އުރީދޫ ސާފް ޗެމްޕިއަންޝިޕުގައި މާދަމާ ހަވީރު ދިވެހިރާއްޖެ އާއި ސްރީ ލަންކާ ބައްދަލުކުރާ މެޗުގެ ޓިކެޓު މިއަދު ހެނދުނު ވިއްކަން ފެށިތާ ދެ ގަޑިއިރު ނުވަނީސް ޓިކެޓު ވިކި ހުސްވުމުން ސަޕޯޓަރުން ރުޅިގަދަވެ ހިތްހަމަނުޖެހުން ފާޅުކުރަން ފަށައިފި އެވެ.
ގަލޮޅު ދަނޑުގައި 10،000 ޖާގަ އޮތަސް ކޮވިޑާއި ދަނޑުގެ ސަލާމަތީ ސަބަބުތަކާ ހެދި ވިއްކަނީ 5000 ޓިކެޓެކެވެ. ޓިކެޓް ވިއްކަން ފަށަން އޮތީ ހެނދުނު 10 ޖެހިއިރެވެ. އެކަމަކު ވަރަށް ހެނދުނު ހެނދުނާ މީހުން ކިއޫ އަށް އެރި އެވެ.
އެކަމަކު ވިއްކަން ފެށިތާ މާގިނަ އިރުތަކެއް ނުވަނީސް ޓިކެޓް ވިކި ހުސްވީ ކަމަށް ބުނެ ކައުންޓަރު ބަންދުކުރި އެވެ. އެއާ އެކު ޓިކެޓު ގަންނަން ގޮސް ތިބި ދިވެހީން ނުރުހުން ފާޅުކޮށް ޓިކެޓު ކައުންޓަރު ވަށާލި އެވެ. އަދި އެތަނުން ބައެއް މީހުން ވަނީ ގަދަކަމުން ގަލޮޅު ދަނޑަށް ވަދެ ސިޑިބަރިތަކަށް އަރައި އެފްއޭއެމްގެ ރައީސް ބައްސާމް އަދީލް ޖަލީލްގެ އިސްތިއުފާއަށް ވެސް ގޮވައިފަ އެވެ. އަނެއް ބަޔަކު ދިޔައީ ދަނޑު ބޭރުގައި އިށީނދެ ތިބެގެން ނުރުހުން ފާޅުކުރަމުންނެވެ.
"ތިން ގަޑިއިރު ކިއޫގައި ތިބި މީހުންނަށް ވެސް ނުލިބުނު،" އެތާ ހުރި މީހަކު ބުންޏެވެ.
ކުރީބައިގައި ޓިކެޓު ގަންނަ ގިނަ ބަޔަކު ކިއުއަށް އަރާފައި ވަނީ އެންމެ ފަހުން ކުޅުނު ރާއްޖެ އާއި ބަގްލަދޭޝް މެޗުގެ ޓިކެޓްތައް ވެސް ކުޑަ ވަގުތުކޮޅެއްގެ ތެރޭގައި ހުސްވެ، ކަޅު ބާޒާރުގައި ބޮޑު އަގުގައި ވިއްކާފައި ވާތީ އެވެ.
އެފްއޭއެމްގެ އުސޫލުގައި ވާގޮތުން ކޮންމެ މީހަކަށްވެސް ދޫކުރަނީ ގިނަވެގެން 5 ޓިކެޓެވެ. ޓިކެޓު ދޫކުރަނީ އެ އައިޑީކާޑާއި، ވެކްސިން ދެ ޑޯޒް ފުރިހަމަކޮށްފައިވާ ކާޑްދެއްކުމުންނެވެ.
