ސަބްމެރީނުން ލޯންޗު ކުރާ ބެލިސްޓިކް މިސައިލެއް ޖަޕާނުގެ އައްސޭރި ފަށާ ދިމާލުން ފޮނުވާލައިގެން އުތުރު ކޮރެއާ އިން އާ ހަތިޔާރެއް ޓެސްޓުކޮށްފައިވާ ކަމަށް ދެކުނު ކޮރެއާ އިން ބުނެފި އެވެ.
ސަބްމެރީނުން ލޯންޗު ކުރާ މިސައިލެއް އުތުރު ކޮރެއާ އިން ޓެސްޓުކޮށްފައި ވާއިރު، މީގެ ހަފުތާތަކެއް ކުރިން ދެކުނު ކޮރެއާ އިން ވެސް ވަނީ މިފަދަ ހަތިޔާރެއް އޮތްކަން އާއްމުކޮށްފަ އެވެ.
"މުޅިން އާ ވައްތަރެއްގެ" މި ސަބްމެރީނުން ލޯންޗު ކުރާ މިސައިލަކީ "ދުނިޔޭގެ އެންމެ ބާރުގަދަ ހަތިޔާރުގެ" ގޮތުގައި އުތުރު ކޮރެއާ އިން ސިފަކުރީ މިދިޔަ ޖެނުއަރީ މަހު އެވެ.
އެ ހަތިޔާރު ޓެސްޓުކޮށްފައި ވާއިރު، ދެކުނު ކޮރެއާ އާއި ޖަޕާން އަދި އެމެރިކާގެ ޖާސޫސީ އޮފިޝަލުން މި ވަގުތު ސޯލްގައި ދަނީ އުތުރު ކޮރެއާއާ ގުޅޭ މަޝްވަރާ ކުރަމުންނެވެ.
ފަހަކަށް އައިސް އުތުރު ކޮރެއާ އިން ހަތިޔާރު ޓެސްޓު ކުރާ މިންވަރު ވަނީ އިތުރުކޮށްފަ އެވެ. އެގޮތުން އަޑަށް ވުރެ ބާރަށް ދަތުރު ކުރާ ހައިޕަސޮނިކް މިސައިލާއި ދިގު ރާސްތާގެ ކްރޫޒް މިސައިލާއި އެންޓި އެއާ-ކްރާފްޓް ހަތިޔާރު ވެސް ޓެސްޓުކޮށްފައި ވެ އެވެ.
ބައެއް ހަތިޔާރުތައް ޓެސްޓު ކުރަމުން ދަނީ އެކަމާ ދެކޮޅަށް ބައިނަލްއަގްވާމީ ދަތިކުރުމުގެ ފިޔަވަޅު އަޅާފައި ވަނިކޮށެވެ. އދ. އިން އުތުރު ކޮރެއާ އަށް މަނާކޮށްފައި ވަނީ ބެލިސްޓިކް މިސައިލާއި ނިޔުކްލިއާ ހަތިޔާރު ޓެސްޓު ކުރުމެވެ.
އުތުރު އަދި ދެކުނު ކޮރެއާގެ ހަނގުރާމަ ނިމުނުކަން މިހާތަނަށް ވެސް ރަސްމީކޮށް އިއުލާނުކޮށްފައެއް ނުވެ އެވެ. އެހެންކަމުން ދެ ގައުމުގެ ހަތިޔާރުގެ ވާދަވެރިކަން ވަރަށް ބޮޑަށް އޮވެ އެވެ.
