މި އަހަރުގެ ދަނޑުވެރިންގެ ދުވަސް ފާހަގަކުރުމަށް ބާއްވާ ހަރަކާތްތަކުގައި ބައިވެރިވެވަޑައިގަތުމަށް ރައީސް އިބްރާހިމް މުހައްމަދު ސޯލިހު ތ. ކަނޑޫދުއަށް ވަޑައިގަންނަވަން ހަމަޖެހިފައިވާކަން އެނގިއްޖެ އެވެ.
މިމަހުގެ 15 ވަނަ ދުވަހު ކަނޑޫދޫގައި ފާހަގަކުރާ ދަނޑުވެރިންގެ ދުވަހަށް ރައީސް ސޯލިހު އެ ރަށަށް ވަޑައިގަތުމަށް ހަމަޖެހިފައިވާކަން ރައީސް އޮފީހުން އަދި ޔަގީންކޮށް ދީފައިނުވި ނަމަވެސް، އެ ދަތުރުފުޅު ކުރައްވާކަން ސަރުކާރުގެ އިސް އޮފިޝަލަކު ވަނީ މި ނޫހަށް ކަށަވަރުކޮށްދީފަ އެވެ.
ކޮންމެ އަހަރެއްގެ އޮކްޓޯބަރު 15 ވަނަ ދުވަހަކީ ގައުމީ ދަނޑުވެރިންގެ ދުވަސްކަމުގައި ރައީސް ސޯލިހު ހަމަޖެއްސެވީ މިދިޔަ އަހަރުގެ ތެރޭގަ އެވެ. މިއީ އޭގެ ފަހުން ފާހަގަ ކުރާ ފުރަތަމަ ދަނޑުވެރިންގެ ދުވަހެވެ. އޮކްޓޯބަރު 15، ގައި ދަނޑުވެރިންގެ ދުވަސް ފާހަގަ ކުރަން ނިންމީ އެއާ ވިދިގެން އަންނަ ދުވަހު ފާހަގަކުރާ ބައިނަލްއަގްވާމީ ކާބޯތަކެތީގެ ދުވަހާ ގުޅުވައިގެންނެވެ.
މި އަހަރުގެ ބައިނަލްއަގްވާމީ ކާބޯތަކެތީގެ ދުވަހާ ދަނޑުވެރިންގެ ދުވަސް ވެސް ކަނޑޫދޫގައި ފާހަގަކުރުމަށް ރައީސް ސޯލިހު ނިންމެވީ މިދިޔަ އޯގަސްޓު މަހުގެ ތެރޭގައި ތ. އަތޮޅުގެ ރަށްރަށަށް ކުރެއްވި ޒިޔާރަތެއްގަ އެވެ.
ދަނޑުވެރިކަމަށާއި އަދި ވަކިން ހާއްސަކޮށް އެ ރަށުން އުފައްދާ މިރުހަށް ނަން މަޝްހޫރު ކަނޑޫދޫގައި މި އަހަރުގެ ދަނޑުވެރިންގެ ދުވަސް ކުލަގަދަކޮށް ފާހަގަކުރަން ނިންމައި އެރަށުގައި މިހާރު ވެސް ދަނީ ތައްޔާރީތަކެއް ވަމުންނެވެ.
ކަނޑޫދޫ ކައުންސިލް ރައީސް އަހުމަދު ރީހާން ވިދާޅުވީ ދަނޑުވެރިންގެ ދުވަހަށް ރައީސް ކަނޑޫދުއަށް ވަޑައިގަންނަވަން ހަމަޖެހިފައިވަނީ އެދުވަހުގެ ހަވީރުގެ ވަގުތެއްގަ އެވެ.
އަދި އެމަނިކުފާނު ރަށަށް ފައިބައިވަޑައިގެން އެ ރަށުގައި ތައްޔާރުކޮށްފައިވާ ނަމޫނާ ދަނޑެއް އިފްތިތާހު ކުރައްވާނެ ކަމަށް ވެސް ރީހާން ވިދާޅުވި އެވެ.
"އޭގެ ފަހުން ދެން [އިފްތިތާހު ކުރާނީ] ކާބޯތަކެތީގެ މައުރަޒެއް. އެ މައުރަޒަށް ވެސް ރައީސް ވަޑައިގަތުމަށް ހަމަޖެހިފައި އޮތީ. ދެން އެރޭ 9:00 ޖަހާއިރު އޮންނާނެ ދުވަހާ ގުޅިގެން ބާއްވާ ހާއްސަ ޖަލްސާއެއް. އެ ޖަލްސާ ނިންމަވާލެއްވުމަށްފަހު ރައްޔިތުންގެ ފަރާތުން ދޭ ޖާފަތެއް ދެން އޮންނާނީ. ރައީސް ވަޑައިގަންނަވަން ހަމަޖެހިފައި ވަނީ ޖަފަތަށް،" ރީހާން ވިދާޅުވި އެވެ.
ރީހާން ވިދާޅުވި ގޮތުގައި ޖާފަތަށްފަހު ރައީސް އަނބުރާ މާލެ ވަޑައިގަތުމަށް ވަނީ ހަމަޖެހިފަ އެވެ.
އެހެންނަމަވެސް ދަނޑުވެރިންގެ ދުވަހާ ޖެހިގެން އަންނަ ކާބޯތަކެތީގެ ދުވަހުގައި ވެސް ކަނޑޫދޫގައި ހާއްސަ ހަރަކާތްތަކެއް ކުރިޔަށް ގެންދަން ހަމަޖެހިފައިވާކަމަށް ރީހާން ވިދާޅުވި އެވެ.
