ޓައިޕޭ، ޓައިވާން (އޮކްޓޯބަރު 10) - ޗައިނާ އިން ކުރާ ޕްރެޝަރަށް ޓައިވާނުން ސަޖިދަ ނުޖަހާނެ ކަމަށާއި ޓައިވާނުގެ ޑިމޮކްރެޓިކް ދިރިއުޅުން ދިފާއު ކުރާނެ ކަމަށް އެ ގައުމުގެ ރައީސް ސައި އިންގް ވެން ވިދާޅުވެއްޖެ އެވެ.
ޗައިނާ އިން ދެކޭ ގޮތުގައި ޓައިވާނަކީ ވަކި ރަށެއްގެ ގޮތުގައި އޮންނަ އެ ގައުމުގެ ބަޔެކެވެ. ނަމަވެސް 23 މިލިއަން މީހުންގެ އާބާދީއެއް އޮންނަ ޓައިވާނުން ދެކެނީ އެއީ މިނިވަން ދައުލަތެއް ކަމަށެވެ.
އެހެން ނަމަވެސް ޓައިވާނުން ރަސްމީކޮށް މިނިވަންކަން އިއުލާނުކޮށްފައެއް ނުވެ އެވެ. އެހެންވެ، ކޮންމެ ވަގުތަކު ވެސް ޗައިނާގެ އަޅުވެތިކަމަށް ދާން ޖެހިދާނެ ކަމަށް ޓައިވާން ސަރުކާރުން ދެކެ އެވެ.
"އަޅުގަނޑުމެން ގިނަ ކަންކަން ހާސިލް ކުރާ ވަރަކަށް، ޗައިނާ އިން އަންނަ ޕްރެޝަރު އިތުރުވޭ. ޗައިނާ އިން ކޮށާ މަގުން އަޅުގަނޑުމެން ދާން އެއްވެސް މީހަކަށް މަޖުބޫރެއް ނުކުރެވޭނެ،" ޓައިވާނުގެ ގައުމީ ދުވަހު ދެއްވި ހިތާބުގައި އެ ގައުމުގެ ރައީސް ވިދާޅުވި އެވެ.
އެކަމަނާ ސިފަކުރެއްވި ގޮތުގައި ޓައިވާން މި ވަގުތު އޮތީ "ޑިމޮކްރަސީ ދިފާއު ކުރުމުގެ ފުރަތަމަ ރޮނގުގެ މަތީގަ" އެވެ.
"އަޅުގަނޑުމެން އުއްމީދު ކުރަނީ ޗައިނާއާ އެކު އޮތް ގުޅުން ރަނގަޅު ވާނެ ކަމަށް. އަވަސް އަރުވާލައިގެން އަޅުގަނޑުމެން ކަމެއް ނުކުރާނަން. އެކަމަކު ޓައިވާނުގެ ރައްޔިތުން ޕްރެޝަރާ ހެދި ސަޖިދަ ޖަހާނެ ކަމަށް ދެކިގެން ނުވާނެ,"
ނަވާރަ ސަތޭކަ ސާޅީސް ނުވަ ވަނަ އަހަރު ޗައިނާގެ ދާހިލީ ހަނގުރާމަ ނިމުނު ފަހުން ޗައިނާ އާއި ޓައިވާނުގައި ވެރިކަން ކުރަނީ ވަކިންނެވެ.
ޓައިވާނުގެ ރައީސް ކަމަށް 2016 ވަނަ އަހަރު އިންގް ވެން އިންތިހާބުވެވަޑައިގެންނެވުމާ އެކު ޗައިނާގެ ރައީށް ޝީ ޖިންޕިން ވަނީ ދެ ފަރާތުގެ މެދުގައި އެއްވެސް ރަސްމީ މުއާމަލާތެއް ނުކުރަން ނިންމަވާފަ އެވެ. އޭގެ ފަހުން ޗައިނާ އިން ޓައިވާނަށް ކުރާ އިގްތިސާދީ، އަސްކަރީ އަދި ޑިޕްލޮމެޓިކް ޕްރެޝަރު އިތުރުކުރި އެވެ.
ޓައިވާނާއި ޗައިނާއާ ދެމެދުގައިވާ އަސްކަރީ ގުޅުން 40 އަހަރުގެ ތެރޭގައި ގޯސްނުވާހާ މިންވަރަށް މިހާރު ގޯސްވެފައިވާ ކަމަށް ޓައިވާނުން މިދިޔަ އާދީއްތަ ދުވަހު ބުންޏެވެ.
ޓައިވާނުން އެހެން ބުނީ އޭގެ ދެ ދުވަސް ކުރިން ރިކޯޑު އަދަދަކަށް ޗައިނާގެ ޖެޓުތައް ޓައިވާނުގެ ވައިގެ ސަރަހައްދަށް އެތެރެވި މައްސަލަ ބޮޑުވެފައި ވަނިކޮށެވެ.
ޗައިނާ އުފެދުނުތާ 110 އަހަރު ފުރުން ފާހަގަކުރަން ހޮނިހިރު ދުވަހު ދެއްވި ހިތާބުގައި ޝީ ޖިންޕިން ވިދާޅުވީ ޗައިނާ އާއި ޓައިވާން "ސުލްހަވެރިކަމާ އެކު އަލުން ގުޅާލާނެ" ކަމަށެވެ.
"ސުލްހަވެރިކަމާ އެކު އަލުން ގުޅުމަކީ ޓައިވާން ހިމެނޭ ގޮތަށް މުޅި ގައުމަށް ވެސް އެންމެ ފައިދާ ހުރި ގޮތް. ޓައިވާން މިނިވަންވުމަކީ ޗައިނާ އަށް އޮތް އެންމެ ބޮޑު ގޮންޖެހުން އަދި ފޮރުވިފައިވާ ބޮޑު ނުރައްކަލެއް،" ޝީ ވިދާޅުވި އެވެ.
ޝީ ވިދާޅުވީ "ޗައިނާ އަލުން އެއްކޮށް ގުޅާލަދޭނެ" ކަމަށާއި ޓައިވާނުގައި ބޭރު ސިފައިން އުޅޭ ނަމަ ފިޔަވަޅު އަޅާނެ ކަމަށެވެ. އެމެރިކާ ސިފައިން ޓައިވާނު ފަސްގަނޑުގައި ތިބެ، ޓައިވާނުގެ ސިފައިންނަށް ތަމްރީންދޭކަން ފަޅާއެރީ ބުރާސްފަތި ދުވަހު އެވެ.
ބޭރުގެ ނުފޫޒާ ދެކޮޅަށް ޝީ އިންޒާރު ދެއްވާފައި ވާއިރު، މިދިޔަ ހަފުތާގައި އިނގިރޭސި މަނަވަރެއް ޓައިވާން ސްޓްރެއިޓުން ދަތުރު ކުރި އެވެ. އަދި ފްރާންސްގެ ވަފުދެއް ވަނީ ޓައިވާނަށް ދަތުރުކޮށްފަ އެވެ.
