މިހާރު ކުރިއަށްދާ ސާފް ޗެމްޕިއަންޝިޕް މުބާރާތުގައި މާދަމާ ކުޅެން ހަމަޖެހިފައިވާ ދެ މެޗު ބެލުމަށް ދަނޑަށް ނުދެވޭ މީހުންނަށް ލެޑް ސްކްރީނުގައި މެޗު ބެލުމުގެ ފުރުސަތު އުރީދޫ މޯލްޑިވްސްއިން ފަހިކޮށްދީފި އެވެ.
ސާފް ޗެމްޕިއަން ޝިޕްގައި މާދަމާ ކުޅެން ހަމަޖެހިފައި ދެ މެޗުގެ ތެރެއިން ހަވީރުގެ މެޗަކީ އިންޑިއާ އާއި ސްރީ ލަންކާ ބައްދަލުކުރާ މެޗެވެ. މާދަމާ ރޭ ގަލޮޅު ދަނޑުގައި ކުރިއަށް ދާނީ ރާއްޖެ އާއި ބަންގްލަދޭޝް ބައްދަލުކުރާ މެޗެވެ.
އުރީދޫ އިން ވަނީ މެޗު ބަލަން ދަނޑަށް ދިއުމުގެ ފުރުސަތު ނުލިބޭ ފަރާތްތަކަށް އެންމެން އެތަނެއްގައި ތިބެ މެޗު ބެލުމުގެ ފުރުސަރު ދިނުމަށް ސޯޝަލް ސެންޓަރުގެ ލެޑް ސްކްރީންގައި މާދަމާގެ ދެ މެޗުވެސް ވަގުތުން ދައްކަން ނިންމާފަ އެވެ.
އުރީދޫ އިން މިހާރު ވަނީ އެ ސަރަހައްދު އެކަމަށް ތައްޔާރުކުރުމުގެ މަސައްކަތް ކުރަމުންނެވެ. މިކަމަކީ އުރީދޫއިން މިނިސްޓްރީ އޮފް ކޮމިއުނިޓީ އެމްޕަވަމެންޓާ ގުޅިގެން ކުރާ ކަމެކެވެ.
ސޯޝަލް ސެންޓަރުގައި މެޗު ބެލުމުގެ ފުރުސަތު މާލޭގައި އުޅޭ ހުރިހާ އެންމެންނަށް ވަނީ ހުޅުވާލާފަ އެވެ.
އުރީދޫއިން އިސްނަގައިގެން ލެޑް ސްކްރީންގައި މެޗު ލައިވް ސްޓްރީމްކުރަން ނިންމާފައި މިވަނީ މާދަމާ ރޭ ރާއްޖެއާ ބަންގްލަދޭޝް ބައްދަލުކުރާ މެޗުގައި އަވޭ ޓީމަށް ވިއްކަން ހަމަޖެހިފައިވާ ހުރިހާ ޓިކެޓެއް ވިކި އަދިވެސް ގިނަ އަދަދެއްގެ ބަޔަކު މެޗު ބަލަން ދަނޑަަށް ބޭނުންވެފައިވާ ވަގުތެއްގަ އެވެ.
އުރީދޫއިން ވަނީ ސޯޝަލް ސެންޓަރަށް މެޗު ބަލަން ދާއިރު ކޮވިޑް-19 ގެ ސަބަބުން ހެލްތު ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ހުރިހާ އެންމެންވެސް އަމަލުކުރަން އިލްތިމާސްކޮށްފަ އެވެ.
