މިއަހަރުގެ ޓީޗަރުންގެ ދުވަހުގެ އަމާޒަކީ ކޮވިޑްގެ ބަލިމަޑުކަމުގެ ކުރިން ސްކޫލްތަކުގައި ކިޔެވައިދެމުން ދިޔަ ހާލަތަށް ތައުލީމީ ނިޒާމް ރުޖޫއަކުރުން ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެ އެވެ.
ކޮންމެ އަހަރެއްގެވެސް އޮކްޓޫބަރު މަހުގެ ފަސް ވަނަ ދުވަސް ފާހަގަކުރަނީ ބައިނަލްއަގްވާމީ މުދައްރިސުންގެ ދުވަހުގެ ގޮތުގައި އެވެ. މިއަހަރުގެ މިދުވަހަށް ޔުނެސްކޯއިން ކަނޑައަޅާފައިވަނީ "ކިޔަވައިދިނުން އިހުއޮތްގޮތަށް އިއާދަކުރުމުގެ ހިތަކީ މުދައްރިސުން“ އެވެ.
ޓީޗަރުންގެ ދުވަހުގެ ތަހުނިޔާ އުގަންނައިދިނުމުގައި އުޅޭ ހުރިހާ ފަރާތްތަކަށް އަރިސްކުރައްވަމުން މިނިސްޓަރު މިއަދު ދެއްވި ހިތޯބުގައި ވަނީ އިހު އޮތް ހާލަތަށް ތައުލީމީ ނިޒާމް ބަދަލުކުރުމަށް ކުރަމުންދާ މަސައްކަތުގައި ހުރިހާ ޓީޗަރުންގެވެސް އެއްބާރުލުމާއި އެހީތެރިކަން ބޭނުންވާކަމަށް ވިދާޅުވެފަ އެވެ.
އެގޮތުން މިނިސްޓަރު ވިދާޅުވީ ކޮވިޑްގެ ބަލިމަޑުކަމާއި އެކު ގިނަ ފިލާވަޅުތަކެއް ގެއްލިގެން ދިޔަ ކަމަށެވެ. އަދި ގިނަ ތަމްރީނުތައް ދަރިވަރުންނަށް ނުލިބި ދިޔަ ކަމަށާއި، ކިޔަވައިދިނުމުގެ ވައްޓަފާޅިއަށް ބޮޑު ބަދަލެއް ގެންނަން ޖެހުނު ކަމަށެވެ.
އޭގެ ސަބަބުން ބޮޑު ގެއްލުމެއް ލިބުނުކަމަށް ވިދާޅުވެ، މިނިސްޓަރު ވަނީ އެ ގެއްލުމުން އަރައިގަތުމަށްޓަކައި ގިނަ މަސައްކަތްތަކެއް ކުރަން ޖެހޭކަން ފާހަގަކުރައްވާފަ އެވެ.
"ކަމެއް އިހު އޮތްގޮތަށް އިޢާދަކުރަން ޖެހޭނީ، އެކަމަކަށް ހީނަރުކަމެއް އައުމުން. ބަލިކަށިކަމެއް ލިބުމުން. ކޮވިޑް ރޯގާގެ ސަބަބުން ކިޔަވައިދިނުން އެތައް ދުވަހަކަށް މެދުކެނޑިފައިވޭ. އިންޓަނެޓާއި އެހެން ވަސީލަތްތައް ބޭނުންކޮށްގެން ރާއްޖޭގައި ކިޔަވައިދިން ކަމުގައި ވިއަސް، ކުރިން ކިޔަވައިދޭ ފެންވަރަށް، އެ މިންވަރަށް ކިޔަވައިދެވިފައި ނުވާކަން މުދައްރިސުން ފާހަގަކުރޭ. މި މައްސަލަ ދުނިޔޭގެ ހުރިހާ ގައުމަކަށް ވެސް މެދުވެރިވެފައިވޭ." މިނިސްޓަރު ވިދާޅުވި އެވެ.
މިއަހަރުގެ މުދައްރިސުންގެ ދުވަހުގެ ޝިއާރަށް އަލިއަޅުއްވާލައްވާ މިނިސްޓަރު ވަނީ ކިޔަވައިދިނުން އިހުއޮތްގޮތަށް އިއާދަކުރުމުގެ މަސައްކަތުގެ ހިތަކީ، ނުވަތަ ރޫހަކީ މުދައްރިސްކަން ފާހަގަކުރައްވާފަ އެވެ.
އަދި ކޮވިޑްގެ ދަތި ހާލަތުގައި ބަލިމަޑުކަމުން އަރައިގަތުމުގެ ސިއްރަކީ މުދައްރިސުން ކަމަށާއި، ރޯގާގެ ސަބަބުން މާޔޫސްވެފައިވާ މީސްތަކުންނަށް ހިތްވަރާއި ހިތްހަމަޖެހުން ކޮންމެވެސް ސިފައެއްގައި ގެނެސްދިނީ މުދައްރިސުން ކަމަށް ވިދާޅުވި އެވެ.
ކޮވިޑާ ގުޅިގެން ސިއްހީ ދާއިރާއާއި އެހެން ދާއިރާތަކުގެ މަސައްކަތްތެރީން އިހްތިފާލު ކުރިގޮތަށް، މުދައްރިސުންގެ ރޯލު ފާހަގަކުރުމަކީވެސް ލާޒިމްކަމެއްކަން މިނިސްޓަރު ފާހަގަކުރެއްވި އެވެ.
ދަރިވަރުންނަށް ކިޔަވައިދިނުމަށްޓަކައި އައު ކަންތައްތަކެއް ދަސްކޮށް ކުރިން ބޭނުންނުކުރާ ވަސީލަތްތައް ބޭނުންކޮށްގެން ކޮވިޑްގެ ދުވަސްވަރު މުދައްރިސުން ކުރި ހިތްވަރަށްޓަކައި މިނިސްޓަރު ވަނީ ހުރިހާ ޓީޗަރުންނަށް ޝުކުރު އަދާކުރައްވައިފަ އެވެ.
