މޮންޓެވީޑޯ، އުރުގުއޭ (އޮކްޓޫބަރު 15) - ފީފާ ވޯލްޑް ކަޕް ކޮލިފައިންގައި ރޭ އުރުގުއޭ އަތުން 4-1 އިން މޮޅުވެ ބްރެޒިލް އަންނަ އަހަރުގެ ވޯލްޑް ކަޕަށް ކޮލިފައިވުމާ ފިޔަވަޅަކަށް ގާތަށް ޖެހިލައިފި އެވެ.
ރޭ ޕެރޫ އަތުން 1-0 އިން މޮޅުވި އާޖެންޓީނާ ވެސް ވަނީ ވޯލްޑް ކަޕްގެ ޖާގައެއް ކަށަވަރުކުރުމުގެ ފުރުސަތު ބޮޑުކޮށްފަ އެވެ.
ދެކުނު އެމެރިކާ ކޮލިފައިން ތާވަލުގެ އެއް ވަނައިގައި ބްރެޒިލް އޮތީ 11 މެޗުން 31 ޕޮއިންޓާ އެކު އެވެ. ދެ ވަނައިގައި އޮތީ 11 މެޗުން 25 ޕޮއިންޓް ހޯދާފައިވާ އާޖެންޓީނާ އެވެ. ތިން ވަނައިގައި އޮތީ 12 މެޗުން 17 ޕޮއިންޓް ހޯދާފައިވާ އެކުއެޑޯ އެވެ. ހަތަރެއްގައި އޮތް ކޮލަމްބިއާ އާއި ފަސް ވަނައިގައި އޮތް އުރުގުއޭ އަށް ވަނީ 12 މެޗުން 16 ޕޮއިންޓް ލިބިފަ އެވެ. ވޯލްޑް ކަޕަށް ކޮލިފައިވަނީ އެންމެ ގިނަ ޕޮއިންޓް ހޯދާ ހަތަރު ޓީމެެވެ. ފަސް ވަނަ ކުޅޭނީ ޕްލޭއޮފްގަ އެވެ.
ބްރެޒިލްގެ މަނައުސްގައި ރޭ ކުޅުނު މެޗުގައި އެ ޓީމަށް ލީޑުނަގައިދިނީ ފްރެޑް ދިން ބޯޅައަކުން ނޭމާ އެވެ. ބްރެޒިލް ގައުމީ ޓީމުގެ ފުރަތަމަ އެގާރައިގައި ހިމެނިގެން ކުޅުނު ފުރަތަމަ މެޗުގައި ރަފީނިއާ ވަނީ ދެ ގޯލު ޖަހައިފަ އެވެ. އެ ޓީމުގެ ފަހު ގޯލު ޖެހީ ނޭމާ ދިން ބޯޅައަކުން ބަދަލު ކުޅުންތެރިއެއްގެ ގޮތުގައި ކުޅެން އެރި ގަބްރިއެލް ބާބޯސާ އެވެ. މެޗުގައި އުރުގުއޭގެ ހަމައެކަނި ގޯލު ޖެހީ ހިލޭ ޖެހުމަކުން ލުއިސް ސުއަރޭޒް އެވެ.
ވޯލްޑް ކަަޕަށް ކޮލިފައިވާން ދެން ބްރެޒިލަށް ބޭނުންވަނީ އެންމެ މޮޅެކެވެ.
އާޖެންޓީނާގެ ލަޓާރޯ މާޓީނޭޒް ފުރަތަމަ ހާފުގައި އެ ޓީމަށް ލީޑުނަގައިދިންއިރު، މެޗުން ޕޮއިންޓެއް ހޯދަން ޕެރޫ އަށް ދެ ވަަނަ ހާފްގައި ރަނުގެ ފުރުސަތެއް ލިބުނެވެ. ޔޮޝިމާ ޔޯޓުން ފޮނުވާލި ޕެނަލްޓީ ކާމިޔާބެއް ނުކުރެވުނެވެ.
ރޭގެ މޮޅާ އެކު އާޖެންޓީނާ ވަނީ ބަލިނުވެ 25 މެޗު ހަމަކޮށްފަ އެވެ. މި އަހަރުގެ ކޮޕަ އެމެރިކާ ކާމިޔާބުކުރި އާޖެންޓީނާ އެންމެ ފަހުން މެޗަކުން ބަލިވީ 2019 ވަނަ އަހަރުގެ ކޮޕަ އެމެރިކާގެ ސެމީ ފައިނަލްގައި ބްރެޒިލް އަތުންނެވެ.
ވޯލްޑް ކަޕްގެ ޖާގައެއް ހޯދަން އާޖެންޓީނާ އަށް ކޮލިފައިންގައި ބާކީ އެ ޓީމަށް އޮތް ހަތް މެޗުން ބޭނުންވަނީ ފަސް ޕޮއިންޓެވެ.
