ނިއުކާސަލް (އޮކްޓޫބަރު 9) - ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން އިނގިރޭސި ޕްރިމިއާ ލީގުގެ ކްލަބް، ނިއުކާސަލް ޔުނައިޓެޑް ގަނެފައިވާއިރު، ކުރިއަށް އޮތް ޓްރާންސްފާ މާކެޓްގައި އެ ޓީމަށް ބޮޑު އިންވެސްޓްމަންޓެއް ކުރުމުގެ ފުރުސަތު ފަހިވެއްޖެ އެވެ.
ޕީއައިއެފް އިން މެޖޯރިޓީ ހިއްސާާާއާ އެކު ނިއުކާސަލް ގަންނަން ޖުމްލަ 408 މިލިއަން ޑޮލަރު ހޭދަކުރި އެވެ. ނިއުކާސަލްގެ މެޖޯރިޓީ ހިއްސާ އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ.
މައިކް އެޝްލީ އަތުން ޕީއައިއެފް އިން ނިއުކާސަލް ގަތްއިރު، އެ ކްލަބްގެ މާލީ ހާލަތު މިހާރު ވަނީ ދިރާސާކޮށްފަ އެވެ. އޭގެއިން އެނގުނު ގޮތުގައި ކްލަބްގެ މާލީ ކަންކަން އޮތީ ވަރަށް ތަނަވަސް ކޮށެވެ. ނިއުކާސަލްގެ ދަރަނި އޮތީ ކޮންޓްރޯލް ކުރެވިފަ އެވެ.
ފައިނޭންޝިއަލް ފެއާޕްލޭ (އެފްއެފްޕީ) ގަވާއިދު ބުނާގޮތުން ކްލަބެއްގެ ޖުމްލަ ދަރަނި ފާއިތުވި ތިން އަހަރު ޖުމްލަ އެއްކުރާއިރު 143 މިލިއަން ޑޮލަރަށް ވުރެ އިތުރުނުވާނަމަ ކްލަބް ހިންގާ ކުންފުނީގެ މިލްކިއްޔާތުގައި ހުންނަ ނިސްބަތުން ކްލަބްގެ އާމްދަނީ ލިބޭނެ އިންސައްތަ އަކަށް ބަލާފައި ވަކި ވަރެއް ޓްރާންސްފާ މާކެޓްގައި ހަރަދުކުރެވޭނެ އެވެ.
ނިއުކާސަލްއާ އާ މެނޭޖްމަންޓަކުން ހަވާލުވިއިރު، ކްލަބް މާލީ ގޮތުން ރަނގަޅު ހާލަތެއްގައި އޮތުމުން ޕްރިމިއާ ލީގުގެ ޓީވީ ރައިޓްސްގެ އާމްދަނީ އަންދާޒާކޮށް ލިބޭނެ ވަރަކަށް ބަލައި ރަނގަޅު އަދަދެއް ހަރަދުކުރަން ލިބޭނެ އެވެ. އެ އުސޫލުން ބަލާކަމަށްވާނަމަ ޖެނުއަރީ މަހުގެ ޓްރާންސްފާ މާކެޓްގައި ނިއުކާސަލް އަށް 272 މިލިއަން ޑޮލަރު ހަރަދުކުރުމުގައި އެއްވެސް ހުރަހެއް ނެތެވެ.
ނިއުކާސަލްގެ މެޖޯރިޓީ ހިއްސާދާރުން ކަމަށްވާ ޕީއައިއެފްގެ ގަވަރުނަރު ޔާސިރް އަލް ރުމައްޔާން ވިދާޅުވީ ނިއުކާސަލް އަކީ އިނގިރޭސި ވިލާތުގެ ގިނަ ބަޔަކު ސަޕޯޓްކުރާ ކްލަބެއް ކަމަށެވެ. އަދި މިއީ ނިއުކާސަލްގެ ތާރީހު ބަދަލުކުރަން މަސައްކަތް ފަށަންވީ ވަގުތު ކަމަށް ރުމައްޔާން ވިދާޅުވި އެވެ.
ނިއުކާސަލްގެ އާ ބޯޑުން ޓާގެޓްކޮށްފައިވަނީ 10 އަހަރު ތެރޭ އިންގްލެންޑްގެ ޗެމްޕިއަންކަން ހޯދައި ޔޫރަޕްގެ ބާރަކަށް ވުމަށެވެ.
މި ވަގުތު ނިއުކާސަލްގެ ކޯޗުކަމާ ހަވާލުވެ ހުރި ސްޓީވް ބްރޫސްގެ މުސްތަގުބަލާ ބެހޭގޮތުން ވާހަކަ ދައްކަން އެ ކްލަބްގެ ބޯޑުން ބޭނުމެއް ނުވެ އެވެ. ރިޕޯޓްތައް ބުނާގޮތުން އިނގިރޭސި ޕްރިމިއާ ލީގުގައި ދެން އެންމެ އަވަހަށް ކޯޗު ބަދަލުވާނެ ކްލަބަކީ ނިއުކާސަލް އެވެ. ބްރޫސްގެ ބަދަލުގައި ނިއުކާސަލް އިން ހޯދަން މަސައްކަތްކުރާ ކޯޗުންގެ ތެރޭގައި ރޭންޖާސްގައި ހުރި ސްޓީވެން ޖެރާޑް ހިމެނެ އެވެ.
