އުރީދޫ ސާފް ޗެމްޕިއަންޝިޕްގައި ނޭޕާލްގެ ވިސްނުމަކީ މެޗަކަށް ފަހު މެޗެއް ކުރިއަށް ދިއުން ކަމަށާއި އެ ގޮތަށް ވިސްނުން ބަހައްޓައިގެން މިރޭ ސްރީލަންކާއާ ދެކޮޅަށް ނޭޕާލުން ކުޅޭއިރު، ރާއްޖެ އަތުން މޮޅުވި މެޗުގެ ހަނދާނެއް ނެތް ކަމަށް ނޭޕާލްގެ ކެޕްޓަން އަދި ގޯލްކީޕަރު ކިރަން ޝެމްޝޮން ބުނެފި އެވެ.
ނޭޕާލުން ވަނީ މި ފަހަރުގެ ސާފް ޗެމްޕިއަންޝިޕްގައި ކުޅުނު ފުރަތަމަ މެޗުން މިދިޔަ ހުކުރު ދުވަހުގެރޭ ރާއްޖެ އަތުން 1-0 އިން މޮޅުވެފަ އެެވެ. މިއީ ސާފްގެ ތާރީހުގައި މިހާތަނަށް ރާއްޖެއާ ދެކޮޅަށް ކުޅުނު އަށް މެޗުގެ ތެރެއިން ނޭޕާލަށް ލިބުނު ފުރަތަމަ މޮޅެވެ. އެ މޮޅު ލިބުމުން ނޭޕާލުން އަންނަނީ ވަރަށް ބޮޑަށް އުފާފާޅުކުރަމުންނެވެ.
ލަންކާއާ ދެކޮޅަށް މިރޭ ކުޅޭ މެޗުގެ ކުރިން އިއްޔެ ބޭއްވި ނޫސްވެެރިންގެ ބައްދަލުވުމުގައި ވާހަކަ ދައްކަމުން ކިރަން ބުނީ ރާއްޖެ އަތުން ލިބުނު މޮޅަކީ މިހާރު މާޒީ ކަަމަށެވެ.
"ރާއްޖެ މެޗު އަހަރެމެން ސިކުނޑިއަކު ނެތް. ދެން އޮތް ސްޓެޕަކީ ލަންކާ މެޗު. ލަންކާ މެޗަށް ވެސް އަހަރެމެން ފައިޓްކުރާނީ ތިން ޕޮއިންޓަށް. ފުރަތަމަ ޕްރެސް ކޮންފަރެންސްގައި އަހަރެން ބުނިން. އަހަރެމެންނަކީ ގޯކާލީންނޭ އެންމެ ފަހު މިނިޓާ ހަމައަށް އަހަރެމެން ފައިޓް ކުރާނަން،" ކިރަން ބުންޏެވެ.
"މާދަމާ ވެސް އަހަރެމެން 90 މިނިޓް ފައިޓްކުރާނަން. އަހަރެމެންނަށް އިތުބާރު އެބައޮތް އަމިއްލަ ނަފްސަށް ވެސް ޓީމަށް ވެސް. އަހަރެމެންނަށް މޮޅެއް ލިބޭނެ ކަމުގެ އުއްމީދު އޮތީ،"
ކިރަން ވަނީ އޭނާގެ ކްލަބް ކެރިއަރުގައި ނޭޕާލްގެ އިތުރުން ރާއްޖެ އާއި އިންޑިއާގައި ވެސް ކުޅެފަ އެވެ. ނޭޕާލްގެ މޮޅު ކުޅުންތެރިޔާގެ މަގާމު ހޯދި ކިރަން ވަނީ ރާއްޖޭގެ ލީގާއި އިންޑިއާގެ އައި ލީގުގެ އެންމެ މޮޅު ގޯލްކީޕަރުގެ މަގާމު ހޯދައިފަ އެވެ.
ސާފް ޗެމްޕިއަންޝިޕްގެ ވެސް ގިނަ މުބާރާތްތަކެއްގައި ކުޅެފައިވާ ކިރަން ބުނީ މި މުބާރާތުން ކޮންމެ ފަހަރަކު ވެސް ކުރިއެރުންތަކެއް ފެންނަމުން އަންނަ ކަމަށެވެ.
"އަހަރެންގެ ނަޒަރުގައި މި މުބާރާތް ކުރިއަރަމުން ދަނީ. ޓީމުތައް ވެސް ވަރަށް ކުރިއަރާ. އަހަރެންގެ ނަޒަރުގައި އެބަޖެހޭ ވަރުގަދަ ޓީމުތަކަށް ދައުވަތުދީގެން ޓީމު އިތުރުކޮށްގެން މުބާރާތް ވަރުގަދަ ކުރަން. އަހަރެން އަޑުއެހިން ސާފް ފެޑެރޭޝަނުން، މި މުބާރާތް 2012 އިން ފެށިގެން ބަދަލުކޮށް ޓީމުތައް ވަރުގަދަ ޓީމުތައް އިތުރުކުރަން އުޅޭ ކަމަށް. އެހެންވެއްޖިއްޔާ މިއީ ވަރަށް ބޮޑު ރަނގަޅެއް،" ކިރަން ބުންޏެވެ.
އިންޑިއަން ސަބް ކޮންޓިނެންޓް ގައުމުގަކުގެ އިތުރުން ސާފް ޗެމްޕިއަންޝިޕްގައި 2005 އިން ފެށިގެން 2015 އާ ހަމައަށް ވަނީ އަފްގާނިސްތާން ބައިވެރިކޮށްފަ އެވެ. އަފްގާނިސްތާން ވަނީ 2013 ވަނަ އަހަރު ސާފް ޗެމްޕިއަންޝިޕްގެ ޗެމްޕިއަންކަން ހޯދައި 2015 ވަނަ އަހަރު ފައިނަލުން އިންޑިއާ އަތުން ބަލިވެފަ އެވެ. އެ މުބާރާތަށް ފަހު އަފްގާނިސްތާން ވާދަކުރަމުން އަންނަނީ އާސިއާން ޒޯނުގަ އެވެ.
ނޭޕާލުން މިހާތަަނަށް ސާފް ޗެމްޕިއަންޝިޕެއް ކާމިޔާބުކޮށްފައިނުވާއިރު، ފައިނަލެއްގައި ވާދަކުރެވިފައި ވެސް ނުވެ އެވެ. މި ފަހަރުގެ ސާފް ޗެމްޕިއަންޝިޕްގައި ތަށްޓައް އަމާޒުކޮށް މަސައްކަތް ކުރަމުން އަންނަ ނޭޕާލް ކުޅޭ ދެ ވަނަ މެޗުގައި މިރޭ ލަންކާއާ ދެކޮޅަށް ނުކުންނާނީ 9 ޖަހާއިރު އެވެ.
