ޕެރިސް (އޮކްޓޫބަރު 3) - ފްރެންޗް ލީގުގައި މިރޭ ޕީއެސްޖީ ކުޅުނު މެޗުގައި ރެނެސް އަތުން ރަށުންބޭރުގައި 2-0 އިން ބަލިވެއްޖެ އެވެ.
މިއީ މި ފަހަރުގެ ޓްރާންސްފާ މާކެޓްގައި ބާސެލޯނާ ދޫކޮށް ޕީއެސްޖީ އަށް ބަދަލުވި ދުނިޔޭގައި އުފެދުނު އެންމެ މޮޅު އެއް ކުޅުންތެރިޔާ ލިއޮނަލް މެސީ އެ ޓީމާ ގުޅުނު ފަހުން ބަލިވި ފުރަތަމަ މެޗެެވެ. އަދި މި މެޗުން ބަލިވުމާ އެކު ޕީއެސްޖީގެ ސައްތަ އިން ސައްތަ ރެކޯޑް ނިމުމަކަށް އައީ އެވެ.
ޕީއެސްޖީ ފްރެންޗް ލީގު މި ފަހަރު ފެށީ ޖެހިޖެހިގެން އަށް މޮޅު ހޯދައިގެންނެވެ. އެކަމަކު މިއަދު ބަލިވިއިރު، އެ ޓީމު އެއް ވަނައިގައި އޮތީ ކުޅުނު ނުވަ މެޗުން 24 ޕޮއިންޓާ އެކު އެވެ. ދެ ވަނައިގައި އޮތް ލެންސަށް ނުވަ މެޗުން ވަނީ 18 ޕޮއިންޓް ލިބިފަ އެވެ.
ރެނެސް ދަނޑުގައި މިއަދު ކުޅުނު މެޗުގައި ޕީއެސްޖީގެ ކުރިއަށް ކުޅޭ ނޭމާ، ކީލިއަން އެމްބާޕޭ އަދި މެސީ ފުރަތަމަ އެގާރައިގައި ހިމެނިގެން ކުޅުނެވެ. އެކަމަކު ގޯލާ ސީދާކޮށް އެންމެ ޝޮޓެއް ވެސް ފޮނުވާނުލެވުނެވެ. މެސީގެ ކުުޅުން ހުއްޓުވުމުގައި ރެނެސް މެދުތެރެއަށް ކުޅުނު ކުޅުންތެރިން ތަފާތު ދެއްކި އެވެ.
ފުރަތަމަ ހާފުގެ ފަހު މިނިޓްގައި ރެނެސް އަށް ލީޑުނަގައިދިނީ ގަޓޭޓާން ލަބޯޑް އެވެ. އަދި ދެ ވަނަ ހާފް ފަށައިގެން މިނިޓެއްހާއިރު ތެރޭ ރެނެސްގެ ދެ ވަނަ ގޯލު ޖެހީ ފްލޭވިއަން ޓައީޓް އެވެ. ދެ ގޯލުގެ ލީޑެއް ދެ ވަނަ ހާފުގެ ކުރީކޮޅުގައި ލިބުމާ އެކު ރެނެސް އިން ވަރަށް ބޮޑަށް ފަހަތަށް ޖެހިގެން ކުޅެ ލީޑު ސަލާމަތްކުރުމުގައި ކާމިޔާބު ހޯދި އެވެ.
ޕީއެސްޖީގެ އެމްބާޕޭ ޖެހި ގޯލެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަަލައި އޮފްސައިޑް ކަމަށް ނިންމައިފަ އެވެ. އެންމެ ފަހުން ކުޅުނު ފަސް މެޗުގައި ވެސް އެމްބާޕޭ އަށް ގޯލެއް ނުޖެހޭއިރު، މިއީ ޕީއެސްޖީ އަށް ބަދަލުވި ފަހުން އޭނާ ލަނޑެއް ނުޖެހި އެންމެ ގިނަ މެޗު ކުޅެން ޖެހޭ ފަހަަރެވެ.
