ސާފް ޗެމްޕިއަންޝިޕް ފުޓްބޯޅަ މުބާރާތެއްގެ ފައިނަލުގައި ކުޅެލުމުގެ ފުރުސަތު މިހާތަނަށް ލިބިފައި ނުވި ކަމުގައި ވިޔަސް މިއަދު ހަވީރު ބަންގްލަދޭޝާ ދެކޮޅަށް ނަތީޖާއެއް ނެރެ މި ފަހަރުގެ މުބާރާތުގައި ތާރީހު ބަދަލުކޮށްލެވޭ ފަދަ ކާމިޔާބެއް ހޯދަން ބޭނުންވާ ކަމަށް ނޭޕާލްގެ އެސިސްޓަންޓް ކޯޗު ކިރަން ޝްރެސްތާ ބުނެފި އެވެ.
ބަންގްލަދޭޝާ ދެކޮޅަށް މިއަދު ހަވީރު ކުޅޭ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ނޭޕާލްގެ ކޯޗު އަބްދުﷲ އަލް މުތައިރީގެ ބަދަލުގައި ބައިވެރިވީ ޝްރެސްތާ އެވެ.
ނޭޕާލް ކުޅުނު ފުރަތަމަ މެޗުން ރާއްޖެ އަތުން 1-0 އިން މޮޅުވިއިރު، ދެ ވަނަ މެޗުން ވަނީ ލަންކާ އަތުން 3-2 އިން މޮޅުވެފަ އެވެ. އެކަމަކު، އެންމެ ފަހުން އިންޑިއާއާ ވާދަކުރި މެޗުން ވަނީ 1-0 އިން ބަލިވެފަ އެވެ. އެ ނަތީޖާއާ އެކު ނޭޕާލަށް ކޮންމެ ވެސް ވަރެއްގެ ޕްރެޝަރެއް ވަނީ ކުރިމަތިވެފަ އެވެ.
ކިރަން ބުނީ ފަހު ދެ މެޗުގައި ވާދަކުރާ ހަތަރު ޓީމަށް ވެސް ޕްރެޝަރު އެބައޮތް ކަމަށެވެ. އެ ގޮތުން ރާއްޖެ އާއި ނޭޕާލަށް އެއްވަރުކޮށްލައިގެން ވެސް ފައިނަލުގެ ޖާގަ ހޯދޭނެ ގޮތަށް އޮތްއިރު، ބަންގްލަދޭޝާއި އިންޑިއާ އަށް މޮޅުވުން ނޫން ގޮތެއް ނެތް ކަމަށް ޝްރެސްތާ ވަނީ ފާހަގަކޮށްފަ އެވެ.
"ކޮންމެ ބަޔަކަށް ވެސް ޕްރެޝަރެއް އޮންނާނެ. ފަސޭހައިން އެއްވެސް ކަމެއް ހާސިލް ނުކުރެވޭނެ. މި ފަހަރު އަހަރެމެން ޓީމަށް ޕްރެޝަރުގައި ކުޅެ ތާރީހު ބަދަލުކޮށްލެވޭނެ،" ޝްރެސްތާ ބުންޏެވެ. "އަހަރެެމެންނަށް އެއްވަރުކޮށްލައިގެން ވެސް ދެވެން އޮތީމަ އެއީ ފަސޭހައެކޭ ހިތަށް އެރި ކަމަށް ވިޔަސް ހަގީގަތަކީ އުނދަގޫވާނެ މި މެޗު،"
ނޭޕާލް ކުޅެމުން އަންނަ ފުޓްބޯޅަ ބަންގްލަދޭޝާ ދެކޮޅަށް މިއަދު ހަވީރު ކުޅޭ މެޗުގައި ތަކުރާރު ކުރެވޭނެ ކަމަށާއި ނޭޕާލްގެ ހުރިހާ ފޯކަސް އެއް ހުރީ ނަތީޖާ ނެރުމަށް ކަމަށް ޝްރެސްތާ ވަނީ ބުނެފަ އެވެ.
މި ފަހަރުގެ ސާފް ޗެމްޕިއަންޝިޕްގައި މިހާތަނަށް ރާއްޖޭގެ ސަޕޯޓަރުން ފިޔަވަައި އެންމެ ގިނައިން މެޗުތައް ބަލަން ވަންނަނީ ބަންގްލަދޭޝްގެ ސަޕޯޓަރުންނެވެ. ރާއްޖޭގެ ސަޕޯޓަރުންގެ ކުރިމަތީގައި ނޭޕާލް މި ވަނީ ރާއްޖެ ބަލިކޮށްފަ އެވެ. އެހެންވެ، މިއަދު ބަންގްލަދޭޝް ސަޕޯޓަރުންގެ ކުރިމަތީގައި ނަތީޖާ ނެރެން އުނދަގުލެއް ކުރިމަތިވާނެ ކަަމަށް ޝްރެސްތާ ގަބޫލެއް ނުކުރެ އެވެ.
"އަހަރެމެންނަށް މާ ބޮޑު އަސަރެއް ނުކުރާނެ. ބަންގްލަދޭޝްގެ ސަޕޯޓަރުން ގިނަ ވިޔަސް އަހަރެމެންގެ ކުޅުންތެރިން ނުކުންނާނީ ފުރިހަަމަ ޔަގީންކަމާ އެކު ރަނގަޅު ނަތީޖާއެއް ނެރެން،" ޝްރެސްތާ ބުންޏެވެ.
ނޭޕާލާ ދެކޮޅަށް އެންމެ ފަހުން ބަންގްލަދޭޝް ކުުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. ނޭޕާލް ތިން މެޗުން މޮޅުވިއިރު، މި އަހަރު ނޭޕާލްގައި ބޭއްވި ތުރީ ނޭޝަންސް ކަޕް ފައިނަލުގައި އެ ޓީމު ވަނީ 2-1 އިން ބަންގްލަދޭޝް ބަލިކޮށްފަ އެވެ.
ޝްރެސްތާ ބުނީ ތުރީ ނޭޝަންސް ކަޕް ކުޅުނު ބަންގްލަދޭޝް ޓީމާއި މިހާރު އޮތް ޓީމު އަދި ކޯޗު ވެސް ތަފާތު ކަމަށާއި އެކަމަށް ސަމާލުވާން ޖެހޭނެ ކަމަށެވެ.
"އާ ކޯޗެއް ހުރި. ކުޅޭ ސްޓައިލް ތަފާތު. އެހެންވީމަ އެ މީހުންނަށް އަހަރެމެން ސަޕްރައިޒް ކޮށްލެވިދާނެ. އެ ގޮތަށް ވެސް ތައްޔާރުވެގެން ނުކުންނާނީ،" ޝްރެސްތާ ބުންޏެވެ.
ސާފް ޗެމްޕިއަންޝިޕްގައި ނޭޕާލް ވަނީ 1993 ވަނަ އަހަރުގެ މުބާރާތުގެ ތިން ވަނަ ހޯދައިފަ އެވެ. އޭގެ ފަހުން އެ ޓީމު ވަނީ ސާފް ޗެމްޕިއަންޝިޕްގެ ސެމީ ފައިނަލުން ބަލިވެފަ އެވެ. އެންމެ ފަހުން 2018 ވަނަ އަހަރުގެ މުބާާރާތުގެ ސެމީ ފައިނަލުގައި ބަލިވީ ރާއްޖެ އަތުންނެވެ.
ނޭޕާލާއި ބަންގްލަދޭޝް ކުޅޭ މެޗު ފަށާނީ މިއަދު ހަވީރު ހަތަރެއް ޖަހާއިރު އެވެ.
