ގަމު މެޖިސްޓްރޭޓްގެ ސުލޫކީ މައްސަލަ ސާބިތެއް ނުވި

ގަމު މެޖިސްޓްރޭޓް އަބްދުލްފައްތާހް އަބްދުލްގަފޫރާ ދެކޮޅަށް ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހެޅި ސުލޫކީ މައްސަލަ ސާބިތު ނުވާ ކަމަށް ނިންމައިފި އެވެ.

ޖޭއެސްސީން މިއަދު ނެރުނު ބަޔާނުގައި ބުނީ މެޖިސްޓްރޭޓްގެ ސުލޫކީ މައްސަލަ، ސާބިތުނުވާ ކަމަށް އެ ކޮމިޝަންގެ މެމްބަރުންގެ އަގުލަބިއްޔަތުން ކަނޑައަޅާފައިވާ ކަމަށެވެ.

މިއީ ލ. ގަމު މެޖިސްޓްރޭޓް ކޯޓަށް ހުށަހެޅުނު ބަންދާމެދު ގޮތެއް ނިންމުމުގެ މައްސަލައެއްގައި، ކަނޑައެޅިގެން ގާނޫނާ ހިލާފަށް މެޖިސްޓްރޭޓް އަމަލުކުރި ކަމަށް ބުނެ ޖޭއެސްސީއިން ތަހުގީގު ކުރި މައްސަލައެކެވެ.