އުރީދޫ ސާފް ޗެމްޕިއަންޝިޕްގައި ރޭ ނޭޕާލް ކޮޅަށް ޖެހި ގޯލާ އެކު އިންޑިއާގެ ކެޕްޓަން ސުނިލް ޗެތުރީ، ބްރެޒިލްގެ ލެޖެންޑް ޕެލޭގެ ލަނޑު ޖެހުމުގެ ރެކޯޑަކާ ހަމަކޮށްފި އެވެ.
ޕެލޭ ވަނީ ބްރެޒިލަށް ކުޅެދިން 92 މެޗުން 77 ގޯލު ޖަހައިފަ އެވެ. އުމުރުން 37 އަހަރުގެ ޗެތުރީ ރޭ ޖެހި ގޯލާ އެކު މި ވަނީ 121 މެޗުން 77 ގޯލު ޖަހައިފަ އެވެ. ޔޫއޭއީގެ އަލީ މަބްހޫތު ވެސް ވަނީ 77 ގޯލު ހަމަކޮށްފަ އެވެ. އެއީ 95 މެޗު ކުޅެގެންނެވެ.
މި ވަގުތު ކުޅެމުން އަންނަ ކުޅުންތެރިންގެ ތެރެއިން ޗެތުރީ އަށް ވުރެ ގިނައިން ގޯލު ޖަހާފައިވަނީ އާޖެންޓީނާގެ ކެޕްޓަން ލިއޮނަލް މެސީ އާއި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އެވެ. މެސީ ވަނީ 154 މެޗުން 79 ގޯލު ޖަހައިފަ އެވެ. ރޮނާލްޑޯ އެންމެ ކުރީގައި އޮތީ 181 މެޗުން 112 ގޯލު ޖަަހައިގެންނެވެ.
ރޭގެ މެޗަށް ފަހު އިންޑިއާގެ ކޯޗު އީގޯ ސްޓިމަކް ބުނީ ޗެތުރީގެ މި ރެކޯޑްތަކާ މެދު އެންމެން ވެސް އުފާކުރާ ކަަމަށެވެ.
"މުޅި ޓީމު ވެސް ވަރަށް ބޮޑަށް މަސައްކަތް ކުރޭ ޗެތުރީ އަށް ގޯލު ޖެހޭނެ ގޮތްތައް ހޯދައިދޭން،" ސްޓިމަކް ބުންޏެވެ.
ނޭޕާލްގެ ކޯޗު ކުވޭތުގެ އަބްދުﷲ އަލް މުތައިީރީ ބުނީ ސާފް ޗެމްޕިއަންޝިޕްގައި ވާދަކުރާ ކޮންމެ ޓީމެއްގެ ކޮންމެ ކުޅުންތެރިއެއްގެ މޮޅު ވާހަަކަ ވެސް ދެއްކިދާނެ ކަމަށާއި އެއީ މިއިން ކޮންމެ ކުޅުންތެރިއަކީ ވެސް އެ ގައުމެއްގެ އެންމެ މޮޅު ކުޅުންތެރިން ކަމަށެވެ. އެ ގޮތުން ޗެތުރީއާ ބެހޭގޮތުން އޭނާ ދައްކަން ޖެހޭ ވާހަކައެއް ނެތްކަން ފެންނަން އޮތް ސަބަބަކީ އޭނާގެ ރެކޯޑްތަކުން އެއީ ކޮން ފެންވަރެއްގެ ކުޅުންތެރިއެއްކަން އެނގޭ ކަމަށް މުތައިރީ ބުންޏެވެ.
"ތިބުނާ ސްޓެޓިސްޓިކްސް ނޫނީ ނަމްބަރުތަކުން އެބަ ބުނެދޭ ޗެތުރީ އަކީ ކޮން ފެންވަރެއްގެ ކުޅުންތެރިއެއްކަން. އެހެންވީމަ އަހަރެން މީގެ ވަކި އެއްޗެއް ބުނަން އޮތް ކަމަށް ނުދެކެން،" މުތައިރީ ބުންޏެވެ.
މި ސަރަހައްދުގެ ފުޓްބޯޅައިގައި ދެން ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އޮތީ ރާއްޖޭގެ ގައުމީ ޓީމުގެ ތަރި އަލީ އަޝްފާގު (ދަގަނޑޭ) އަތުގަ އެވެ. އުމުރުން 36 އަހަރުގެ ދަގަނޑޭ ވަނީ 88 މެޗުން 57 ގޯލު ޖަހައިފަ އެވެ.
މި ފަހަރުގެ ސާފް ޗެމްޕިއަންޝިޕް ލަނޑު ލިސްޓުގެ ކުރީގައި އޮތީ ދަގަނޑޭ އާއި ޗެތުރީ އެވެ. ތިން މެޗުން ދެ ކުޅުންތެރިން ވެސް ވަނީ ދެ ގޯލު ޖަހައިފަ އެވެ. މުބާރާތުގައި ދެން އޮތް މެޗުގައި އިންޑިއާ އާއި ރާއްޖެ ބައްދަލުކުރާނެ އެވެ.
