ނެޓްފްލިކްސް އިން މި މަހުގެ އަށް ވަނަ ދުވަހު ރިލީޒްކުރި 'ހައުސް އޮފް ސީކްރެޓްސް' ބަލައި ނިންމާލި ކޮންމެ މީހަކަށްވެސް ކުރެވެނީ އެއް އިހުސާސްއެކެވެ. ނުތަނަވަސްކަމެވެ.
ތިން އެޕިސޯޑުގެ މައްޗަށް ހަދާފައިވާ މި ސީރީޒްއަކީ 2018 ވަނަ އަހަރުގެ ޖުލައި އެކެއްގައި، އިންޑިއާގެ ވެރިރަށް ނިއު ދިއްލީގެ ބުރާރީ ސަރަހައްދުގައި ދިރިއުޅުނު 11 މެންބަރުންގެ އާއިލާއެއް ދަންޖެހުނު ހާދިސާގެ މައްޗަށް ތައްޔާރުކޮށްފައިވާ ކްރައިމް ޑޮކިއު ސީރީޒް އެކެވެ.
ލީނާ ޔާދާވް އުފައްދާފައިވާ މި ސީރީޒް އަށް ބޮޑު ތަރުހީބެއް އަންނަނީ ލިބެމުންނެވެ. ބުރާރީ ކޭސްގެ ނަންދެވުނު މި ކޭސް އަކީ މުޅި އިންޑިއާ އާއި ސަރަހައްދީ ގިނަ ގައުމުތައް ސިއްސުވާލި ހާދިސާއަކަށް ވާއިރު، ސީރީޒްގައި ވަނީ މި މައްސަލައިގެ ވަރަށް ފުނަށް ދަތުރުކޮށްފަ އެވެ.
އެކްސިޑެންޓަލް ޑެތްއެއްގެ ގޮތުގައި ކްލެސިފައި ކުރެވުނު މި ކޭސްއަކީ ނަފްސާނީ މައްސަލައެއްގެ ސަބަބުން ދިމާވި ކަމެއް ކަމަށް ތަހުގީގުން ހާމަވެ އެވެ.
ޗަންޑަވަޓް އާއިލާ -- ފޮޓޯ:ނެޓްފްލިކްސް
މި މައްސަލަ ދިމާވިގޮތާއި މިކަން މެދުވެރިވި ގޮތް ވަރަށް ފުރިހަމައަށް ސީރީޒްގައި ދައްކުވައިދީފައިވެ އެވެ. މިގޮތުން އާއިލާގެ އެންމެ ހަގަށް ހުރި ލަލިތުއަކީ ޒުވާން ފުރައިގައި އެކްސިޑެންޓެއްވެ ބޮލަށް ގެއްލުން ވެފައިވާ ފަރާތެކެވެ. އޭގެ ސަބަބުން އޭނާގެ އުޅުމަށްވެސް އަސަރުކުރި އެވެ. އެކަމުން ރަނގަޅަށް އަރައި ނުގަނެވިގެން އުޅެނިކޮށް ވަޒީފާގައި މައްސަލަތަކެއްގައި އޭނާ އަށް ވަރަށް އަނިޔާކޮށް ފިހާރަތެރޭގައި ތަޅުލައި، ބަޔަކު އެ ފިހާރަ ރޯކޮށްލި އެވެ. އެއަށްފަހު އޭނާ އެއްވެސް ވަރަކަށް މީހުންނާ ވާހަކަ ނުދައްކަ އެވެ. މީހުންނަށް ގަބޫލުކުރެވުނީ އެ ހާދިސާގެ ސަބަބުން އޭނާގެ އަޑު ގެއްލުނީ ކަމުގަ އެވެ. އެ ޓްރޯމާއަށް ފަރުވާނުކުރެވި ވަނިކޮށް އޭނާގެ ބައްޕަ ނިޔާވެ އަނެއްކާވެސް ނަފްސާނީ ބޮޑެތި އަސަރުތަކެއް ލަލިތު އަށް ކުރެވުނު ކަމަށް ތަހުގީގުގައި ހާމަވި އެވެ.
