ހާރިޖީ ސިޔާސަތުގެ ދިފާއުގައި ޝާހިދުގެ އައްޑަނައަކަށް ބޮޑު ތަކުރުފާނުގެ ނަމޫނާ

ހާރިޖީ ވަޒީރު އަބްދުﷲ ޝާހިދު: މިރޭ ބޭއްވި ގައުމީ ދުވަހުގެ ޖަލްސާގައި އެ މަނިކުފާނަށް ވަނީ ނިޝާން އިއްޒުއްދީން ޝަރަފު އަރުވާފައި. -- ފޮޓޯ: ޕްރެސިޑެންސީ މޯލްޑިވްސް

ހާރިޖީ ވަޒީރު އަބްދުﷲ ޝާހިދު: މިރޭ ބޭއްވި ގައުމީ ދުވަހުގެ ޖަލްސާގައި އެ މަނިކުފާނަށް ވަނީ ނިޝާން އިއްޒުއްދީން ޝަރަފު އަރުވާފައި. -- ފޮޓޯ: ޕްރެސިޑެންސީ މޯލްޑިވްސް

ގިނަ ގައުމުތަކާ ގުޅުން ބާއްވަން ރައީސް ސޯލިހުގެ ސަރުކާރުން ގެންގުޅޭ ހާރިޖީ ސިޔާސަތަކީ މުހައްމަދު ތަކުރުފާނު (ބޮޑު ތަކުރުފާނު) އުފެއްދެވި ގައުމިއްޔަތުގެ އަސާސްތަކާ އެއްގޮތް ސިޔާސަތެއް ކަމަށް ހާރިޖީ ވަޒީރު އަބްދުﷲ ޝާހިދު ވިދާޅުވެއްޖެ އެވެ.

ގައުމީ ދުވަސް ފާހަގަކުރަން މިރޭ ބޭއްވި ޖަލްސާގައި ތާރީހުން މިސާލު ނަންގަވަމުން ޝާހިދު ވިދާޅުވީ، އަވައްޓެރި ގައުމުތަކާ ގުޅުން ބާއްވައިގެން އެ ފަރާތްތަކުގެ އެހީ ބޮޑު ތަކުރުފާނު ހޯއްދެވި ކަމަށެވެ.

"ބޭރުގެ ފަރާތްތަކާ ގުޅިގެން އެކަތިގަނޑަކަށް ވެގެން ބާރު އެޅި، އެ މަހާރަދުން އުޅުއްވީ އަވައްޓެރި ގައުމުތަކާ ގުޅިގެން އެކުވެރިވެގެން," ޝާހިދު ވިދާޅުވި އެވެ.

އިދިކޮޅު ފަރާތްތަކަށް ނުސީދާކޮށް ބަހުގެ ހަމަލާތަކެއް އަމާޒުކުރައްވަމުން ޝާހިދު ވިދާޅުވީ ބައިނަލްއަގުވާމީ މައިދާނުން އެކަހެރިވެގެން އުޅެން ގޮވާލާ ފަރާތްތަކުން އެ ވަކާލާތުކުރަނީ ބޮޑު ތަކުރުފާނުގެ ގައުމިއްޔަތާ ދެކޮޅަށް ކަމަށެވެ.

އަދި ވިދާޅުވީ އެއީ ގިނަ ގައުމުތަކާ ގުޅިގެން އެކަތިގަނޑަކަށް ވެގެން މަސައްކަތް ކުރަން ބާރުއަޅާ މަލްޓިލެޓެރަލިޒަމްގެ ސިޔާސަތާ ހިލާފު ކަމެއް ކަމަށެވެ.

އޭގެ އިތުރުން ރާއްޖޭގެ މިނިވަންކަން ގެއްލުވާލަން މި ސަރުކާރުން މަސައްކަތް ކުރާ ކަމަށް ކުރާ ތުހުމަތުތަކަށް ރައްދުދެއްވަމުން ޝާހިދު ވިދާޅުވީ ރާއްޖޭގެ މިނިވަންކަން ދުވަހަކުވެސް ފިލައިގެން ނުދާނެ ކަމަށެވެ.

