފުލުމުން އޮތީ އިންކާރުކޮށްފަ އެވެ. ތަހުމީނުގެ ފަރާތުން މިހާތަނަށް ވެސް ދިފާއި ހެކި ހުށަހަޅާފައިނުވާތީ ފަނޑިޔާރުން އެކަމާ ގުޅޭ ގޮތުން ސުވާލު ކުރި އެވެ. ތަހުމީނުގެ ވަކީލު އެ މައްސަލައިގެ ބާވަތުން ހެކި ބަސް ދިނުމަށް މީހުން އިންކާރު ކުރަމުންދާ ކަމަށެވެ. ނަމަވެސް ހެކިން ހޯދަން ފުރުސަތެއް ދިނުމަށް އެދިވަޑައިގަތެވެ.
މި ދައުވާތައް ކުރިއަށްދާއިރު ޝަރީއަތަށް ލެޕްޓޮޕް ކޮމްޕިއުޓަރެއް ވެއްދުމުގެ ހުއްދަ ދައުލަތުން އޮތީ މީގެ ކުރީގެ އަޑުއެހުމުގައި އެދިފަ އެވެ. ޝަރީއަތުގެ މަޖިލިސް ރެކޯޑު އަދި ބްރޯޑްކާސްޓް ނުކުރުން ފަދަ ޝަރުތުތަކަކާއެކު ކްރިމިނަލް ކޯޓުން އިއްޔެ ދައުލަތަށް އެ ފުރުސަތު ފަހިކޮށްދިނުމެވެ. އަދި ޕީޖީ އޮފީހުގެ ޑޭޓާބޭސް އަށް ވަނުން ފިޔަވައި އެހެން މަސައްކަތެއް ކޮމްޕިއުޓަރުން ނުކުރުމަށް ވެސް ކޯޓުން ޝަރުތު ކުރި އެވެ.
މެއި 6، ގައި ބޮން ގޮއްވި މައްސަލައިގައި މިއަދު އަދުހަމްގެ މައްޗަށް ވެސް ޝަރީއަތް ހިންގި އެވެ. ނަމަވެސް ކުށަށް އިއުތިރާފްވެފައިވާތީ އޭނާގެ ޝަރީއަތް ކުރިއަށްގެންދިޔައީ ވަކިންނެވެ. އަދި އަދުހަމުގެ ބައި ސިއްރުކުރުމަށްވެސް މީގެ ކުރިން ކޯޓުން އޮތީ ނިންމާފަ އެވެ.
އެމީހުންގެ އިތުރުން ބޮން ގޮއްވި މައްސަލައިގައި ހއ. މޮޅަދޫ، ބަހާރުގެ، އަބްދުﷲ އަލިމަނިކާއި ހއ. ހޯރަފުށި، އަލަނާސިގެ، މުހައްމަދު ތަސްލީމްގެ މައްޗަށް ދައުވާ ކުރުމަށް މިއަދު ޕީޖީ އޮފީހުން ވަނީ ކޯޓަށް ހުށަހަޅައިފަ އެވެ.
