ކޮވިޑު ފެތުރުން ހުއްޓުވުމަށް ސްކޫލުތަކުގައި އަޅާފައި ހުރި ފިޔަވަޅުތައް ހަރުދަނާ ކުރަން ޖެހޭ ކަމަށް ވިދާޅުވެ ކޮވިޑް ކޮންޓްރޯލްކުރަން އެކުލަވާލި ޓެކްނިކަލް އެޑްވައިޒަރީ ގްރޫޕް (ޓެގް) ޓީމުގައި ހިމެނިވަޑައިގަންނަވާ ޑރ. ނަޒްލާ މުސްތަފާ ކަންބޮޑުވުން ފާޅުކުރައްވައިފި އެވެ.
ޑރ. ނަޒްލާ "އަދަދު"އަށް ދެއްވި އިންޓަވިއު އެއްގައި ވިދާޅުވީ ސްކޫލުތަކުގައި މިހާރު ފިޔަވަޅުތައް އަޅާފައިވާ ނަމަވެސް އެއަށް އެކަށީގެންވާ ވަރަށް އަމަލު ނުކުރާކަން ފާހަގަވާ ކަމަށެވެ.
އެހެންކަމުން މިހާރު އަޅާފައި ހުރި ފިޔަވަޅުތައް އިތުރަށް ހަރުދަނާ ކުރަން ޖެހޭ ކަމަށް އޭނާ ވިދާޅުވި އެވެ.
ނަޒްލާ ވިދާޅުވީ ކޮވިޑަށް ވުރެ ބޮޑަށް މިހާރު ސްކޫލުތަކުން ފެންނަނީ އެހެން ރޯގާތައް ކަމަށެވެ.
"ސްކޫލުތަކުގައި އެހާބޮޑަށް ޑިސްޓެންސް ބޮޑަށް ނުބަހައްޓާ އުޅޭތަން ފެނޭ. ކޮވިޑް އެވަރަށް ނުފެތުރަނަސް އެހެން ރޯގާތައް އެބަ ފެތުރޭ. އެއީވެސް ކޮވިޑާ އެއްގޮތަށް ނޭވާލާނިޒާމުގެ ތެރެއިން ދާ ވައިރަސްތައް. މިކަހަލަ ވައިރަސްތައްވެސް ފެތުރޭނެ ގައިދުރުކަމެއް ނެތިއްޔާ،" ނަޒްލާ ވިދާޅުވި އެވެ.
ސްކޫލުތަކުގައި ރޯގާތައް ފެތުރެނީ ރޯގާގެ އަލާމަތްތައް ހުންނަ ކުދިން ވެސް ސްކޫލުތަކަށް ދާތީ ކަމަށާއި އަލާމަތްތައް ހުންނަ ކުދިން ސްކޫލުތަކަށް ނުފޮނުވައި، ދޭ ފިލާވަޅުތައް ސްކޫލާ ގުޅިގެން ހޯދުމަށް ނަޒްލާ ވަނީ އިލްތިމާސް ކުރައްވައިފަ އެވެ.
މިވަގުތު ކޮވިޑް ބޮޑަށް ކޮންޓްރޯލް ވެފައި އޮތީ ބޮޑު އައުޓްބްރޭކެއް އައުމަށްފަހު އެވެ.
މީގެ އިތުރުން ޑރ. ނަޒްލާ ވިދާޅުވީ މިވަގުތު ކޮވިޑް ކޮންޓްރޯލް ވެފައި އޮތް އަނެއް ސަބަބަކީ ގިނަ ބަޔަކު ވެކްސިންގެ ފުރަތަމަ ޑޯޒާއި ދެވަނަ ޑޯޒް ޖަހާފައިވާތީ ކަމަށެވެ. ކޮވިޑް މިވަގުތައް ކޮންޓްރޯލް ވެފައިވާ ނަމަވެސް މިހާރު އަޅާފައިވާ ފިޔަވަޅުތައް އިތުރަށް ހަރުދަނާ ނުކުރާނަމަ ކޭސްތައް އިތުރު ވުމުގެ ފުރުސަތު އޮތް ކަމަށް ނަޒްލާ ވިދާޅުވި އެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޑރ. ނަޒްލާ މުސްތަފާ މައުލޫމާތު ދެއްވަނީ. -ފައިލް ފޮޓޯ: ރައީސް އޮފީސް
"ޕޮޕިއުލޭޝަންގެ ގިނަ މީހުން ހުންނާނެ އަދި އިމިއުނިޓީ. މިހާރު ހަ މަސް ވަނީ އައުޓް ބްރޭކްގެ ފަހުންވެސް. ކޮންމެވެސް ވަރަކަށް މެޝާސް ނުނަގަންޏާ ޕޮސިބިލިޓީ އިންނާނެ ކޭސްތައް މަތިވުމުގެ. އެކަމަކު ދެ ޑޯޒް ވެކްސިން ޖަހާފަ ހުރީމަ ޑިޒީޒްތަކަށް ވަރަށް ބޮޑަށް ޕްރޮޓެކްޝަން ދޭނެ،" ނަޒްލާ ވިދާޅުވި އެވެ.