"މި ރާއްޖޭގެ މިނިވަންކަން ދަމަހައްޓަން، ޖިހާދުވީ ބޭފުޅުންނާއި މިނިވަންކަން ހޯއްދަވައިދެއްވި ބޭފުޅުންގެ މަތިވެރި ޒިކުރާ އަދާކުރަނިކޮށް. މިނިވަންކަން ދުވަހަކުވެސް ރާއްޖެއިން ފިލައިގެން ނުދާނެ." ޝާހިދު ވިދާޅުވި އެވެ.

އދ.ގެ އާންމު މަޖިލީހުގެ ރައީސްގެ ހައިސިއްޔަތުން ރާއްޖެއަށް ރަސްމީ ދަތުރެއް ޝާހިދު ކުރައްވަމުންދާއިރު, އެ މަގާމާއެކު ރާއްޖެއަށް ޝާހިދު ހޯއްދެވި ޝަރަފާއި ފަހުރުގެ އަގު ވަޒަންކުރުމުގެ ގޮތުން ދައުލަތުގެ އެންމެ މަތީ އިއްޒަތް ކަމަށްވާ ނިޝާން އިއްޒުއްދީން އިއްޒަތުގެ ލަގަބު މިރޭ ވަނީ އަރުވާފަ އެވެ.

ރައީސް އިބްރާހިމް މުހައްމަދު ސޯލިހު, އެ އިއްޒަތް ޝާހިދަށް އަރުވަން ނިންމެވީ އދ. އާންމު މަޖިލީހުގެ ރައީސް ކަމުގެ މަގާމަށް އިންތިހާބުވެވަޑައިގެން ގައުމަށް ހޯއްދަވައިދެއްވި ފަހުރާއި ޝަރަފަށްޓަކަ އެވެ.

ނިޝާނުގެ އިއްޒަތަކީ އެމީހެއްގެ ގައުމީ ހިދުމަތް ފާހަގަކުރުމުގެ ގޮތުން ނުވަތަ ބައިނަލްއަގްވާމީ ހިދުމަތް ވަޒަންކުރުމުގެ ގޮތުން ދައުލަތުގެ ފަރާތުން އަރުވާ އިއްޒަތެކެވެ. ނިޝާން އިއްޒުއްދީނުގެ އިއްޒަތުގެ ވެރިކަން (ނ.ޢ.ޢ.ވ) ނިސްބަތްކުރެވެނީ އައްސުލްޠާނުލް ޣާޒީ ހަސަން އިއްޒުއްދީން، ސިރީ ކުލަރަންމީބަ ކައްތިރި ބަވަނަ މަހާރަދުންނަށެވެ.

އެ ސުލްތާންއަކީ މިނިސްޓަރު ޝާހިދުގެ ހަވަަނަ ކާފާފުޅެވެ.

ޝާހިދަށް ލަގަބު އެރުއްވުމަށްފަހު, ރައީސް ސޯލިހު ވަނީ އދ.ގެ އާންމު މަޖިލީހުގެ ރިޔާސަތު މިހާރު ބަލަހައްޓަވަމުން ގެންދަވާ ޝާހިދަށް ވަރަށް ބޮޑަށް ތައުރީފު ކުރައްވާފަ އެވެ.

ރައީސް ވިދާޅުވީ ޝާހިދު ދިވެހި ގައުމަށް، ހާއްސަކޮށް ރާއްޖޭގެ ހާރިޖީ ދާއިރާއަށް ކޮށްދެއްވި ހިދުމަތްތަކާއި، ރާއްޖެއާއި އެހެން ގައުމުތަކާއެކު ގުޅުން ބަދަހިކުރައްވައި، ބޭރު ދުނިޔޭގައި ރާއްޖޭގެ ގަދަރާއި ހައިބަތު އުފުއްލެވުމަށް ގިނަ މަސައްކަތްތަކެއް ކުރެއްވި ކަމަށެވެ.

ސަރުކާރުން މަސައްކަތްކުރަމުން އަންނަނީ ރާއްޖެ އާއި ބައިނަލްއަގްވާމީ މުޖްތަމައާ ދެމެދު ވަރަށް ބަދަހި ގުޅުމެއް ދެމެހެއްޓުމަށް ކަމަށާއި ސަރުކާރުގެ މި ސިޔާސަތު ތަންފީޒު ކުރެއްވުމުގައި، ޝާހިދު ކޮށްދެއްވި އަދި މިހާރުވެސް ކޮށްދެއްވާ މަސައްކަތަކީ ތައުރީފް ހައްގު މަސައްކަތެއް ކަމަށް ރައީސް ވިދާޅުވި އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox