މާލެ ސަރަހައްދުގެ ކުނި ނަގަމުން އަންނަ ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އާއެކު ސިޓީ ކައުންސިލުން ވެފައިވާ އެއްބަސްވުން ބާތިލްކުރާނެ ކަމުގެ އިންޒާރާއެކު، އެއްބަސްވެފައިވާ ކަންކަން ފުރިހަމައަށް ތަންފީޒުކޮށް، އިސްލާހުކުރަން ނޯޓިސް ދީފި އެވެ.
މާލެ މަގުތަކުގައި ހުންނަ ކުނި ނުނަގައި، މާލޭގެ ގިނަ ސަރަހައްދުތައް ކުނި ވެފައިވާ ކަމުގެ ޝަކުވާ ވަނީ ބޮޑުވެފަ އެވެ.
އެއާއެކު ސިޓީ ކައުންސިލާއި ވެމްކޯގެ ކޯޅުން ބޮޑުވެފައިވަނިކޮށް، އެއްބަސްވުމާ އެއްގޮތަށް ވެމްކޯއިން ފުރިހަމައަށް މަސްއޫލިއްޔަތު އަދާ ނުކުރާ ކަމަށް ބުނެ އެކަންކަން އިސްލާހުކުރަން އެ ކުންފުންޏަށް ވަނީ 15 ދުވަހުގެ މުއްދަތެއް ދީފަ އެވެ.
މާލޭ ސިޓީގެ މޭޔަރު ޑރ. މުހައްމަދު މުއިއްޒު "އަދަދު"އަށް ދެއްވި އިންޓަވިއުއެއްގައި ވިދާޅުވީ މާލޭގެ މަގުތައް ކުނިކަހައި ސާފުކުރަން، މިހާރުވެސް މަހެއްގެ މައްޗަށް ވެމްކޯއަށް ތިން މިލިއަނަށް ވުރެ ގިނަ ރުފިޔާ ސިޓީ ކައުންސިލުން ދޭ ކަމަށެވެ.
ނަމަވެސް އެ މަސްއޫލިއްޔަތު އަދާކުރުމުގައި އެކުންފުނިން ފަރުވާ ކުޑަކަމަށް މޭޔަރު ވިދާޅުވި އެވެ.
"އަޅުގަނޑުމެން މިހާރު އެބޭފުޅުނަށް ނޯޓިސް ދީފިން އެގްރިމެންޓްގައި އޮތް ގޮތަށް ތަންފީޒުކުރަން. އެހެންވީމާ އެ ނޯޓިސްގެ މުއްދަތު ހަމަވާއިރު، އެގްރިމެންޓްއާ އެއްގޮތަށް އެބޭފުޅުންގެ މަސައްކަތް އިސްލާހު ނުކޮށްފިނަމަ ދެން އިން މަރުހަލާއަކަށް ދާނީ. މާނައަކީ އެގްރިމެންޓްއާއި އެއްގޮތަށް އަޅުގަނޑުމެން އަޅަން ޖެހޭ ފިޔަވަޅުތައް އަޅަން ފެށީމި," މުއިއްޒު ވިދާޅުވި އެވެ.
އޭގެ ފަހުން، އެގްރިމެންޓް ބާތިލް ކުރާ ސްޓޭޖްއަށް ގޮސްފިނަމަ، އެގްރިމެންޓްއާ އެއްގޮތަށް އެ ބާތިލު ކުރާނެ ކަމުގެ އިންޒާރު އޭނާ މިއަދު ދެއްވި އެވެ.
މުއިއްޒު ވިދާޅުވި ގޮތުގައި މި މުއްދަތުގެ ތެރޭގައި ވެމްކޯއިން އެކަންކަން އިސްލާހު ނުކޮށްފިނަމަ އެގްރީމެންޓް ބާތިލްކޮށް، އެ މަސައްކަތް އެހެން ބަޔަކާ ހަވާލުކުރުމުގެ ވިސްނުމަކަށް ދާނެ އެވެ.
ނޫންނަމަ، އެ މަސައްކަތާ ސިޓީ ކައުންސިލުން ހަވާލުވާނެ ކަމަށެވެ.
