ޓައިޕޭ، ޓައިވާން (އޮކްޓޯބަރު 6) - ޓައިވާނާއި ޗައިނާއާ ދެމެދުގައިވާ އަސްކަރީ ގުޅުން 40 އަހަރުގެ ތެރޭގައި ގޯސްނުވާހާ މިންވަރަށް މިހާރު ގޯސްވެފައިވާ ކަމަށް ޓައިވާނުން ބުނެފި އެވެ.
"އަސްކަރީ ގޮތުން ބަލާ ނަމަ، މިހާރު މި އޮތް ހާލަތަކީ އަޅުގަނޑު އަސްކަރީ ހިދުމަތާ ގުޅުން ފަހުން ފާއިތުވި 40 އަހަރުގެ ތެރޭގައި އެންމެ ގޯސް ހާލަތު،" ޓައިވާނުގެ ޑިފެންސް މިނިސްޓަރު ޗިއު ކުއޮ-ޗެންގް ވިދާޅުވި އެވެ.
މިދިޔަ ހުކުރު ދުވަހު ޗައިނާގެ ގައުމީ ދުވަސް ފާހަގަކުރި ފަހުން ރިކޯޑު އަދަދަކަށް އެއް ފަހަރާ 150 އަސްކަރީ ޖެޓު ވަނީ ޓައިވާނުގެ ވައިގެ ދިފާއީ ޒޯނުން ދަތުރުކޮށްފަ އެވެ.
އެ މައްސަލާގައި ޓައިވާނުގެ ރައީސް ސައި އިންގް-ވެން އަދި އެ ގައުމަށް އެންމެ ބޮޑަށް އެއްބާރުލުންދޭ އެމެރިކާ އިން ވަނީ ކަންބޮޑުވުން ފާޅުކޮށްފަ އެވެ.
ޗައިނާ އިން ދެކޭ ގޮތުގައި ޓައިވާނަކީ އެ ގައުމުގެ ބަޔެކެވެ. ނަމަވެސް ޓައިވާނުން ބުނަނީ އެއީ މިނިވަން ދައުލަތެއް ކަމަށެވެ. ބާރުގެ ބޭނުންކޮށްގެން ނަމަވެސް، ޓައިވާނު، ޗައިނާގެ ދަށަށް ގެންދަން ޗައިނާ އިން ބޭނުންވެ އެވެ.
ޗައިނާގެ ރައީސް ޝީ ޖިންޕިން މިދިޔަ ހަފުތާގައި ޓައިވާނުގެ އިދިކޮޅު ލީޑަރަށް ފޮނުއްވި ސިޓީއެއްގައި ވިދާޅުވީ ގުޅުން ވަރަށް ގޯސްވެއްޖެ ކަމަށާއި ޓައިވާނު "ހިފުން ނުހުއްޓުވޭނެ" ކަމަށެވެ.
ޓައިވާނުގެ ޑިފެންސް މިނިސްޓަރު ޗިއު ވިދާޅުވީ "ނުބައިކޮށް ކަލްކިއުލޭޓް ކުރެވި" ގޯސް ނިންމުމެއް ނިންމައިފި ނަމަ ޓައިވާނު ސްޓްރެއިޓްގައި "ކާރިސާއެއް" އުފެދޭނެ ކަމަށާއި 2025 ގައި ޗައިނާ އިން ޓައިވާނަށް ހަމަލާ ދޭނެ ކަމަށް ބެލެވޭ ކަމަށެވެ.
ޓައިވާނުގެ ރައީސް ސައި 2016 ވަނަ އަހަރު ވެރިކަމަށް ވަޑައިގެންނެވުމާއެކު ޗައިނާ އިން ވަނީ އަސްކަރީ، ޑިޕްލޮމެޓިކް އަދި އިގްތިސާދީ ޕްރެޝަރު ކުރުން އިތުރުކޮށްފި އެވެ.
އަންގާރަ ދުވަހު ޝާއިއު ކުރި ލިޔުމެއްގައި ސައި ވިދާޅުވީ ނުރައްކާތަކުން ޓައިވާން ރައްކާތެރި ކުރަން ހުރިހާ ކަމެއް ކުރައްވާނެ ކަމަށާއި ނަމަވެސް ޗައިނާއާ އެކު ސުލްހަވެރިކަމާއެކު ދެމިއޮތުމަށް އުއްމީދު ކުރައްވާ ކަމަށެވެ.
