ޕެރިސް (އޮކްޓޫބަރު 5) - މި ފަހަރުގެ ޓްރާންސްފާ މާކެޓްގައި ޕީއެސްޖީ ދޫކޮށްލަން ނިންމީ އެ ޓީމަށް ރަނގަޅަކަށް ކަންތައް ކުރުމުގެ ވިސްނުމުގައި ކަމަށް ޕީއެސްޖީގެ ފްރާންސް ފޯވާޑް ކީލިއަން އެމްބާޕޭ ބުނެފި އެވެ.
ޕީއެސްޖީއާ އެކު އެމްބާޕޭ ހަދާފައިވާ ކޮންޓްރެކްޓްގައި ބާކީ ނުވަ މަސް އޮތްއިރު، އެ ކްލަބުން ވަނީ ނިމިދިޔަ ޓްރާންސްފާ މާކެޓްގައި ރެއާލުން އެމްބާޕޭ ގަންނަން ހުށަހެޅި ތިން ބިޑް ވެސް އަނބުރާ ފޮނުވާލައިފަ އެވެ. ރިޕޯޓްތައް ބުނާގޮތުން ޖެނުއަރީ މަހު އެމްބާޕޭ، ރެއާލާ އެެކު ޕްރީ އެގްރިމެންޓެއްގައި ސޮއިކުރުމުގެ ފުރުސަތު ބޮޑެވެ. އެއީ ޖުލައި އެއް ވަނަ ދުވަހު އެ ޓީމާ ގުޅޭ ގޮތަށެވެ.
ޕީއެސްޖީން އެމްބާޕޭ ވިއްކާލައިގެން ޓްރާންސްފާ ފީއެއް ހޯދާނަމަ އެންމެ ލަސްވެގެން އޭނާ ޖެނުއަރީ 31 ކުރިން ވިއްކާލަން ޖެހޭނެ އެވެ. ނޫނީ މި ސީޒަން ނިމުމުން އެމްބާޕޭ ޕީއެސްޖީ ދޫކޮށްލާނީ ހިލޭ އެވެ.
ފްރާންސްގެ ނޫހަކަށް ދިން އިންޓަވިއުއެއްގައި އެމްބާޕޭ ބުނީ އޭނާ ފުރަތަމަ ބޭނުންވީ ހިލޭ ޓްރާންސްފާއެއްގައި ކްލަބް ދޫކޮށްލަން ޖެހޭގޮތް ނުވެ އޭގެ ކުރިން ޓީމުން ދިއުމަށް ކަމަށެވެ.
"އަހަރެންގެ ނިންމުން ކްލަބަށް ވެސް ސާފުވާނެ. އަހަރެން ކްލަބް ދޫކޮށްލަން ބޭނުންކަން އެންގީ އޮގަސްޓް ފަހު ހަފްތާގައެއް ނޫން. އަހަރެން އެކަން އެންގިން ޖުލައި މަސް ނިމުމުގެ ކުރިން. އެއީ ހަގީގަތުގައި އަހަރެން ބޭނުންވީ އަހަރެން ދޫކޮށްދާއިރު ޕީއެސްޖީ އަށް އެކަށީގެންވާ ވަރަށް ފައިސާ ލިބި އަހަރެންގެ މަގާމަށް ކޮލިޓީ ހުރި ކުޅުންތެރިއަކު ލިބެން،" އެމްބާޕޭ ބުންޏެވެ.
ރެއާލުން އެންމެ ފުރަތަމަ ކުރީ 188 މިިލިއަން ޑޮލަރު (160 މިލިއަން ޔޫރޯ)ގެ ބިޑެކެވެ. އަދި ދެ ވަނަ އަށް ކުރީ 226 މިލިއަން ޑޮލަރުގެ (180 މިލިއަން ޔޫރޯ)ގެ ބިޑެކެެވެ. ޕީއެސްޖީން 2018 ވަނަ އަހަރު އެމްބާޕޭގެ ކޮންޓްރެކްޓް ދާއިމީ ކުރަން މޮނާކޯ އަށް ދެއްކި ދެއްކީ ރެއާލުން ދެ ވަނަ އަށް ހުށަހެޅި ބިޑާ ދާދި އެއްވަރެއްގެ ފީ އެކެވެ. ޓްރާންސްފާގެ ފަހު ވަގުތު ރެއާލުން ހުށަހެޅީ ބޯނަހާ އެކު 267 މިލިއަން ޑޮލަރު (226 މިލިއަން ޔޫރޯ)ގެ ބިޑެކެވެ. މިއީ ދުނިޔޭގެ ރެކޯޑް އަގެއް ނަމަވެސް ޕީއެސްޖީން އެ ހުށަހެޅުމަށް އިޖާބަ ނުދިނެވެ.
އެމްބާޕޭ ވަނީ ޕީއެސްޖީ އަށް ކުޅެދިން 182 މެޗުން 136 ގޯލު ޖަހައިފަ އެވެ. އެކަމަކު، އެންމެ ފަހުން ކުޅުނު ފަސް މެޗުގައި ވެސް އޭނާގެ ގޯލެއް ނުފެނެ އެވެ.
