އޭޝިއަން ކަޕްގެ ކޮލިފައިން ގްރޫޕް ސްޓޭޖުގެ މެޗުތައް ސެންޓްރަަލައިޒްކޮށް ކުރިއަށް ގެންދަން އޭޝިއާގެ މައި ފުޓްބޯޅަ އިދާރާ އޭއެފްސީން ނިންމައިފި އެވެ.
މީގެ ކުރިން ހޯމް އެންޑް އަވޭ ސިސްޓަމަށް ކުޅެމުން އައި ކޮލިފައިން ގްރޫޕް ސްޓޭޖުގެ މެޗުތައް ދެން ކުރިއަށްދާނީ އެއް ގައުމެއްގައި ސެންޓްރަލައިޒް ކޮށެވެ. ކޮވިޑް-19ގެ ސަބަބުން އޭއެފްސީގެ ގިނަ މުބާރާތްތަކެއްގެ މެޗުތައް ސެންޓްރަަަލައިޒްކޮށް ކުޅެމުންދާއިރު، އޭޝިއަން ކަޕް ކޮލިފައިން އަށް ގެނައި މި ބަދަލުގެ ސަބަބުން ކުރިން ކޮލިފައިން ގްރޫޕް ސްޓޭޖުގައި ކުޅެން ލިބުނު ހަ މެޗުގެ ބަދަލުގައި ދެން ކުޅެން ލިބޭނީ ތިން މެޗެވެ.
މިއީ ހަގީގަތުގައި ރާއްޖެ ކަހަލަ ގައުމަކުން އޭޝިއަން ކަޕަށް ކޮލިފައިވުމުގެ ޓާގެޓާ އެކު މަސައްކަތް ކުރާއިރު، ލިބުނު ދެރައެކެވެ. އެއީ ރާއްޖޭން އޭޝިއަން ކަޕަށް ކޮލިފައިވާން އެންމެ ބޮޑަށް ބަރޯސާވާން ޖެހޭނީ އަމިއްލަ ދަނޑުގައި ކުޅޭ މެޗުތަކުން ނަތީޖާ ނެރެން ކަމަށްވާތީ އެވެ. ދެން އެ ފުރުސަތު ލިބެން އޮތީ ސެންޓްރަަލައިޒްކޮށް މެޗުތައް ކުޅެން ރާއްޖޭގައި ހޯސްޓްކޮށްގެންނެވެ.
މިހާރު އޮތް ގޮތުން މުބާރާތުގެ ގްރޫޕް ސްޓޭޖުގެ ގުރުއަތުލުން ކުރިއަށްދާނީ ފީފާ އެންމެ ފަހުގެ ރޭންކިން އަށް ބަލައިގެންނެވެ. ޕޮޓްތަކަށް ޓީމުތައް ބަހާފައިވަނީ މި ވަގުތު ފީފާ ރޭންކިން އަށް ބެލުމަށް ފަހު އެވެ.
ރާއްޖެ (ފީފާ ރޭންކިން 156) ހިމެެނެނީ އޭޝިއަން ކަޕް ކޮލިފައިން ޕޮޓް ތިނެއްގަ އެވެ. ސަރަަހައްދުގެ އެހެން ޓީމުތަކަށް ބަލާއިރު އިންޑިއާ (ފީފާ ރޭންކިން 106) އޮތީ ޕޮޓް އެކެއްގަ އެވެ. އަދި ނޭޕާލް (169)، ބަންގްލަދޭޝް (187) އަދި ސްރީ ލަންކާ (204) އޮތީ ހަތަރު ވަނަ ޕޮޓްގަ އެެވެ.
ކޮންމެ ޕޮޓަކުން ކޮންމެ ގްރޫޕެއްގައި ހިމެނޭނީ އެއް ޓީމެކެވެ. އޭޝިއަން ކަޕް ކޮލިފައިން ގުރުއަތުލުން ބާއްވާނީ އަންނަ ފެބްރުއަރީގައި ކަމަށް ރިޕޯޓްތައް ބުނެ އެވެ.
ނިމިދިޔަ ވޯލްޑް ކަޕް ކޮލިފައިންގައި ރާއްޖެ އަށް ދެ ކޯޗުން އިރުޝާދު ދިނެވެ. އެއީ ކްރޮއޭޝިއާގެ ޕީޓަ ސެގާޓް އާއި ނެދަލެންޑްސްގެ މާޓިން ކޫޕްމަން އެވެ.
ދާދި ފަހުން ނިމުނު އުރީދޫ ސާފް ޗެމްޕިއަންޝިޕްގައި ރާއްޖޭގެ ކޯޗަކަށް ހުރީ އަލީ ސުޒޭން އެވެ. އެފްއޭއެމުން މީގެ ކުރިން ބުނީ އޭޝިއަން ކަޕް ކޮލިފައިންގެ ކުރިން ގައުމީ ޓީމަށް އާ ކޯޗެއް ހަމަޖައްސާނެ ކަމަށެވެ. އަންނަ މަހު ސްރީ ލަންކާގައި ކުޅޭ ފޯ ނޭޝަންސް ކަޕްގައި ވެސް ގައުމީ ޓީމުން އާ ކޯޗެއް ފެނުމުގެ ފުރުސަތު އެބައޮތެވެ.
އޭއެފްސީން ސެންޓްރަލައިޒްކޮށް އޭޝިއަން ކަޕްގެ ކޮލިފައިން މެޗުތައް ކުޅެން ނިންމާފައިވާ ތާރީހުތަކަކީ ޖޫން 8، 11 އަދި 14 ގަ އެވެ. ވޯލްޑް ކަޕް ކޮލިފައިން ގްރޫޕްތަކުގެ ބާކީ މެޗުތައް ވެސް ކުރިއަށް ދިޔަ ގޮތަށް އޭޝިއަން ކަޕްގެ ކޮލިފައިން ބާކީ މެޗުތައް ވެސް ހޯސްޓް ކުރަން ބިޑް ކުރަން އޭއެފްސީ ހުޅުވާލާނެ އެވެ. އެއީ ކޮލިފައިން ގްރޫޕް ސްޓޭޖުގެ ގުރުއަތުލުމަށް ފަހު އެވެ.
އޭޝިއަން ކަޕްގެ ކޮލިފައިން ހަ ގްރޫޕުގެ އެއް ވަަނަ ޓީމާއި ހަ ގްރޫޕްގެ ދެ ވަނަ ޓީމުތަކުގެ ތެރެއިން ފަސް ޓީމަށް ޗައިނާގައި 2023 ވަނަ އަހަރު ބާއްވާ އޭޝިއަން ކަޕްގެ ޖާގަ ލިބޭނެ އެވެ. މިހާރު އޮތްގޮތުން އޭޝިއަން ކަޕް ކުރިއަށްދާނީ 2023 ވަނަ އަހަރުގެ ޖޫން 16 އިން ޖުލައި 16 ގެ ނިޔަަލަށެވެ.
