ބެއިޖިން، ޗައިނާ (އޮކްޓޯބަރު 9) - ޗައިނާ އާއި ޓައިވާން "ސުލްހަވެރިކަމާ އެކު އަލުން ގުޅާލާނެ" ކަމަށް ޗައިނާގެ ރައީސް ޝީ ޖިންޕިން ހޮނިހިރު ދުވަހު ވިދާޅުވެއްޖެ އެވެ.
މިދިޔަ ހުކުރު ދުވަހު ރިކޯޑު އަދަދަކަށް ޗައިނާގެ ޖެޓުތައް ޓައިވާނުގެ ވައިގެ ސަރަހައްދަށް އެތެރެވި މައްސަލަ ބޮޑުވެފައި ވަނިކޮށް ޝީ އެހެން ވިދާޅުވީ ޗައިނާ އުފެދުނުތާ 110 އަހަރު ފުރުމުން ދެއްވި ހިތާބުގަ އެވެ.
ޗައިނާ އިން ދެކޭ ގޮތުގައި ޓައިވާނަކީ ވަކި ރަށެއްގެ ގޮތުގައި އޮންނަ އެ ގައުމުގެ ބަޔެކެވެ. ނަމަވެސް ޓައިވާނުން ދެކެނީ އެއީ މިނިވަން ދައުލަތެއް ކަމަށެވެ.
އެހެން ނަމަވެސް ޓައިވާނުން ރަސްމީކޮށް މިނިވަންކަން އިއުލާނުކޮށްފައެއް ނުވެ އެވެ. އެހެންވެ، ކޮންމެ ވަގުތަކު ވެސް ޗައިނާގެ އަޅުވެތިކަމަށް ދާން ޖެހިދާނެ ކަމަށް ޓައިވާން ސަރުކާރުން ދެކެ އެވެ.
"ސުލްހަވެރިކަމާ އެކު އަލުން ގުޅުމަކީ ޓައިވާން ހިމެނޭ ގޮތަށް މުޅި ގައުމަށް ވެސް އެންމެ ފައިދާ ހުރި ގޮތް. ޓައިވާން މިނިވަންވުމަކީ ޗައިނާ އަށް އޮތް އެންމެ ބޮޑު ގޮންޖެހުން އަދި ފޮރުވިފައިވާ ބޮޑު ނުރައްކަލެއް،" ޝީ ވިދާޅުވި އެވެ.
ޝީ ހިތާބު ދެއްވިއިރު، 1911 ވަނަ އަހަރު ޗައިނާ އަށް ގެނައި އިންގިލާބުގައި އިސްކޮށް އުޅުނު ސުން ޔެޓް ސެންގެ ބޮޑު ފޮޓޯއެއް ފަހަތުގައު ބަހައްޓާފައި ހުއްޓެވެ.
ޗައިނާގެ ރަސްކަން ވައްޓާލުމަށް ފަހު "ރިޕަބްލިކް އޮފް ޗައިނާ" އުފެއްދީ ސުން އެވެ. ޓައިވާނުގެ ރަސްމީ ނަމަކީ ވެސް "ރިޕަބްލިކް އޮފް ޗައިނާ" އެވެ.
ޓައިވާނުން ޗައިނާއާ ވަކިވީ 1949 ވަނަ އަހަރުގެ ދާހިލީ ހަނގުރާމައިގައި މާއޯ ޒެޑޯންގްގެ ކޮމިއުނިސްޓް ފައުޖަށް ކުރި ލިބުމުން، ފިލަން ދިޔަ މީހުން ޓައިވާނުގައި ވަޒަންވެރިވި ހިސާބުންނެވެ.
ޝީ ވިދާޅުވީ "ޗައިނާ އަލުން އެއްކޮށް ގުޅާލަދޭނެ" ކަމަށާއި ޓައިވާނުގައި ބޭރު ސިފައިން އުޅޭ ނަމަ ފިޔަވަޅު އަޅާނެ ކަމަށެވެ. އެމެރިކާ ސިފައިން ޓައިވާނު ފަސްގަނޑުގައި ތިބެ، ޓައިވާނުގެ ސިފައިންނަށް ތަމްރީންދޭކަން ފަޅާއެރީ ބުރާސްފަތި ދުވަހު އެވެ.
"ޓައިވާން މައްސަލައަކީ ޗައިނާގެ ދާހިލީ މައްސަލައެއް. އެއީ ބޭރުގެ ނުފޫޒަށް ވަދެވޭނެ މައްސަލައެއް ނޫން،" ޝީ ވިދާޅުވި އެވެ.
ޓައިވާނުގެ ރައީސް ކަމަށް 2016 ވަނަ އަހަރު އިންތިހާބުވެވަޑައިގެންނެވި ސައި އިންގް ވެން ވިދާޅުވެފައި ވަނީ ޓައިވާނަކީ މިހާރު ވެސް މިނިވަން ދައުލަތެއް ކަމަށެވެ. އެއާއެކު ޗައިނާއިން ޓައިވާނަށް ކުރާ ޕްރެޝަރު އިތުރުކުރި އެވެ.
ޓައިވާނާއި ޗައިނާއާ ދެމެދުގައިވާ އަސްކަރީ ގުޅުން 40 އަހަރުގެ ތެރޭގައި ގޯސްނުވާހާ މިންވަރަށް މިހާރު ގޯސްވެފައިވާ ކަމަށް ޓައިވާނުން މިދިޔަ އާދީއްތަ ދުވަހު ބުންޏެވެ.
ބޭރުގެ ނުފޫޒާ ދެކޮޅަށް ޝީ އިންޒާރު ދެއްވާފައި ވާއިރު، މިދިޔަ ހަފުތާގައި އިނގިރޭސި މަނަވަރެއް ޓައިވާން ސްޓްރެއިޓުން ދަތުރު ކުރި އެވެ. އަދި ފްރާންސްގެ ވަފުދެއް ވަނީ ޓައިވާނަށް ދަތުރުކޮށްފަ އެވެ.
