ޕެރިސް (އޮކްޓޫބަރު 9) - ވޯލްޑް ކަޕް ކޮލިފައިންގައި ރޭ ކުޅުނު މެޗުތަކުން މޮޅުވެ ޖަރުމަނާއި ނެދަލެންޑްސް އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕަށް ކޮލިފައިވުމުގެ ފުރުސަތު ބޮޑުކޮށްފި އެވެ.
ޖަރުމަނުން ވަނީ ފަހަތުން އަރައި 2-1 އިން ރުމޭނިއާ ބަލިކޮށްފަ އެވެ. ލެޓްވިއާ އަތުން ނެދަލެންޑްސް މޮޅުވީ 1-0 އިންނެވެ. މި ދެ ޓީމަށް ވެސް ކޮލިފައިންގައި ބާކީ ތިން މެޗު އޮތްއިރު، ކޮލިފައިން ގްރޫޕް ޖޭގެ އެއް ވަނައިގައި ޖަރުމަނު އޮތީ ހަ ޕޮއިންޓްގެ ލީޑަކާ އެކު ހަތް މެޗުން 18 ޕޮއިންޓް ހޯދައިގެންނެވެ. ނެދަލެންޑްސް އޮތީ ދެ ޕޮއިންޓްގެ ލީޑަކާ އެކު ގްރޫޕް ޖީގެ އެއް ވަނައިގަ އެވެ. އެއީ ހަތް މެޗުން 16 ޕޮއިންޓާ އެކު އެވެ.
ރޭގެ މެޗުގެ ނުވަ ވަނަ މިނިޓްގައި ޖަރުމަނު ކޮޅަށް ރުމޭނިއާ އިން ވަނީ ގޯލު ޖަހައިފަ އެވެ. ލެޖެންޑަރީ ފޯވާޑް ޖޯޖީ ހާޖީގެ ދަރިފުޅު އިޔަނިސް ހާޖީ މި ގޯލު ޖެހީ ޖަރުމަނުގެ ޑިފެންޑަރު އެންޓޯނިއޯ ރުޑިގާ ކައިރިން ނައްޓާފައި ގޮހެވެ. މެޗުގެ 52 ވަނަ މިނިޓްގައި އޭރިއާބޭރުން ޖެހި ޝޮޓަކުން ސާޖް ގްނަބްރީ ވަނީ ޖަރުމަނަށް އެއްވަރުކޮށްދީފަ އެވެ.
ޖަރުމަނު މޮޅުވި ގޯލު ޖެހީ މެޗު ނިމެން ނުވަ މިނިޓަށް ވެފައި ވަނިކޮށް ތޯމަސް މުލާ އެވެ. މިއީ 2017 ވަނަ އަހަރުގެ ފަހުން ވާދަވެރި މެޗެއްގައި ޖަރުމަނަށް މުލާ ޖަހައިދިން ފުރަތަމަ ގޯލެވެ. މުލާ މި އަހަރުގެ ޔޫރޯ ސްކޮޑަށް ނެގީ ދެ އަހަރުގެ މެދުކެނޑުމަކަށް ފަހު އެވެ.
ޔޫރޯ އަށް ފަހު ޖަރުމަނު ކޯޗުކަމާ ހަވާލުވި ހަންސީ ފްލިކްގެ އިރުޝާދުގެ ދަށުން އެ ޓީމު ކުޅުނު ހަތަރު މެޗުން ވެސް ވަނީ މޮޅުވެފަ އެވެ. ފްލިކް ބުނީ އާދައިގެ ގޮތަކަށް ފުރަތަމަ ގޯލު ޖަރުމަނު ކޮޅަށް ވަނުމުން ހިތްހަމަނުޖެހުނު ކަމަށާއި އަލުން މޮޅުވާން ކުޅުންތެރިން ކުރި މަސައްކަތުން ލިބުނީ ހައްގު ތިން ޕޮއިންޓް ކަމަށެވެ.
ލެޓްވިއާ ދަނޑުގައި ރޭ ކުޅުނު މެޗުގައި ނެދަލެންޑްސް އަށް ލަނޑު ޖަހާނެ ގިނަ ފުރުސަތުތަކެއް ލިބި ބޭނުމެއް ނުކުރެވުނެވެ.
މި މެޗުގައި ނެދަލެންޑްސްގެ ހަމައެކަނި ގޯލު ޖެހީ 19 ވަނަ މިނިޓްގައި ޑޭވީ ކްލާސެން އެވެ. އަޔަކްސް އަށް ކުޅޭ ކްލާސެން މި ގޯލު ޖެހީ މެމްފިސް ޑިޕާއި ނެގި ކޯނަރަކުންނެވެ. ކްލާސެން ޖެހި ވޮލީ ހުއްޓުވަން ލެޓްވިއާ ގޯލްކީޕަރު ރޮބާޓް އޮޒޯލް އަށް މާ ބޮޑު ކަމެއް ނުކުރެވުނެވެ.
އާ ކޯޗު ލުއީ ވެން ހާލް ހަވާލުވި ފަހުން ނެދަލެންޑްސް އިން ވެސް އަންނަނީ ރަނގަޅު ނަތީޖާތަކެއް ނެރެމުންނެވެ.
ކޮލިފައިންގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ޗެކް ރިޕަބްލިކާއި ވޭލްސް ވަނީ 2-2 އިން އެއްވަރުވެފަ އެވެ. އަދި އައިސްލެންޑާއި އާރްމީނިއާ ކުޅުނު މެޗު ވެސް ނިމުނީ 1-1 އިން އެއްވަރުވެގެންނެވެ.
