މި އަހަރުގެ ޒުވާނުންގެ ދުވަސް ފާހަގަކުރުމުގެ ގޮތުން ކުޅުދުއްފުށީ ސިޓީގައި ހިންގާ ހަރަކާތްތަކުގެ ތެރޭގައި، ރާއްޖޭގެ ފުރަތަމަ ފަހަރަށް އަންހެން ބައިވެރިވާ މޮޓޯ ސައިކަލް ޑްރެގް ރޭސް ހިމަނައިފި އެވެ.
ޑްރެގް ރޭހަކަށް ފުރަތަމަ ފަހަރަށް އަންހެނުން ނުކުންނައިރު, މީގެކުރިން ރާއްޖޭގައި މޮޓޯ ސައިކަލް ރޭހެއްގައި އަންހެނުން ބައިވެރިވެފައިވަނީ 2015 ވަނަ އަހަރު އެވެ. އެއީ ސާކިޓް ރޭހެކެވެ.
ކޮންމެ އަހަރެއްގެ އޮކްޓޯބަރު މަހުގެ 22 ވަނަ ދުވަހަކީ ގައުމީ ޒުވާނުންގެ ދުވަހުގެ ގޮތުގައި ރައީސް އިބްރާހިމް މުހައްމަދު ސޯލިހު ވަނީ ހަމަޖައްސާފަ އެވެ. އެގޮތުން, މި އަހަރުގެ އެ ދުވަސް ރަސްމީކޮށް ފާހަގަކުރުމަށް ނިންމީ ކުޅުދުއްފުށީ ސިޓީގަ އެވެ.
ޒުވާނުންގެ ދުވަސް ފާހަގަ ކުރުމުގެ ހަރަކާތްތައް މިހާރު ކުޅުދުއްފުށީ ސިޓީގައި ފަށާފައިވާއިރު, ކުރިއަށް އޮތް ދެ ހަފުތާއަށް ވެސް ގިނަ ހަރަކާތްތަކެއް ވަނީ އިންތިޒާމްކޮށްފަ އެވެ.
އޭގެ ތެރެއިން އެންމެ ފާހަގަކޮށްލެވޭ ހަރަކާތަކީ ރާއްޖޭގައި ފުރަތަމަ ފަހަރަށް ބާއްވާ އަންހެނުންގެ މޮޓޯ ސައިކަލް ޑްރެގް ރޭހެވެ. މި ރޭހަކީ ޔޫތު މިނިސްޓްރީ އާއި ކުޅުދުއްފުށީ ސިޓީ ކައުންސިލުން ކުޅުދުއްފުށީ މޮޓޯ ސްޕޯޓްސްއާ ގުޅިގެން ބާއްވާ ހަރަކާތެކެވެ.
ކުޅުދުއްފުށީ މޮޓޯ ސްޕޯޓްސްގެ އިވެންޓް އޮގަނައިޒާ ޖައުފަރު އަލީ ބުނި ގޮތުގައި, ރާއްޖޭގައި ބާއްވާ ފުރަތަމަ އަންހެން ސައިކަލް ޑްރެގް ރޭހުގައި ބައިވެރިވާން ހުޅުވާލާފައިވާއިރު މިހާތަނަށް ހަތަރު މީހަކު ވަނީ ބައިވެރިވެފަ އެވެ. އެއީ ކުޅުދުއްފުށީ ސިޓީއަށް ނިސްބަތްވާ ހަތަރު ބައިވެރިންނެވެ.
މި ރޭހުގައި އަންހެނުންގެ އިވެންޓެއް ހިމަނާފައިވާއިރު, ފިރިހެނުންނަށް ހާއްސަ ރޭސް ވެސް ކުރިއަށް ދާނެ އެވެ. މީގެ ކުރިން ވެސް ކުޅުދުއްފުށީގައި މިފަދަ ފަސް ރޭހެއް ބާއްވާފައިވެ އެވެ.
ޒުވާނުންގެ ދުވަހަށް ހާއްސަ ރޭސް ކުޅުދުއްފުށީގައި ބޭއްވުމަށް ހަމަޖެހިފައިވަނީ މި މަހުގެ 23 ވަނަ ދުވަހު އެވެ.
ރޯޑް ކިންގް ޗެމްޕިއަންޝިޕްގެ ނަމުގައި ބާއްވާ ރޭހުގައި ކުރިއަށްދާނީ 125 ސީސީން 150 ސީސީއާ ހަމައަށް ޑްރެގް ރޭސް އިވެންޓްތަކެކެވެ. މުޅި ދުވަހަށް ރޭސް ދިގު ދެމިގެންދާ ގޮތަށް ވަނީ އިންތިޒާމްކޮށްފަ އެވެ.
