އިދިކޮޅު ކޯލިޝަނުން ޕްރޮސިކިއުޓާ ޖެނަރަލް ހުސެއިން ޝަމީމް ދިރިއުޅުއްވާ ގެ ކައިރީ ކުރި އިހުތިޖާޖުގައި ބައިވެރިވި ކުރީގެ މަޖިލިސް މެންބަރު މުހައްމަދު ޝާހިދު (ޝާޑް) ހައްޔަރުކޮށްފި އެވެ.
އިދިކޮޅު ފަރާތްތަކުން ދަނީ ޕްރޮސިކިއުޓާ ޖެނަރަލްގެ އޮފީހުގެ ނިންމުންތަކާއި އަމަލު ކުރަމުންދާ ގޮތްތަކާ ގުޅިގެން ކަންބޮޑުވުން ފާޅުކޮށް, ޝަމީމްގެ ގޭ ކައިރީގައި މުޒާހަރާކުރަމުންނެވެ.
އެ މުޒާހަރާގައި ޝަމީމްގެ އިސްތިއުފާއަށް ވެސް ވަނީ ގޮވާލާފަ އެވެ.
ރޭ ޝަމީމް ގޭގެ ކައިރީގައި ކުރި މުޒާހަރާގައި ޝާޑްގެ އިތުރުން ޕީޕީއެމް ކައުންސިލްގެ މެންބަރު ސޫދާ އަބްދުالله ވެސް ހައްޔަރުކުރި އެވެ.
ޕީޕީއެމް/ޕީއެންސީ ކޯލިޝަންގެ ތަރުޖަމާން ހީނާ ވަލީދު "އަދަދު"އަށް ވިދާޅުވީ އެ ދެ ބޭފުޅުން މި ވަގުތު ފުލުހުންގެ ބަންދުގައި ތިބި ނަމަވެސް, ދޫކޮށްލުމުގެ މަޝްވަރާތައް ކުރެވެމުންދާ ކަމަށެވެ.
ކުރީގެ ރައީސް އަބްދުﷲ ޔާމީނަށް ކޮށްފައިވަނީ ނުހައްގު ޖަލު ހުކުމެއް ކަމަށް ބުނެ އިދިކޮޅުން ދަނީ ސިލްސިލާކޮށް މަގުމަތީ އަޑުއުފުލަމުންނެވެ.
ރައީސް ޔާމީންގެ މައްޗަށް ކުށް ސާބިތުވެފައި ވަނީ ނޮވެމްބަރު 8، 2019 ގަ އެވެ. މިހާރު އެ މައްސަލާގައި އިސްތިއުނާފު އެންމެ މަތީ ކޯޓުގައި ނިންމާލާފައިވާއިރު, އެ ކޯޓުން މިހާރު އަންނަނީ މައްސަލާގައި ހުކުމް އިއްވުމަށް ތައްޔާރުވަމުންނެވެ.
