މިހާރު ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖޭގެ ގައުމީ ޓީމު ކުޅޭ ހުރިހާ މެޗެއް ސްޓެލްކޯގެ އިމާރާތުގައި އަޅުވާފައި ހުންނަ ބޮޑު "މާޓީވީ" އިން ދައްކާނެ ކަމަށް އެކުންފުނިން ބުނެފި އެވެ.
ސާފް ޗެމްޕިއަންޝިޕް މުބާރާތާ ގުޅުވައި ރާއްޖޭގައި ގައުމީ ރޫހު އިތުރުކުރުމުގެ ގިނަ މަސައްކަތްތަކެއް ދަނީ ކުރަމުންނެވެ. ސްޓެލްކޯގެ މާޓީވީގައި ގައުމީ ޓީމުގެ މެޗުތައް ވަގުތުން ބެލޭނެ އިންތިޒާމު ހަމަޖެއްސުމުގެ ބޭނުމަކީ ވެސް ގައުމީ ރޫހު އިތުރުކުރުން ކަމަށް އެ ކުންފުނިން ބުނެ އެވެ.
ސްޓެލްކޯގެ މާޓީވީގައި މެޗުތައް އެޅުވުމުގެ އަނެއް ބޭނުމަކީ ދަނޑަށް ނުދެވޭ މީހުންނަށް ވެސް ގިނަ ބަޔަކު އެކުގައި ތިބެ މެޗުތައް ބެލޭނެ ފުރުސަތު ހޯދައިދިނުން ކަމަށް އެކުންފުނިން ބުނެ އެވެ.
ސްޓެލްކޯއިން ހުރީ ގައުމީ ޓީމާ އެކު ކަމަށާއި މިފަދަ ކަންކަމުގައި ބައިވެރިވެ ރައްޔިތުންނަށް ފަސޭހަކޮށްދިނުމަކީ އެކުންފުނީގެ އަމާޒުކަމަށް ވެސް އެ ކުންފުނިން ބުނެ އެވެ.
ސާފް ޗެމްޕިއަންޝިޕްގައި މިރޭ ރާއްޖޭގެ ގައުމީ ޓީމުން ބައްދަލުކުރާނީ ބަންގްލަދޭޝްގެ ގައުމީ ޓީމާ އެވެ. މި މެޗު ބޮޑުތަކުރުފާނު މަގުގައި ހުންނަ ސްޓެލްކޯގެ މާޓީވީ އިން ވަގުތުން ބެލޭނެ އެވެ.
