ހައިކޯޓަށް މައްސަލައެއް ހުށަހެޅުމާއެކު, އޭގެ މައުލޫމާތު ވެބްސައިޓުން ފެންނަން ހުންނަ ގޮތް ހަދައި, އެ ކޯޓުގެ އާ ވެބްސައިޓް ލޯންޗުކޮށްފި އެވެ.
އިއްޔެ ފާހަގަކުރި ހައިކޯޓުގެ 41 ވަނަ އަހަރީ ދުވަހާ ގުޅިގެން ލޯންޗުކުރި އާ ވެބްސައިޓްގައި ގިނަ މައުލޫމާތުތަކެއް ފެންނާނެ ފީޗާތައް ވަނީ ހިމަނާފަ އެވެ.
އެގޮތުން, ހައިކޯޓުގެ ރަޖިސްޓްރީގެ ނަމުގައި އާ ފީޗާއެއް ވަނީ ހިމަނާފަ އެވެ.
މި ފީޗާގެ ދަށުން ހައިކޯޓަށް މައްސަލައެއް ހުށަހެޅުމާއެކު ވެބްސައިޓުން ފެންނަން ހުންނާނެ އެވެ. އަދި, އެ މައްސަލައެއްގެ ސްޓޭޓަސް ވެސް އެނގެން ހުންނާނެ އެވެ.
"މިހެން މި މައުލޫމާތު ފެންނަން ހުރުމުން މައްސަލައެއް އިސްތިއުނާފަށް ހުށަހަޅާފައިވާކަން އެ މައްސަލައެއް ރައްދުވާ ފަރާތަށް ވެސް އެނގިގެން ދާނެ," ހައިކޯޓުގެ އޮފިޝަލަކު ވިދާޅުވި އެވެ.
މި މައުލޫމާތު އެހެން ކޯޓަކުން އަދި ހާމަކުރަން ނުފަށަ އެވެ.
އޭގެއިތުރުން ހުއްދައިގެ މައްސަލަތަކާއި ރަޖިސްޓްރާގެ ނިންމުންތައް އަދި އެ ނިންމުން ރިވިއުކޮށް ނިންމި ގޮތުގެ މައްސަލަތައް ވެސް ވެބްސައިޓްގައި ގަވައިދުން އަޕްޑޭޓް ކުރަމުންދާނެ ކަމަށް އޮފިޝަލް ވިދާޅުވި އެވެ.
ކޯޓުތަކުން ނިންމާ ކޮންމެ ނިންމުމެއް އާންމުކޮށް ފެންނަން ހުންނާނެ ގޮތަށް ހެދުމަކީ ގާނޫނުން ލާޒިމްކޮށްފައިވާ ކަމެކެވެ.
ހައިކޯޓުގެ އާ ވެބްސައިޓްގައި ތަފާސް ހިސާބުތައް ވެސް ލައިވްކޮށް ފެންނަން ހުންނާނެ އެވެ.
"ވަގުތުން ވަގުތަށް ތަފާސްހިސާބުތައް ދާނީ އަޕްޑޭޓްވަމުން, މިއީ ވަރަށް މުހިންމު މައުލޫމާތަކަށް ވާނެ ކަމަށް ގަބޫލުކުރަން," އޮފިޝަލް ވިދާޅުވި އެވެ.
ވެބްސައިޓުން މައުލޫމާތު ހޯދުމަށް ފަސޭހައަކަށް ގަޒިއްޔާ ނަންބަރު, ދައުވާކުރާ ނުވަތަ ލިބޭ ފަރާތުގެ ނަން, މައްސަލައިގެ ބާވަތް, ނިންމި ކޯޓު އަދި ކީވޯޑްތަކުން ސާޗުކުރެވޭ ގޮތް ވެސް ވަނީ ހިމަނާފަ އެވެ.
