މަންމައާއެކު ދުވާރު މަތިން ހިނގާފައި ދަނިކޮށް މަތިން ވެއްޓުނު ސިމެންތި ބަސްތާއަކުން ޖެހި މަރުވި އުމުރުން އަށް އަހަރުގެ ރައުޝަން ޖިއާންގެ އާއިލާއަށް 4.5 މިލިއަން ރުފިޔާގެ ބަދަލެއް ޑަބްލިއު ކޮންސްޓްރަކްޝަންގެ ފަރާތުން ނަގައިދިނުމަށް ސިވިލް ކޯޓުން މިދިޔަ މަހު ކުރި ހުކުމް ހައިކޯޓުގައި އިސްތިއުނާފްކޮށްފި އެވެ.
ބަންގްލަދޭޝަށް ނިސްބަތްވާ ޖިއާންގެ މަންމަ ޑރ. ފަރްޒާނާ ހުސެއިން އާއި ބައްޕަ ކަމާލުއްދީން ޖާވިދުއަށް އެ ފައިސާ ދެ މަސް ދުވަހުގެ ތެރޭގައި ދެއްކުމަށް ޑަބްލިއު ކޮންސްޓްރަކްޝަންގެ މައްޗަށް ސިވިލް ކޯޓުގެ ގާޒީ، އަލީ ނަސީރު އަމުރު ކުރީ މިދިޔަ މަހުގެ އެއް ވަނަ ދުވަހު އެވެ.
މަދަނީ މައްސަލަތައް ރަސްމީ 10 ދުވަސްތެރޭގައި އިސްތިއުނާފަށް ހުށަހަޅަން ޖެހޭއިރު މި މައްސަލަ އިސްތިއުނާފަށް ހުށަހަޅާފައި ވަނީ މިދިޔަ މަހުގެ 16 ވަނަ ދުވަހު އެވެ.
ބަދަލު ދޭން ކުރި ހުކުމް އިސްތިއުނާފް ކުރަން ޑަބްލިއު ކޮންސްޓްރަކްޝަނުން ހައި ކޯޓަށް ހުށަހެޅިއިރު، ޖިއާންގެ މައިންބަފައިންގެ ފަރާތުން ދަށު ކޯޓުގައި އެދުނު ބައެއް ބަދަލުތައް ނަގައި ނުދޭން ނިންމާފައިވާތީ އެ ބައި އެ މީހުންގެ ފަރާތުން ވެސް ވަނީ އިސްތިއުނާފް ކޮށްފަ އެވެ.
ޖިއާންގެ އާއިލާއަށް ބަދަލު ނަގައިދީފައި ވަނީ ތިން ކަމެއްގެ މައްޗަށް ބިނާކޮށެވެ. އެއީ ޖިއާން މަރުވުމުގެ ސަބަބުން ދަރިފުޅުގެ ލޯތްބާއި ދެމީހުންގެ ތެރޭގައި އޮންނާނެ ގުޅުން ނެތިދިޔުމުން ލިބުނު ގެއްލުމަށް ނަގައިދިން 1،028،000ރ. އާއި އާއިލާއަށް ލިބުނު ތަދާއި ވޭނުގެ ބަދަލުގެ ގޮތުގައި ނަގައިދިން 2،196،361ރ. އާއި ޖިއާންގެ ދުނިޔޭގައި ހުރި ނަމަ މަސައްކަތްކޮށްގެން ލިބޭނެ ކަމަށް ލަފާ ކުރާ 1،290،361ރ. އާއި ފަރްޒާނާގެ ބޭސް ފަރުވާއަށް ހަރަދުވި 42،318ރ. އެވެ.
ޑަބްލިއު ކޮންސްޓްރަކްޝަންގެ ފަރާތުން އެ ބަދަލު ނަގައިދީފައި މީހަކު ނުވަތަ ބަޔަކު ކުރާ ގާނޫނާ ހިލާފު އަމަލަކުން ލިބޭ ގެއްލުމުގެ ބަދަލު ތިން ވަނަ ޕާޓީއެއްގެ ފަރާތުން ނަގައިދޭ ވައިކޭރިއަސް ލަޔަބިލިޓީގެ އުސޫލުގެ ދަށުންނެވެ.
އެ މައްސަލައިގައި އެ ކުންފުނީގެ ތިން މުވައްޒަފަކު އިހުމާލުވާ ކަމަށް ކަނޑައަޅައި ޖިނާއީ ކޯޓުން ކުރިން ހުކުމްކޮށްފައި އޮތުމުން އެކަމުގައި ޑަބްލިއު ކޮންސްޓްރަކްޝަން ވެސް ޒިންމާ އުފުލަންޖެހޭނެ ކަމަށް ގާޒީ އަލީ ނަސީރު ކަނޑައެޅުއްވި އެވެ.
ޖިއާން މަރުވީ ޑިސެމްބަރު 16، 2018 ގައި އެއިރު ހަދަމުންދިޔަ މ. ނަލަހިޔާ މަންޒިލް ކައިރިން ހިނގާފައި ދަނިކޮށް ބަސްތާއެއް ވެއްޓިގެނެވެ. އެ މަސައްކަތް ކުރަމުންދިޔައީ ޕޭވްމަންޓުގެ ބައެއް ނަގައި، ގަވާއިދާ އެއްގޮތަށް ޖަހަންޖެހޭ ބޯޑުތައް ނުލަ އެވެ.
އެ މައްސަލާގައި ހަ މީހެއްގެ މައްޗަށް 2019 ގައި ދައުލަތުން ޖިނާއީ ދައުވާ ވެސް ކުރި އެވެ. އެއީ ޑަބްލިއު ކޮންސްޓްރަކްޝަންގެ މެނޭޖިން ޑިރެކްޓަރު އާދަމް ޝަފީގާއި ސުޕަވައިޒަރު މޫސާ ހަސަންގެ އިތުރުން އިންޑިއާގެ ހަތަރު މީހެއްގެ މައްޗަށެވެ.
އޭގެ ތެރެއިން ދެ ބިދޭސީއަކު ޖަލަށްލާން ކްރިމިނަލް ކޯޓުން ހުކުމް ކުރިއެވެ. ބާކީ ތިބި ދެ ބިދޭސީންނާއި ސުޕަވައިޒަރުގެ މައްޗަށް އިއްވީ ޖޫރިމަނާގެ އަދަބެކެވެ. އަދި މެނޭޖިން ޑިރެކްޓަރުގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން އޭރު ހުކުމްކުރި އެވެ.