އެގޮތުން، މުއިއްޒުގެ ވިސްނުންފުޅު ހުރީ ލާމަރުކަޒީ ގާނޫނުގެ ދަށުން ކައުންސިލްތަކަށް ލިބިފައިވާ ބާރުގެ ބޭނުންކޮށް، ސިޓީ ކައުންސިލްގެ ދަށުން ކުންފުންޏެއް އުފެއްދުމަށެވެ.
އެކަމުގެ އިދާރީ މަސައްކަތްތައް މިހާރުވެސް ކުރަމުންދާއިރު، އެފަދަ ކުންފުންޏެއްގެ ދަށުން މާލޭގެ ކުނި މެނޭޖްކުުރުމުގެ މަސައްކަތް ސިޓީ ކައުންސިލަށްވެސް ކުރެވިދާނެ ކަމަށް އޭނާ ގަބޫލުކުރައްވަ އެވެ.
ނަމަވެސް އަދި އެކަން އެގޮތަށް ކުރައްވާނެ ކަމަށް މުއިއްޒު ސީދާ ވިދާޅުނެއް ނުވެ އެވެ.
ހަމައެކަނި ވިދާޅުވީ "އެއީވެސް ކުރެވިދާނެ ކަމެއް" ކަމަށެވެ.
ސިޓީ ކައުންސިލާއި ވެމްކޯއާއި ދެބަސްވާން ޖެހުނީ ކީއްވެ؟
ކޮވިޑް-19 އާއެކު މާލޭގެ ކުނި ނެގުމުގެ ހިދުމަތްދެމުން އަންނަ ވެމްކޯއިން ވަނީ މިދިޔަ އަހަރު ގޭގެއަށްވަދެ ކުނި ނެގުމުގެ ހިދުމަތް ހުއްޓާލައިފަ އެވެ. ވޭއެތުވެދިޔަ އަހެރެއްހާ ދުވަހު ކުނި ގެންގޮސްފައި ވަނީ ގޭބީސީތަކުން މަގުމައްޗަށް ކުނި ނެރުމުންނެވެ.
އެހެންނަމަވެސް މަގުމައްޗަށް ކުނި އުކާފައި ހުންނަ މައްސަލަ ބޮޑުވިއެވެ. މަގުތައް ހަޑިވެ، ކުނިވަސް ދޮވަން ފެށުމުން އެކަމާއި އާންމުން ޝަކުވާ ކުރަން ފެށިއެވެ. އެ މައްސަލާގައި ސިޓީ ކައުންސިލުން ވަނީ މާލޭގެ މަގުތައް މަތީ ކުނި ނުބެހެއްޓުމަށް އަންގާފައެވެ.
އެއާއި އެކު ވެމްކޯއިން ވަނީ ގޭގެއިން ކުނި ނަނގަން ނިންމާފައެވެ. އަދި ބޭރުގައި ބަހައްޓާ ކުނި ނުނަގާނެ ކަމަށާއި، ކުނި ނަނގާނީ ހަމައެކަނި ހަމައެކަނި ރަޖިސްޓްރީކޮށްފައިވާ ގެތަކުން އެކަނި ކަމަށް އެންގިއެވެ.
އެހެންނަމަވެސް ބައެއް ފަރާތްތަކުން ބޭރަށް ކުނި ނެރުނެވެ. އެ ކުނިތައް ވެމްކޯއިން ނުގެންދިއުމުން ސިޓީ ކައުންސިލުން އެއްފަހަރު ވަނީ އެ ކުނިތައް ނަނގައިގެން ގެންގޮސް ވެމްކޯ އޮފީސްގެ ދޮރުމައްޗަށް އަޅާލާފައެވެ.
އެއީ ނާތަހުޒީބީ އަމަލެއްކަން ގަބޫލުކުރާ ކަމަށް ބުނެ ސިޓީ ކައުންސިލުން ފަހުން އެކަމަށް މާފަށްވެސް އެދިފައިވެ އެވެ.
ސިޓީ ކައުންސިލާއެކު ވެމްކޯއިން އެއްބަސްވެފައި ވަނީ މާލެ މަގުތަކުގައި ހުންނަ ހުރިހާ ކުންޏެއް ނަނގާ މަގުތައް ސާފުކޮށް ބެލެހެއްޓުމަށެވެ. ގޭގެއިން ކުނި ނެނގުމަކީ އެ ކުންފުނީގެ އަމިއްލަ ވިޔަފާރީ އެވެ.