ރޯގާ އިތުރު
އެޗްޕީއޭ އިން ހާމަކޮށްފައިވާ ތަފާސްހިސާބުތަކަށް ބަލާއިރު މިދިޔަ ޖުލައި މަހު އަރިދަފުސް ރޯގާގެ 3،838 ކޭސް ރިޕޯޓްކޮށްފައި ވެ އެވެ. މިދިޔަ މަހުގެ ތެރޭގައި އަރިދަފުސް ރޯގާ ޖެހިގެން ރިޕޯޓްކޮށްފައި ވަނީ 11،348 ކޭސް އެވެ.
އޭގެ އިތުރުން ވޭތުވެދިޔަ ތިން އަހަރާ އަޅާބަލާއިރު މިއަހަރުގެ މިހާތަނަށް އަރިދަފުސް ރޯގާ ޖެހިގެން ރިޕޯޓުކޮށްފައިވާ އަދަދު އިތުރުވެފައިވާކަން އެޗްޕީއޭއިން ވަނީ ފާހަގަކޮށްފަ އެވެ.
އެޗްޕީއޭން ބުނެފައި ވަނީ ވޭތުވެ ދިޔަ ތިން އަހަރާއި އަޅާބަލާއިރު މި އަހަރުގެ މިހާތަނަށް ޑެންގީ ހުން ޖެހިގެން ރިޕޯޓް ކޮށްފައިވާ އަދަދު މަދު ކަމަށެވެ.
މަދިރީގެ ޒަރީއާއިން ފެތުރޭ ބަލިތައް މަދު ނަމަވެސް ޑެންގީ އާއި ޗިކުންގުންޔާ ފަދަ ބަލިތައް ކޮންޓްރޯލް ކުރުމަށާއި ބަލިން ރައްކާތެރިވުމަށް ސަމާލުކަން ދިނުމަކީ މުހިއްމުކަމެއް ކަމަށް އެޗްޕީއޭއިން ވަނީ އިލްތިމާސް ކޮށްފަ އެވެ.
12 އަހަރުން މައްޗަށް ވެކްސިން
މާލެ ސަރަހައްދުގައި އުމުރުން 18 އަހަރާއި 60 އަހަރާ ދެމެދުގެ މީހުންނަށް ސިނޯފާމާއި އެސްޓްރާޒެނަކާ ވެކްސިން ޖަހަމުން އަންނައިރު، އުމުރުން 12 އަހަރާއި 17 އަހަރާ ދެމެދުގެ ކުދިންނަށާއި އެޗްޕީއޭ އިން ކަނޑައަޅާފައިވާ ހާއްސަ ކެޓަގަރީތަކުގެ މީހުންނަށް މިހާރު އަންނަނީ ފައިޒާ ވެކްސިން ޖަހައިދެމުންނެވެ.
އެގޮތުން ސްކޫލު ދަރިވަރުންގެ ވެކްސިން ޖަހާފައިވާ އަދަދަށް ބަލާއިރު ފުރަތަމަ ޑޯޒު ޖެހި ކުދިންގެ އަދަދު އަށް ވަނީ 36،029 އަރައިފަ އެވެ. އެއީ ރާއްޖޭގެ މި އުމުރުފުރައިގެ އާބާދީގެ ތެރެއިން 60 ޕަސެންޓު އާބާދީއަށް ވުރެ އިތުރު އަދަދެކެވެ.
ދެވަނަ ޑޯޒް ޖަހާފައި ވަނީ 30،571 ދަރިވަރުން ކަމަށް އެޑިއުކޭޝަނުން މައުލޫމާތުދެ އެވެ. މިހާތަނަށް 218 ސްކޫލެއްގައި ދަރިވަރުންނަށް ވެކްސިންގެ ފުރިހަމަ ޑޯޒް ޖަހަން ފަށާފައިވާއިރު ވެކްސިންގެ ދަ ވަނަ ޑޯޒް 213 ސްކޫލަކުން ވަނީ ޖަހަން ފަށާފަ އެވެ.
މާލެ ސަރަހައްދުގައި 6 ސެންޓަރެއްގައި ވެކްސިން ދިނުން ކުރިއަށް ގެންދާއިރު، ގޭގެއަށް ގޮސްގެން ވެކްސިން ދިނުމަށް 3 މޮބައިލް ޓީމެއް އަންނަނީ ހަރަކާތްތެރިވަމުންނެވެ. މީގެ އިތުރުން އަތޮޅުތަކުގައި 176 ވެކްސިން ސެންޓަރުން އަންނަނީ ވެކްސިން ޖަހައި ދެމުންނެވެ.
