އުރީދޫ ސާފް ޗެމްޕިއަންޝިޕްގެ ފައިނަލަށް ދިއުމަށް ސްރީ ލަންކާ އިން ކުރަމުންދާ އުންމީދުތައް ދެމެހެއްޓޭނީ މި މުބާރާތުގައި މިރޭ ނޭޕާލްއާ ދެކޮޅަށް ކުޅޭ މެޗުން މޮޅުވެގެން ކަމަށް އެ ޓީމުގެ ކޯޗު އާމިރު އަލަގިޗް ބުނެފި އެވެ.
މި މުބާރާތުގައި ލަންކާ ކުޅުނު ފުރަތަމަ މެޗުގައި ބަންގްލަދޭޝް އަތުން 1-0 އިން ވަނީ ބަލިވެފަ އެވެ. އެ މެޗުގައި ބަންގްލަދޭޝުން ލަނޑު ޖެހީ ދެވަނަ ހާފުގައި ލިބުނު ޕެނަލްޓީއަކުންނެވެ.
އަނެއްކޮޅުން، ނޭޕާލް މިރޭގެ މެޗަށް ނުކުންނަނީ މުބާރާތުގައި ކުޅުނު ފުރަތަމަ މެޗުގައި ދިވެހިރާއްޖެ އަތުން 1-0 އިން މޮޅުވުމުން ލިބުނު ހިތްހަމަޖެހުމާއެކު އެވެ.
"މެޗުން ޕޮއިންޓެއް ލިބުމަކީ ވެސް ގޯސް ނަތީޖާއަކަށްނުވާނެ. އެކަމަކު އަހަރެމެންނަށް (ފައިނަލްގެ ޖާގަ ހޯދުމުގެ) ރޭހުގައި ދެމި އޮވެވޭނީ މިރޭގެ މެޗުން މޮޅުވެގެން،" ބޮސްނިއާ އަށް ނިސްބަތްވާ އަލަގިޗް ބުންޏެވެ. "ފުރަތަމަ މެޗުން ބަލިވުމަކީ އަހަރަމެންނަށް ގަބޫލްކުރަން ދަތި ނަތީޖާއެއް. އެއީ އެ މެޗުގައި ކަންތައްތައް ދިޔަ ގޮތުން. އުންމީދުކުރަނީ (މިރޭގެ) މެޗުގައި ލަންކާ ޓީމުން ރަނގަޅު ވާދައެއް ކުރާނެކަމަށް."
ބަންގްލަދޭޝް އަތުން ބަލިވި މެޗުގައި ލަންކާގެ މުހިންމު ޑިފެންޑަރު ޑަކްސަން ޕުލާސް އަށް ދެއްކި ރަތްކާޑާ ގުޅިގެން، މިރޭގެ މެޗަށް އޭނާ ވަނީ ސަސްޕެންޑްވެފަ އެވެ.
އަލަގިޗް ބުނީ ޑަކްސަން ނެތްތަން ފޫބެއްދުމަކީ އުނދަގޫ ކަމެއް ކަމަށެވެ. އެކަމަކު ތިބި ކުޅުންތެރިންނާއެކު މިރޭގެ މެޗަށް ވަރަށް ރަނގަޅަށް ތައްޔާރުވާނެ ކަމަށެވެ.
"ޑަކްސަން އަކީ އަހަރަމެންގެ ޑިފެންްސްގެ އެންމެ މުހިންމު އެއް ކުޅުންތެރިޔާ. އޭނާ ނެތްތަން ފޫބައްދަން އުނދަގޫވާނެ. އެ މެޗުގައި ދެއްކި ރަތް ކާޑަކީ ގޯސް ކާޑެއް. ވަރަށް ބޭއިންސާފުކޮށް އެ މެޗުގައި ރެފްރީގެ ނިންމުންތައް ދިޔައީ،" ކުރިން ނިއު ރޭޑިއަންޓަށް ވެސް ކޯޗުކޮށްދިން އަލަގިޗް ބުންޏެވެ.
އަލަގިޗް ބުނީ ސާފް ޗެމްޕިއަންޝިޕްގައި ލަންކާ ވާދަވެރި ޓީމެއްގެ ގޮތުގައި ނުފެނި، ވަރަށް ގިނަ އަހަރުތަކެއް ފާއިތުވެއްޖެ ކަމަށެވެ. އަދި ސާފް ޗެމްޕިއަންޝިޕްގެ ޓީމުތަކުގެ މެދުގައި އޮތް ތަފާތު މިހާރު ކުޑަވަމުންދާ ކަމަށެވެ.
"ނޭޕާލް މޮޅުވި މެޗުގައި މޮޅަށް ކުޅުނީ ރާއްޖެ. އެކަމަކު އެންމެ ކައުންޓާ އެޓޭކަކުން ނޭޕާލް އިން ނަތީޖާ އަނބުރާލީ. އެހެންވީމަ މެޗެއްގެ ނަތީޖާ ދާނެގޮތެއް ނޭނގޭނެ ބުނާކަށް. ކުރިން މި މުބާރާތުގައި ޓީމުތައް ކޮޅަށް 5-0 ނޫނީ 6-0 އިން މޮޅުވިޔަސް، މިހާރު އެއަށްވުރެ ޓީމުތައް ވާދަވެރިކޮށް މި ފެންނަނީ،" އަލަގިޗް ބުންޏެވެ.
އުރީދޫ ސާފް ޗެމްޕިއަންޝިޕްގައި ނޭޕާލާއި ސްރީލަންކާ ބައްދަލުކުރާ މެޗު ފަށާނީ މިރޭ 21:00 ގަ އެވެ.
