ބާސެލޯނާ (އޮކްޓޫބަރު 3) - ސްޕެނިޝް ލީގުގައި މިރޭ އެސްޕަންޔޯލް އަތުން 2-1 އިން ބަލިވެ, ރެއާލް މެޑްރިޑް މި ފަހަރުގެ ލީގުގައި ފުރަތަމަ ފަހަރަށް މެޗަކުން ބަލިވެއްޖެ އެވެ.
މި ނަތީޖާއާ އެކު ވެސް ރެއާލް ލީގުގެ އެއް ވަނައިގައި އޮތީ ލަނޑުގެ ތަފާތުންނެވެ. އެއް ވަނައިގައި އޮތް ރެއާލާއި ދެ ވަނައިގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑާއި ތިން ވަނައިގައި އޮތް ރެއާލް ސޮސިއެޑާޑަށް ވަނީ އަށް މެޗުން 17 ޕޮއިންޓް ލިބިފަ އެވެ.
އެސްޕަންޔޯލަށް މިރޭގެ މެޗުގެ 17 ވަނަ މިނިޓްގައި ލީޑުނެގީ އެޑްރިއާން އެމްބާބާ ނަގައިދިން ހުރަހަކުން އޭރިއާތެރެއިން ރައުލް ޑެ ޓޯމާސް ޖެހި ގޯލުންނެވެ. މެޗުގެ 60 ވަނަ މިނިޓްގައި އެސްޕަންޔޯލްގެ ދެ ވަނަ ގޯލު ޖެހީ އަލެކްސް ވިޑާލް އެވެ. ނަޗޯ ފެނާންޑޭޒް ކައިރިން ނައްޓާފައި އޭރިއާތެރެއަށް ވަދެ ވިޑާލް ވަނީ ތިބައު ކޯޓުއާ އަށް ފުރުސަތެއް ނުދީ ބޯޅަ ގޯލުގެ ތެރެއަށް ފޮނުވާލައިފަ އެވެ. އޭގެ އިރުކޮޅެއް ފަހުން އެސްޕަންޔޯލަށް ތިން ވަނަ ގޯލެއް ޖަހައިދޭން ސާޖީ ޑާޑާ އަށް މުޅިން ހުސްކޮށް ލިބުނު ފުރުސަތުގެ ބޭނުމެއް ނުހިފުނެވެ.
ރެއާލްގެ ކެޕްޓަން ކަރިމް ބެންޒެމާ ޖެހި ފުރަތަމަ ގޯލު އޮފްސައިޑް ކަމަށް ނިންމި އެވެ. އެހެން ނަމަވެސް މެޗުގެ 71 ވަނަ މިނިޓްގައި ބެންޒެމާ ވަނީ މޮޅު ގޯލެއް ޖަހައި ރެއާލަށް އުއްމީދެއް ހޯދައިދީފަ އެެވެ. އަދި މެޗު ނިމެން ހަތް މިނިޓަށް ވެފައި ހުއްޓައި ބެންޒެމާ ދިން ބޯޅައަކުން އެޑެން ހަޒާޑް ރެއާލަށް ލަނޑެއް ޖަހައިދިނެވެ. އެކަމަކު، ރެފްރީ ނިންމީ އެ އެޓޭކްގައި އޮފްސައިޑް ވެފައިވާތީ ގޯލެއް ކަަމަށް ބަލައިނުގަންނާށެެވެ.
މި ހަފްތާގައި ޗެމްޕިއަންސް ލީގުގައި ކުޅުނު މެޗުން އަމިއްލަ ދަނޑުގައި މޮލްޑޯވާގެ ޝެރިފް އަތުން ރެއާލް ބަލިވިއިރު، މިރޭ އެސްޕަންޔޯލް އަތުން ވެސް މި ވަނީ ބަލިވެފަ އެވެ. ޖެހިޖެހިގެން ދެ މެޗުން ބަލިވުމާ އެކު އިންޓަނޭޝަނަލް ބްރޭކަށް ދާއިރު ރެއާލް އޮތީ ކޮންމެ ވެސް ވަރެއްގެ ހާސްކަމެއްގެ ތެރޭގަ އެވެ.
މިރޭގެ މެޗާ ބެހޭގޮތުން ރެއާލްގެ ކޯޗު ކާލޯ އަންޗެލޮޓީ ބުނީ މިއީ މި ސީޒަނުގައި ރެއާލް ކުޅުނު އެންމެ ދަށް މެޗު ކަމަށެެވެ. އަދި އެ ޓީމުގެ ފަރާތުން އެހާ ދަށް ކުޅުމެއް އެއް ހަފްތާތެރޭގައި ދެ ފަހަރު ތަކުރާރުވި ސަބަބެއް ވީހާވެސް އަވަހަށް ދެނެގަތުން މުހިއްމު ކަަމަށާއި އިންޓަނޭޝަނަލް ބްރޭކް ބޭނުންކުރާނީ އެ ކަމަށް ކަމަށެވެ.