އޭގެފަހުން ލަލިތު ބުނާގޮތުގައި ބައްޕަގެ ރޫހު އޭނާ އާ ވާހަކަ ދައްކަން ފެށި އެވެ. މިގޮތުން ބައްޕަ ބުނިގޮތަކަށް އަޅުކަން ކުރުމުގެ ތެރޭގައި އަލުން އަނބުރާ އޭނާގެ އަޑުވެސް އައިކަމަށްވެ އެވެ. އަދި މަޑުމަޑުން އޭނާގެ ނުފޫޒު އާއިލާތެރޭގައި ގަދަކޮށް އެންމެ ފަހުން ބައްޕަ އައިސް އެންމެން ސަލާމަތްކޮށްދޭނެ ކަމަށް ބުނެ ހާއްސަ އަޅުކަމެއްގެ ގޮތުގައި ސިފަކޮށް އެންމެން އެކީ ދަން ޖެހުނެވެ. ވަކިން މާމަ އޮތީ ނޭވާ ހާސްކުރެވިފައިވާ ނިޝާންތަކަކާއި އެކީ އެނދުކައިރީގައި މަރުވެ ވެއްޓިފަ އެވެ. ސަލާމަތްވި ހަމައެކަނި މެންބަރަކީ އެ ގޭގެ ފުރާޅުމަތީގައި އޮތް ކުއްތާ އެވެ.
މި ހުރިހާ ތަފްސީލްތަކެއް ލިބިފައިވަނީ ތަހުގީގުގައި ފެނުނު 11 ޑައިރީ އިންނެވެ. ދުނިޔޭގެ އެކި ކަންކޮޅުތަކުން ގިނަ އަދަދެއްގެ ނަފްސާނީ އިލްމުވެރިންނާއި ޑޮކްޓަރުންގެ ސަމާލުކަންވެސް މި މައްސަލައަށް ލިބުނުއިރު އެންމެނަށްވެސް ލިބުނު އެންމެ ބޮޑު ހައިރާންކަމަކީ އާއިލާތެރޭގައި މިހާ ބޮޑު ކަންތައްތަކެއް ހިނގަމުން ދިޔައިރު އަވަށްޓެރިންނާއި ގާތް އެކަކަށްވެސް މިކަމުގެ ހިލަމެއްވެސް ނުވާ ކަމެވެ. އަދި އެންމެ ސުވާލު ގިނަ އުމުރުގައި ހުރި 15 އަހަރުގެ ދްރޫވްގެ ކިބައިންވެސް މިފަދަ ކަމެއް ތަޖުރިބާ ކުރަމުންދާކަމުގެ އެއްވެސް ނިޝާނެއް، ނުވަތަ އެފަދަ ވާހަކައެއްވެސް އެއްވެސް މީހަކާ ހިއްސާ ނުކުރާ ކަމެވެ.
އާއިލާގެ އަވަށްޓެރިންނާއި ގާތް ރަހުމަތްތެރިންގެ އިންޓަވިއު ވެސް ސީރީޒްގައި ފެނިގެން ދެ އެވެ. އަދި މައްސަލަ ތަހުގީގު ކުރި ފުލުހުންނާއި ޑޮކްޓަރުންނާ ތަޖުރިބާކާރުން ބުނާ ގޮތުން ނަމަ ލަލިތުގެ އަޑު ދިއުމަކީވެސް ސިއްހީ ގޮތުން ބަލާއިރު އެހާ ގަބޫލުކުރެވޭ ވާހަކައެއް ނޫނެވެ.
އަމިއްލަ ފުރާނަ ގެއްލޭވަރުގެ މިހާ ބޮޑުކަމެއް އާއިލާގެ އެންމެން ކޮށްފައިމިވަނީ މަރުވި 33 އަހަރުގެ ޕްރިޔާންކާ އެންގޭޖުކޮށް ކައިވެންޏަށް ދެ ހަފްތާއަށް ވެފައި ވަނިކޮށެވެ.
ހައުސް އޮފް ސީކްރެޓްސް އަކީ ވަރަށް ހަރުކަށިކޮށް 18 އަހަރުން މަތީގެ އުމުރުފުރާއަށް ހާއްސަ ސީރީޒްއެއްގެ ގޮތުގައި ވަނީ ކްލެސިފައި ކުރެވިފަ އެވެ. މި ބަލައިފި ކޮންމެ މީހަކަށްވެސް ވިސްނާލެވޭނެ އެއްކަމަކީ ނަފްސާނީ މައްސަލަތަކުގެ ސަބަބުން މީހެއްގެ ދިރިއުޅުން ބަދަލުކޮށްލާ މިންވަރެވެ. އަދި އޭގެ އަސަރުގެ ވަރުގަދަކަމާއި މިހާއަށް ކުރިމަތިކޮށްލާ ތަޖުރިބާތަކެވެ.
