ސްޓޮކްހޯމް، ސްވިޑަން (އޮކްޓޯބަރު 4) - މީގެ އަހަރުތަކެއް ކުރިން ކީރިތި ރަސޫލާގެ ކާޓޫން ކުރެހުމުން މަރުގެ އިންޒާރުތައް ލިބި ފުލުހުންގެ ރައްކާތެރިކަމާއެކު ދިރިއުޅެމުން ދިޔަ ސްވިޑަންގެ ކާޓޫނިސްޓް ލާސް ވިލްކްސް ކާރު އެކްސިޑެންޓެއްގައި މަރުވެއްޖެ އެވެ.
ސްވިޑަންގެ ފުލުހުން ބުނީ އުމުރުން 75 އަހަރުގެ ވިލްކްސް އާއި ދެ ފުލުސް އޮފިސަރުން މަރުވީ އެ މީހުންގެ ކާރު، ޓްރަކެއްގައި ޖެހިގެން ކަމަށެވެ.
"މިކަން ބަލަމުން މި ދަނީ އާދައިގެ މަގުމަތީގެ އެކްސިޑެންޓެއްގެ ގޮތުގައި. ދެ ފުލުހުން ހިމެނޭތީ ޕްރޮސެކިއުޓަރުގެ އޮފީހުގެ ހާއްސަ ސެކްޝަނަކުން އަންނަނީ ވަކި ތަހުގީގެއް ކުރަމުން،" މި ހާދިސާގައި ޝައްކު ކުރެވޭ ކަމެއް ނެތް ކަމަށް ފުލުހުން ބުންޏެވެ.
އެކްސިޑެންޓު ހިނގީ މާކަރިޑް އަވަށް ކައިރިން ވިލްކްސް ދުއްވާފައި ދިޔަ ކާރު، ބާރު ސްޕީޑުގައި އައި ޓްރަކެއްގައި ޖެހިގެންނެވެ. ދެ އުޅަނދުގައި ވެސް އަލިފާން ރޯވެ، ޓްރަކް ދުއްވަން އިން މީހާ އަށް ދަނީ ހޮސްޕިޓަލުގައި ފަރުވާދެމުންނެވެ.
ފުލުހުންގެ ބަޔާނެއްގައި ބުނީ އެކްސިޑެންޓު ދިމާވި ސަބަބު ސާފު ނޫން ކަމަށެވެ.
ކީރިތި ރަސޫލާ އަށް ފުރައްސާރަކޮށް 2007 ވަނަ އަހަރު ވިލްކްސް ކާޓޫން ކުރެހުމުން ދުނިޔޭގެ މުސްލިމް ގައުމުތަކުން ނުރުހުން ފާޅުކޮށް، އޭނާއާ ދެކޮޅަށް އެއްވުންތައް ބޭއްވި އެވެ.
ވިލްކްސް މަރާލާ މީހަކަށް 100،000 ޑޮލަރު ދޭނެ ކަމަށް އަލް ގައިދާ އިން ބުނެފައި ވެ އެވެ.
ކާޓޫނު ކުރެހި މައްސަލާގައި ޑިޕްލޮމެޓިކް ހަމަނުޖެހުން ވެސް އުފެދުނެވެ. މުސްލިމް ގައުމުތަކުން ހިތްހަމަނުޖެހުން ފާޅުކުރުމުން ސްވިޑަންގެ އޭރުގެ ބޮޑު ވަޒީރު ފްރެޑްރިކް ރެއިންފެލްޑްޓް ގައުމުތަކުގެ ސަފީރުންނާ ބައްދަލުކުރެއްވި އެވެ.
ދެހާސް ފަނަރަ ވަނަ އަހަރު ކޯޕެންހޭގަން ގައި އޮތް ހިޔާލު ފާޅުކުރުމުގެ މިނިވަންކަމާ ބެހޭ ކޮންފެރެންސެއްގައި ވިލްކްސް އަށް އަމާޒުކޮށް ބަޑި ޖެހި ނަމަވެސް އޭނާ ސަލާމަތްވި އެވެ. އެ ހާދިސާގައި މަރުވީ ޑެންމާކުގެ ފިލްމު ޑިރެކްޓަރެކެވެ.
