ސްކޯޕިއާ، ނޯތު މެސެޑޯނިއާ (އޮކްޓޫބަރު 12) - ފީފާ ވޯލްޑް ކަޕް ކޮލިފައިންގައި ރޭ ރަށުންބޭރުގައި 4-0 އިން ނޯތު މެސެޑޯނިއާ ބަލިކޮށް އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕަށް ކޮލިފައިން ބުރުން ޖާގަ ހޯދި ފުރަތަމަ ޓީމުގެ ޝަރަފް ޖަރުމަނަށް ލިބިއްޖެ އެވެ.
ޖަރުމަނާ އެކު މި ވަގުތު ވޯލްޑް ކަޕްގެ ޖާގަ ޔަގީންވެފައި އޮތީ ހޯސްޓް ކުރާ ގައުމުގެ ހައިސިއްޔަތުން ގަތަރެވެ. ޖަރުމަނު ވޯލްޑް ކަޕުން ޖާގަ ކަަށަވަރުކުރީ ކޮލިފައިންގައި ބާކީ ދެ މެޗު ނުުކުޅެ އޮއްވަ އެެވެ.
ކޮލިފައިން ގްރޫޕް ޖޭގެ އެއް ވަނައިގައި ޖަރުމަނު އޮތީ އަށް މެޗުން 21 ޕޮއިންޓް ހޯދައިގެންނެވެ. ދެ ވަނައިގައި އޮތީ ރޭ އާރްމީނިއާ އަތުން 1-0 އިން މޮޅުވި ރުމޭނިއާ އެވެ. އެ ޓީމަށް ވަނީ އަށް މެޗުން 13 ޕޮއިންޓް ލިބިފަ އެެވެ.
ޖަރުމަނުން ކޮލިފައިންގައި ބަލިވީ އެންމެ މެޗަކުންނެވެ. އެއީ އަމިއްލަ ގައުމުގައި ނޯތު މެސެޑޯނިއާއާ ދެކޮޅަށް ކުޅުނު މެޗުގަ އެވެ. ނޯތު މެސެޑޯނިއާގައި ކުޅުނު ރޭގެ މެޗުގައި ޖަރުމަނުގެ ގޯލުތައް ޖެހީ ޓިމޯ ވާނާ ދެ ގޯލާއި ކައި ހަވާޓްޒް އަދި ޖަމާލް މުސިއާލާ އެވެ.
މެޗަށް ފަހު ޖަރުމަނުގެ ކޯޗު ހަންސީ ފްލިކް ބުނީ ވޯލްޑް ކަޕަށް ކޮލިފައިވި ފުރަތަމަ ޓީމުގެ ޝަރަފް ލިބުމުން ވަރަށް ހިތްހަމަޖެހޭ ކަމަށެވެ. އެކަމަކު، އަދިވެސް އެ ޓީމަށް ރަނގަޅު ކުރެވޭނެ ގިނަ ކަންތައްތަކެއް އެބަހުރި ކަމަށް ފްލިކް ވަނީ ބުނެފަ އެވެ.
މިއީ ޖަރުމަނުން ވޯލްޑް ކަޕްގައި ކުޅޭނެ 20 ވަނަ ފަހަރެވެ. އެންމެ ގިނައިން ވޯލްޑް ކަޕް ކުޅުމުގެ ރެކޯޑް އޮތީ 21 ފަހަރު ކުޅުނު ބްރެޒިލް އަތުގަ އެވެ.
ނެދަލެންޑްސް އިން ވަނީ ރޭ ކުޅުނު މެޗުގައި 6-0 ގިބްރޯލްޓާ ބަލިކޮށްފަ އެވެ. ނެދަލެންޑްސްގެ ގޯލުތައް ޖެހީ މެމްފިސް ޑިޕާއި ދެ ގޯލާއި ވާޖިލް ވެން ޑައިކް، ޑެންޒެލް ޑަމްފްރީސް، އާނޯޓް ޑަންޖޫމާ އަދި ޑޮންޔެލް މާލެން އެވެ.
ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ކްރޮއޭޝިއާ އާއި ސްލޮވާކިއާ ވަނީ 2-2 އިން އެއްވަރުވެފަ އެވެ. އެސްޓޯނިއާ އަތުން 1-0 އިން ވޭލްސް މޮޅުވިއިރު، ނޯވޭ ވަނީ 2-0 އިން މޮންޓަނެގްރޯ ބަލިކޮށްފަ އެވެ.
