ޝަރީއަތް ނިމެންދެން ބަންދުކޮށްފައިހުރި ގައިދީއަކު މިދިޔަ ބުރާސްފަތި ދުވަހުގެ ރޭ މަރުވެފައިވާއިރު، އޭނާއަށް ބޭސްފަރުވާ ފޯރުކޮށްދިނުމުގައި ކަމާބެހޭ އިދާރާތަކުގެ އިހުމާލެއް ނެތް ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
ކަރެކްޝަނުން މައުލޫމާތު ދިން ގޮތުގައި މަރުވެފައިވަނީ މ. މަލަސް/ ކ. މާލެ އިސްމާއީލް ޝަބީން (46 އަހަރު) އެވެ.
އޭނާއަކީ މަސްތުވާތަކެތި ބޭނުންކޮށް، ގެންގުޅެ އަދި ވިއްކިކަމަށް ކުރާ ދައުވާގެ ޝަރީއަތް ނިމެންދެން މާލެ ޖަލުގައި ބަންދުކޮށްފައިހުރި މީހެކެވެ.
ޝަބީން އެ ރޭ އެމެޖެންސީގައި އައިޖީއެމް ހޮސްޕިޓަލަށް ގެންގޮސްފައިވަނީ ނޭވާލުމަށް އުނދަގޫތަކެއް ހުރުގެންނެވެ.
އޭނާ މަރުވެފައިވަނީ އެކަމަށް ފަރުވާދަމުން ދަނިކޮށެވެ. އަދި ޝަބީން އަކީ ހަކުރު ބައްޔަށް ބޭސްކުރަމުންދިޔަ މީހެއް ކަމަށް ކަރެކްޝަންސްއިން ވަނީ ބުނެފަ އެވެ.
އެއާއެކު ޝަބީން މަރުވީ، ޑޮކްޓަރަށް ދައްކައި ދިނުމަށް ތަކުރާރުކޮށް އެދެމުން ދަނިކޮށް ކަމަށް އޭނާގެ އާއިލާއިން ދަނީ ތުހުމަތު ކުރަމުންނެވެ.
ހދ. ނޭކުރެންދޫގައި ކަރެކްޝަނަލް ސެންޓަރެއް އެޅުމުގެ މަސައްކަތާ ގުޅޭގޮތުން މަކުނުދޫ ދާއިރާގެ މެމްބަރު މުހައްމަދު ރާއީ ކުރެއްވި ސުވާލަށް ޖަވާބު ދެއްވަން އިމްރާން މިއަދު މަޖިލީހަށް ހާޒިރުވެވަޑައިގެންފައިވާއިރު، އިތުރު ސުވާލުކުރަން ދިން ފުރުސަތުގައި ޝަބީންގެ މަރާ ގުޅޭގޮތުން މިނިސްޓަރަށް ވަނީ މެމްބަރުންގެ ސުވާލުތައް އަމާޒުކޮށްފަ އެވެ.
އެ ސުވާލުތަކަށް ޖަވާބު ދެއްވަމުން އިމްރާން ވިދާޅުވި ގޮތުގައި، އެފަދަ ހާދިސާއެއް ހިނގައިފި ކަމުގެ ރިޕޯޓު ލިބުމާއެކު ހޯމް މިނިސްޓްރީގެ ފަރާތުން އިންސްޕެކްޓާ އޮފް ކަރެކްޝަނަލް ސާވިސްއިން ވަކިން އެ މައްސަލަ ބަލާނެ ކަމަށެވެ.
އަދި އޭގެ ފަހުން ހިއުމަން ރައިޓްސް ކޮމިޝަން (އެޗްއާރުސީއެމް) އާ ގުޅިގެން ވެސް އެކަން ބަލާނެ ކަމަށް އިމްރާން ވިދާޅުވި އެވެ.
އެ ރިޕޯޓަކީ ކަރެކްޝަނަލް ސާވިސްއިން ތައްޔާރުކުރާ ރިޕޯޓާ މުޅިން ވަކިން އެކުލަވާލެވޭ ރިޕޯޓެއް ކަމަށެވެ.
އެގޮތުން، އެއްވެސް ފަރާތެއްގެ އިހުމާލެއް ނޫނީ އަދާކުރަންޖެހޭ ޒިންމާއެއް އަދާނުކޮށް އޮތް ކަން އެ ރިޕޯޓުތަކުގައި ފާހަގަކޮށްފައިނުވާ ކަމަށް މިނިސްޓަރު ހާމަކުރެއްވި އެވެ.
"އަޅުގަނޑު ކަށަވަރުކުރިން ޑޮކްޓަރަށް ދެއްކިފައި އެބަހުރިތޯ. ޑޮކްޓަރުން ވިދާޅުވެފައިވާ ގޮތަށް ކަންތައް ކުރެވިފައި ހުރިތޯ. އެކަންކަން ވަނީ ކުރެވިފައި،" އިމްރާން ވިދާޅުވި އެވެ.
އިމްރާން ވިދާޅުވީ ގައިދީންނަށް ބޭސްފަރުވާ ނުލިބިގެން އެތައް ޝަކުވާއެއް ލިބޭ ކަމަށާއި، ނަމަވެސް، ބައެއް ހާލަތްތަކުގައި އެއް ގަދީއަކު އަހަރެއްގެ ތެރޭގައި 40 އަށް ވުރެ ގިނަ ފަހަރު ޑޮކްޓަރަށް ދެއްކިފައި ވެސް އެބަހުރި ކަމަށެވެ.
ގައިދީންނަށް ބޭސްފަރުވާ ފޯރުކޮށްދިނުމުގެ ނިޒާމު ހަރުދަނާ ކުރުމުގެ ގޮތުން، މިހާރު ޖަލުގައި ދެ ސްޕެޝަލިސްޓަކު އެބަތިބި ކަމަށާއި އަދި އިތުރު ޑޮކްޓަރަކު ރެކްރޫޓް ކުރުމުގެ މަސައްކަތް ހިނގަމުންދާ ކަމަށް ވެސް ވިދާޅުވި އެވެ.
"އިތުރު ފަރުވާ ބޭނުންވާ ގައިދީންނަށް މާފުށި ހެލްތު ސެންޓަރުންނާއި އަދި މާލެއަށް ގެންނަން ޖެހޭ ހާލަތުގައި ގެންނަން،" މިނިސްޓަރު ވިދާޅުވި އެވެ.
